ભારત 'મેજર પાવર'ની સીમા ઓળંગીને દુનિયાના ટોપ ટેન પાવરફૂલ દેશોમાં ત્રીજા ક્રમે

Author: નોબત સમાચાર

ભારત 'મેજર પાવર'ની સીમા ઓળંગીને દુનિયાના ટોપ ટેન પાવરફૂલ દેશોમાં ત્રીજા ક્રમે

અમેરિકા ટોચ પર હોવા છતા પ્રભાવ ઘટયોઃ ચીન-દ્વિતિય, જાપાન ચોથા અને રશિયા પાંચમા ક્રમે રહ્યું

નવી દિલ્હી તા. ૨૮: દુનિયાના ટોપ-૧૦ પાવરફુલ દેશોની યાદીમાં ભારત ત્રીજા ક્રમે રહ્યું છે. એશિયા પાવર ઈન્ડેકસ ૨૦૨૫ જાહેર કરતા ભારત હાલમાં મેજર પાવર બનીને સુપર પાવર બનવા તરફ આગળ વધી રહ્યું છે.

ઓસ્ટ્રેલિયાની પ્રતિષ્ઠિત લોવી ઇન્સ્ટિટ્યૂટએ પોતાનો વાર્ષિક એશિયા પાવર ઇન્ડેક્સ ૨૦૨૫ રિપોર્ટ જાહેર કર્યો છે. આ રિપોર્ટમાં એશિયાના ૨૭ દેશોમાં સૈન્ય, આર્થિક, રાજદ્વારી અને સાંસ્કૃતિક પ્રભાવનું વિસ્તૃત મૂલ્યાંકન કરવામાં આવ્યું છે, જે આઠ મુખ્ય ક્ષેત્રો(સૈન્ય ક્ષમતા, સંરક્ષણ નેટવર્ક, આર્થિક તાકાત, રાજદ્વારી પ્રભાવ, સાંસ્કૃતિક પહોંચ, લચીલાપણું અને ભવિષ્યના સંસાધન ક્ષમતા) પર આધારિત છે.

આ ઇન્ડેક્સ દર્શાવે છે કે એશિયાની પ્રાદેશિક શક્તિના સમીકરણોમાં મોટા ફેરફારો થયા છે, જેમાં ચીન એક પ્રમુખ શક્તિ તરીકે મજબૂત રીતે ઉભરી રહૃાું છે, જ્યારે યુનાઇટેડ સ્ટેટ્સ ઑફ અમેરિકાના પ્રભાવમાં છેલ્લા વર્ષોની તુલનાએ ઘટાડો નોંધાયો છે. તેમજ ભારત સતત આગળ વધી રહૃાું છે.

લોવી ઇન્સ્ટિટ્યૂટના રિપોર્ટમાં એશિયામાં ભારતનો વધતો પ્રભાવ સ્પષ્ટપણે દેખાય છે. વર્ષ ૨૦૨૫માં ભારતે ૪૦.૦ સ્કોર મેળવીને 'મેજર પાવર' બનવાની સીમા પાર કરી લીધી છે. અને સુપર પાવર બનવાની બોર્ડર પર છે. ભારતનો આ ઉદય મુખ્યત્વે તેની મજબૂત આર્થિક વૃદ્ધિ અને વધતી સૈન્ય તાકાતને કારણે થયો છે.

આ રિપોર્ટ દર્શાવે છે કે ભારતનો રાજદ્વારી અને આર્થિક પ્રભાવ હજી સુધી તેની વધેલી સૈન્ય અને સંસાધન શક્તિ સાથે સંપૂર્ણપણે મેળ ખાતો નથી, જેનો અર્થ છે કે ભારત પાસે ભવિષ્યમાં પોતાની શક્તિ વધારવાની હજી ઘણી મોટી સંભાવનાઓ છે, અને તે દિશામાં વધુ ઘનિષ્ઠ અને સંનિષ્ઠ પ્રયાસો કરવા પડે તેમ છે.

ટોચના દેશોની સ્થિતિ જોઈએ તો અમેરિકા ૮૦.પ સ્કોર સાથે સુપર પાવર, ચીન ૭૩.૭ ના સ્કોર સામે સુપર પાવર અને ભારત ૪૦ મેજર પાવર બનીને સુપર પાવર બનવા તરફ આગળ વધી રહ્યું છે.

જ્યારે ચોથો રેન્ક મેળવી છે જાપાન ૩૮.૮, રશિયા ૩ર.૧), ઓસ્ટ્રેલિયા (૩૧.૮), દક્ષિણ કોરિયા (૩૧.પ, સિંગાપોર (ર૬.૮), ઈન્ડોનેશિયા (રર.પ), મલેશિયા (ર૦.૬) પોઈન્ટ સાથે મિડલ પવાર બન્યા છે.

અત્યારે ફક્ત અમેરિકા અને ચીન જ 'સુપર પાવર' શ્રેણીમાં સૂચિબદ્ધ છે. અમેરિકા હજુ પણ ટોચ પર છે, પરંતુ એશિયા પાવર ઈન્ડેક્સ ર૦૧૮ માં શરૂ થયા પછી આ તેનો સૌથી ઓછો સ્કોર છે. વિશ્લેષકો આ ઘટાડાનું શ્રેય ટ્રમ્પ પ્રશાસન દરમિયાન લેવાયેલા નીતિગત નિર્ણયોને આપે છે, જેને એશિયામાં અમેરિકી પ્રભાવ માટે ચોખખો નકારાત્મક ગણાવવામાં આવ્યો છે, જ્યારે ચીન સતત અમેરિકા સાથેનો તફાવત ઘટાડી રહ્યું છે.

પાકિસ્તાન ટોચના ૧૦ દેશોમાંથી બહાર છે અને તેને ૧૬ મું સ્થાન મળ્યું છે. રશિયાએ ર૦૧૯ પછી પહેલીવાર એશિયામાં પોતાનો પ્રભાવ વધાર્યો છે. યુક્રેન યુદ્ધ પછી જે પ્રતિબંધો લાગ્યા હતાં, તેના કારણે ગુમાવેલો પ્રભાવ તેણે હવે પાછો મેળવી લીધો છે.

રશિયાની આ પ્રાદેશિક હાજરી વધવાનું મુખ્ય કારણ ચીન અને ઉત્તર કોરિયા સાથેની તેની મજબૂત સંરક્ષણ અને આર્થિક ભાગીદારી છે. આને કારણે રશિયાએ ર૦ર૪ માં ઓસ્ટ્રેલિયાથી ગુમાવેલું પાંચમું સ્થાન ફરીથી હાંસલ કર્યું છે. આ ઉપરાંત જાપાન, દક્ષિણ કોરિયા અને ઓસ્ટ્રેલિયા જેવા દેશો પણ મજબૂત આર્થિક, તકનિકી અને રાજદ્વારી પ્રયાસો સાથે મિડલ પાવર તરીકે એશિયામાં મહત્ત્વપૂર્ણ ભૂમિકા ભજવી રહ્યા છે.

જો આપને આ પોસ્ટ ગમી હોય તો શેર કરો...