Author: નોબત સમાચાર
દ્વારકામાં આવેલી બે હોટલને પ્રાંત અધિકારી કચેરી દ્વારા નોટીસ પાઠવાતા મચ્યો ખળભળાટઃ સાત દિ'ની મહેતલ
બંને હોટલ સામે પાર્કિંગ, માર્જીન તથા ચણતર અંગે થયા છે આક્ષેપઃ
ઓખા તા. ૨૮: દ્વારકા શહેરમાં હાથી ગેઈટ પાસે આવેલી હોટલ ઈરા તથા સનાતન સર્કલ પાસે આવેલી હોટલ દેવ અંગે તાજેતરમાં એસડીએમ અને પ્રાંત અધિકારીની કચેરીમાં ફરિયાદ અરજીઓ થઈ હતી. આ હોટલોમાં પાર્કિંગની જરૂરી વ્યવસ્થા તેમજ માર્જીન મુકવામાં ન આવ્યું હોવાની અને પરવાનગી વગર જ વધારે માળ ચણી લેવાયાનું અરજીમાં જણાવાયું હતું. જેના પગલે પ્રાંત અધિકારી કચેરીએ બંને હોટલને નોટીસ પાઠવી સપ્તાહમાં હોટલના દસ્તાવેજો રજૂ કરવા સૂચના આપી છે.
દ્વારકામાં પ્રતિદિન હજારોની સંખ્યામાં દેશ-વિદેશથી યાત્રાળુઓ દર્શનાર્થે આવી રહ્યા છે ત્યારે યાત્રાળુઓની સલામતી તથા સુરક્ષા તેમજ જાહેર સુખાકારીના હિતોની તંત્ર દ્વારા દરકાર કરવામાં આવી રહી છે. તે ઉપરાંત દ્વારકામાં પ્રવેશતા મુખ્ય રાષ્ટ્રીય ધોરીમાર્ગ પર યાત્રાળુઓની અવરજવર તથા ટ્રાફિકના પ્રશ્નને ધ્યાનમાં લઈ તાજેતરમાં એક જાગૃત નાગરિકે પ્રાંત અધિકારી સમક્ષ એક હોટલ વિરૂદ્ધ રજૂઆત કરી હતી.
દ્વારકાના હાથી ગેઈટ પાસે આવેલી હોટલ ઈરા ધ ઓર્કીડ હોટલમાં પાર્કિંગની વ્યવસ્થા તેમજ આજુબાજુમાં કાયદા મુજબ માર્જીન મૂકવામાં આવ્યું નથી તેમ રજૂઆત કરાઈ હતી અને તે હોટલમાં પરવાનગી વગર જ કેટલાક માળ અનઅધિકૃત રીતે ચણી લેવામાં આવ્યા હોવાનું પણ જણાવવામાં આવ્યું હતું. તે અરજીને ધ્યાને રાખી હોટલને પ્રાંત અધિકારી દ્વારા નોટીસ પાઠવવામાં આવી છે અને હોટલના દસ્તાવેજ તેમજ બાંધકામ પરવાનગીની નકલ, ફાયર એનઓસી, સ્થળના ફોટોગ્રાફ્સ વગેરે માંગવામાં આવ્યા છે.
તે જ રીતે સનાતન સર્કલ પાસે આવેલી દેવ હોટલમાં પણ પાર્કિંગની જરૂરી વ્યવસ્થા કરવામાં આવી નથી અને હોટલની આજુબાજુમાં સરકારી કાયદા મુજબ માર્જીન મૂકવામાં આવ્યું નથી તેવી તથા હોટલમાં પરવાનગી વગર વધારે માળ ચણી લેવામાં આવ્યા છે તેવી ફરિયાદ અરજી પ્રાંત અધિકારી કચેરીને પ્રાંત થઈ હતી. આ હોટલને પણ ભારતીય નાગરિક સુરક્ષા સંહિતાની કલમ ૧૫૨ હેઠળ હોટલના દસ્તાવેજ તથા આધાર પુરાવા રજૂ કરવા સૂચના આપવામાં આવી છે.
ઉપરોક્ત હોટલ ઈરા ધ ઓર્કીડ અને હોટલ દેવને આગામી તા.૩ ડિસેમ્બરના દિને ઉપરોક્ત આધાર પુરાવાઓ રજૂ કરવા માટે તાકીદ કરાઈ છે અને જો ત્યારે આધાર પુરાવા રજૂ કરવામાં ન આવે તો જાહેર સુખાકારી બાબતે આ જગ્યાઓ પર વાણિજ્ય હેતુનો ઉપયોગ બંધ કરવા માટે કાયદેસરની કાર્યવાહી કરવામાં આવશે તેમ સ્પષ્ટપણે જણાવવામાં આવ્યું છે. ઉલ્લેખનીય છે કે, તાજેતરમાં નાગેશ્વર જયોતિર્લિંગ મંદિરના હાલના પૂજારીઓ દ્વારા ભ્રષ્ટાચાર કરીને હોટલ ઉભી કરી લેવામાં આવી છે તેવા કરાયેલા આક્ષેપો વચ્ચે દેવ હોટલ તે રકમમાંથી ઉભી કરવામાં આવી હોવાનો પણ આક્ષેપ કરાયો હતો.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
