ઢીંચડા પાસે આવેલા ગોડાઉનની પાડતોડ અંગે અધિકારીની અંગત જવાબદારી ઠેરવાઈ

Author: નોબત સમાચાર

ઢીંચડા પાસે આવેલા ગોડાઉનની પાડતોડ અંગે અધિકારીની અંગત જવાબદારી ઠેરવાઈ

રૂ.૮ લાખથી વધુનું નુકસાન વ્યાજ સાથે ચૂકવાશેઃ

જામનગર તા. ૧૨: જામનગરના ઢીંચડા પાસે આવેલા ટ્રાન્સપોર્ટના ગોડાઉનની ર૭ વર્ષ પહેલાં પાડતોડ કરી નાખવામાં આવી હતી. તે ગોડાઉનના માલિકે જે તે વખતે રૂ.૮ લાખથી વધુનું નુકસાન કરવા અંગે તે વખતના જાડાના ચેરમેન તથા ટીપીઓ સહિતના અધિકારીઓ સામે અદાલતમાં ધા નાખી હતી. તે દાવાની અપીલમાં અદાલતે દાવો મંજૂર કરી ટીપીઓની અંગત જવાબદારી ઠરાવી નુકસાનીની રકમ છ ટકા વ્યાજ સાથે ચૂકવવા જાડાને હુકમ કર્યાે છે.

જામનગર નજીકના ઢીંચડા ગામમાં પ્લોટ નં.૪થી ૯ વચ્ચેની અંદાજે ૮૮ હજાર ફૂટની જગ્યા જિલ્લા પંચાયત દ્વારા વર્ષાે પહેલા ટ્રાન્સપોર્ટના ગોડાઉન બનાવવાના હેતુથી બિનખેતી કરાવવામાં આવી હતી. તે પછી બાંધકામની મંજૂરી માટે જાડા દ્વારા જગ્યાના માલિકો પાસેથી ચાર્જ વસૂલાયો હતો પરંતુ ત્રણ મહિનાની સમય મર્યાદામાં બાંધકામની રજાચિઠ્ઠી નામંજૂર કરવાનો નિર્ણય ન કરાતા ડીમીંગ પ્રોવિઝન અનુસાર પ્રોવિઝનલ રજાચિઠ્ઠીનું બાંધકામ કરાવવામાં આવ્યું હતું.

આ માટે તે વખતના ટીપીઓ અજીતસિંહ ઝાલા, કલેકટર સંજય પ્રસાદ પાસેથી અભિપ્રાય લેવામાં આવ્યો હતો. ત્યારપછી કાયદા મુજબ એક મહિનાની નોટીસ આપવી ફરજિયાત હોવા છતાં નોટીસ આપ્યા વગર આ બાંધકામ બંધ કરવાની સૂચના અપાઈ હતી.

આ બાંધકામ દૂર કરવાનો પણ બંધારણીય ઠરાવ થયો ન હોવા છતાં અજીતસિંહ ઝાલાએ આઠ દિવસની નોટીસ આપી બીજા જ દિવસે રાત્રે પોલીસને સાથે રાખી ગોડાઉનનું બાંધકામ પાડી નાખ્યું હતું તેથી વર્ષ ૧૯૯૮માં અદાલતમાં ગુજરનાર કેશવજી શાહ, મણીબેન શાહના વારસ સુભાષ કેશવજી વગેરેએ દાવો કર્યાે હતો. તે દાવો વર્ષ ૨૦૧૮માં રદ્દ કરાયો હતો તેની સામે અપીલ કરવામાં આવી હતી. અપીલ ચાલી જતા અદાલતે તેને મંજૂર કરી પાડતોડનું થયેલુ રૂ.૮ લાખથી વધુનું નુકસાન છ ટકા વ્યાજ સાથે જાડાએ ચૂકવી આપવું તેમજ અજીતસિંહ ઝાલાની અંગત જવાબદારી ઠેરવી તે રકમ જાડાએ તેમની પાસેથી વસૂલવી તેવો હુકમ કર્યાે છે. વાદી તરફથી વકીલ ડી.બી. પંડયા, જી.ડી. પંડયા રોકાયા હતા.

જો આપને આ પોસ્ટ ગમી હોય તો શેર કરો...