રાજ્યમાં દારૂ-ડ્રગ્સની ફેલાઈ રહેલી બદી સામે જામનગર શહેર-જીલ્લા કોંગ્રેસનું આવેદનપત્ર

Author: નોબત સમાચાર

રાજ્યમાં દારૂ-ડ્રગ્સની ફેલાઈ રહેલી બદી સામે જામનગર શહેર-જીલ્લા કોંગ્રેસનું આવેદનપત્ર

ગાંધીજીના મૂલ્યો-વિચારોને વરેલા ગુજરાતમાં નશાખોરીના ખપ્પરમાં હોમાતા યુવાધનને બચાવો...

જામનગર તા. ર૮: ગુજરાત એ ગાંધીજીના મુલ્યો-વિચારોને હંમેશાં વરેલ છે. આમ છતાં રાજ્યમાં દારૂ-ડ્રગ્સની બદીના કારણે યુવાનો નશાખોરીના ખપ્પરમાં હોમાઈ રહ્યું છે. આ મુદ્દે ગઈકાલે જામનગર શહેર-જિલ્લા કોંગ્રેસ દ્વારા કલેક્ટર-એસ.પી.ને આવેદન પાઠવાયું હતું અને નશાબંધીના કાયદાનો કડક અમલ કરાવવો, નશાનો વેપલો બંધ કરાવવો તથા યુવાધનને બચાવવા માગણી કરી હતી.

જામનગરમાં ગઈકાલે જિલ્લા કોંગ્રેસ તથા શહેર કોંગ્રેસ સમિતી દ્વારા કલેક્ટર અને પોલીસ વડાને આવેદન પાઠવ્યું હતું, જેમાં એવી માગણી-રજૂઆત કરવામાં આવી હતી કે, રાજ્યમાં દારૂબંધી માટે ગાંધીજીની હાકલનો, રાજ્યમાં નશાખોરીને નાથવા સ્થાપના કાળથી કડક કાયદાકીય જોગવાઈ કરવામાં આવી હતી. હાલ રાજ્યમાં દારૂ-ડ્રગ્સની બદીના કારણે યુવાધન નશાખોરીના ખપ્પરમાં હોમાઈ રહ્યા છે. ગુજરાત ડ્રગ્સ-દારૂનું પ્રવેશદ્વાર તો બન્યું છે, પરંતુ હવે તો એપી સેન્ટર બની ગયું છે. જે અત્યંત ચિંતાજનક બાબત છે.

રાજ્યમાં બેરોકટોક આવી પ્રવૃત્તિ જોવા મળી રહી છે. અહીં દારૂબંધી છે, છતાં સરળતાથી દારૂ મળે છે. તો રાજ્યના દરિયા કિનારેથી ચરસ, ગાંજો, મળવા સામાન્ય રીતે મળે છે.

છેલ્લા ૩૦ વર્ષથી ગુજરાતમાં ભાજપનું એકહથ્થુ શાસન છે, પરંતુ દારૂ-ડ્રગ્સની બદીને નાથવામાં તંત્ર નિષ્ફળ રહ્યું છે. રાજ્ય પોલીસ, એન.સી.બી., ડીઆરઆઈ સહિતની કેન્દ્રિય સંસ્થાઓ રાજ્યમાં બોર્ડર પોસ્ટ, પેટ્રોલીંગ, રાઉન્ડ ધ ક્લોક સર્વેલન્સ, સીસી ટીવી કેમેરા સહિતની ટેકનોલોજી હોવા છતાં રાજ્યમાં હવાઈ માર્ગે, દરિયાઈ માર્ગે, પોર્ટ, જેવા માર્ગોથી ગુજરાતમાં કરોડો રૂપિયાનું હજારો કિલો ડ્રગ્સ ઠાલવાઈ રહ્યું છે. પકડાયેલા ડ્રગ્સની માત્રા હજારો કિલોમાં છે, તો પાછલા બારણે આ કારોબાર કેટલો મોટો હશે? રાજ્ય સરકાર પાસે ડ્રગ્સની બદીને ડામવા પૂરતો પોલીસ ફોર્સ પણ નથી.

