Author: નોબત સમાચાર
ભૂલા પડી ગયેલા વૃદ્ધાનો જામનગરની ૧૮૧ અભયમ્ ટીમે પરિવાર સાથે કરાવ્યો મિલાપ
મંદિરે જવા નીકળ્યા અને ઘરનો રસ્તો ભૂલી ગયાં !
જામનગર તા. ૨૮: જામનગરની ૧૮૧ અભયમ ટીમે મંદિરે દર્શનાર્થે જતા ભૂલા પડેલા અને શારીરિક અશક્ત એવા એક નિઃસહાય વૃદ્ધાને મદદ કરીને તેમના પરિવારજનો સાથે મેળાપ કરાવી સંવેદનશીલતાનું ઉદાહરણ પૂરૃં પાડ્યું છે. એક જાગૃત નાગરિક દ્વારા પેટ્રોલપંપ પાસે બેસેલા આ નિઃસહાય વૃદ્ધ મહિલા માટે ૧૮૧ ટીમના કાઉન્સેલર રૂપલ મકવાણા, મહિલા કોન્સ્ટેબલ ગીતાબેન ધરવિયા અને ડ્રાઈવર સુરજીતભાઈ વાઘેલા સહિતની ટીમ ઘટનાસ્થળે પહોંચી ગઈ હતી. ત્યાં પહોંચીને સૌપ્રથમ ૭૫ વર્ષની ઉંમર ધરાવતા આ વૃદ્ધાને હૂંફ આપીને ભાવનાતમક ટેકો પૂરો પાડ્યો અને કાઉન્સેલિંગ કરતા જાણવા મળ્યું કે આ વૃદ્ધા મંદિર જવા માટે રિક્ષામાં બેઠા હતા પરંતુ રિક્ષાચાલક તેમને બીજા રસ્તે ઉતારીને જતો રહ્યો હતો. નબળી યાદશક્તિના કારણે તેઓ રસ્તો ભૂલી ગયા હતા.
આ વૃદ્ધા માત્ર પોતાનું નામ અને દીકરાનું નામ જ જણાવી શક્તા હતા તેમજ રહેઠાણના વિસ્તારની તૂટક અને અપૂરતી માહિતી જ આપી શકતા હતા. અભયમ ટીમે તેમની કુશળતાનો ઉપયોગ કરીને વૃદ્ધા દ્વારા આપવામાં આવતી તૂટક માહિતીના આધારે આસપાસના વિસ્તારોમાં સઘન પૂછપરછ શરૂ કરી હતી. આ ઉપરાંત, સોશિયલ નેટવર્કિંગનો ઉપયોગ કરીને પણ તેમના પરિવારજનોની શોધખોળ કરવામાં આવી જેમાં એક વ્યક્તિ દ્વારા વૃદ્ધાની ઓળખ થતાં જ ટીમે તેમના પરિવારજનોનો સંપર્ક કર્યો. પરિવારજનોએ ૧૮૧ ટીમને જણાવ્યું કે તેમના બા સવારથી ઘરેથી નીકળી ગયા હતા અને તેમને પરત ફરવાનો રસ્તો યાદ ન હોવાથી તેઓ બધા જ સવારથી તેમની શોધખોળ કરી રહ્યા હતા. અભયમ ટીમે વૃદ્ધ મહિલાનું તેના પરિવારજનો સાથે મિલન કરાવ્યું હતું. માતાને સુરક્ષિત જોઈને પરિવાર જનોએ ૧૮૧ અભયમ ટીમનો આભાર માન્યો હતો. આ ઘટના દર્શાવે છે કે સંકટના સમયે ૧૮૧ અભયમ મહિલા હેલ્પલાઈન મહિલાઓને અને વૃદ્ધો માટે એક અસરકારક સહારો બની રહી છે.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