પાંચ વર્ષમાં ગુજરાતમાં ૯૩,૬૯૧ કિલો ડ્રગ્સ, રરર૯ લીટર પ્રવાહી ડ્રગ્સ તથા ૭૩,૧૬૩ ડ્રગ્સ પીલ્સ-ઈન્જેક્શન પકડાયા હતાં. વર્ષ ર૦ર૦-ર૪ ના ચાર વર્ષમાં ૧૬,૦૦૦ કરોડના પકડાયાના ૧૯ કિસ્સા બન્યા છે, પરંતુ એક પણ વ્યક્તિને સજા થઈ નથી, જે ગંભીર બાબત છે.

નશામુક્તિ અભિયાન, અવેરનેસ એક્ટિવિટી, ડ્રગ્સ અંગે જનજાગૃતિ કાર્યક્રમો, માત્ર કાગળ પર થતા હોય તેમ જણાઈ રહ્યું છે. ડ્રગ્સ સામે લડાઈ લડતી ૭પ થી વધુ સંસ્થાની ગ્રાન્ટ આ સરકારે બંધ કરી દીધી છે.

દારૂ-ડ્રગ્સના કારણે ગુજરાતની બહેનો વિધવા થાય છે. યુવાનોનું ભવિષ્ય બરબાદ થાય છે. થરાદ જિલ્લાના શિવપુરમાં મહિલાઓએ જનઆક્રોશ યાત્રા દરમિયાન કોંગ્રેસના પ્રમુખ-ધારાસભ્ય અમિત ચાવડાને રજૂઆત પણ કરી હતી.

આથી અમિત ચાવડાની સૂચનાથી ધારાસભ્ય જીગ્નેશ મેવાણીએ સ્થાનિક પોલીસ મથકમાં રજૂઆત કરી હતી. શિવપુરની શાળાની બાજુમાં જ દારૂ-ડ્રગ્સનં ખુલ્લેઆમ સેવન થાય છે.

મહિલાઓની વારંવારની રજૂઆત પછી પગલાં લેવામાં આવ્યા નહીં. તંત્ર પાસે જવાબ માંગવાના બદલે ભાજપ સરકાર બુટલેગરોને બચાવવા વકીલાત કરી રહી છે. બુટલેગરો કહે છે કે, અમો ગાંધીનગર સુધી હપ્તા પહોંચાડીએ છીએ. જેલમાંથી પત્રો લખાય છે. ભાજપના ધારાસભય દારૂના ધંધામાં ભાગીદાર છે, અને દારૂના ધંધાના હિસાબની ઉઘરાણી કરે છે. આમ આ ધંધામાં ક્યાંક ભાજપના મોટા માથા ક્યાંકને ક્યાક સંડોવાયેલા છે. આથી તેમની ગભરામણ સ્વાભાવિક છે.

કોંગ્રેસ પક્ષ હંમેશાં ઈમાનદાર, નિષ્ઠાવાન, કાર્યક્ષમ પોલીસ કર્મીને સલામ કરે છે, બિરદાવે છે. સાથોસાથ લાંચિયા-હપ્તાખોર ભ્રષ્ટ મળતિયાઓને ખુલ્લા પાડવાની જનલક્ષી કામગીરી કરતો રહે છે.

આથી મહિલા સુરક્ષા અને દારૂબંધીની કડક અમલવારી થાય તે માટે નશાબંધી-દારૂબંધી કાયદાની કડકપણે અમલવારી થાય, નશાનો બેરોકટોક વેપલો બંધકરાવવો એ ગુજરાતના ભવિષ્ય એવા યુવા ધનને બચાવવા માટે પગલાં લેવામાં આવે.

આ રજૂઆત શહેર કોંગ્રેસ પ્રમુખ દિગુભા જાડેજા, પૂર્વ સાંસદ વિક્રમભાઈ માડમ, મહાનગરપાલિકાના વિપક્ષના નેતા ધવલ નંદા, પ્રદેશ અગ્રણી સહારાબેન મકવાણા, કોર્પોરેટર આનંદ રાઠોડ, જેનબબેન ખફી, રચનાબેન નંદાણિયા, રાજ્યના પૂર્વ મંત્રી ડો. દિનેશભાઈ પરમાર, જીવણભાઈ કુંભારવડિયા, મનોજ કથિરિયા, જે.પી. મારવિયા સહિતના નેતાઓ જોડાયા હતાં.

જો આપને આ પોસ્ટ ગમી હોય તો શેર કરો...