અમેરિકાની અબ્બાસ પોર્ટ પર એરસ્ટ્રાઈકઃ ઈરાનનો અમેરિકન એરબેઝ પર જવાબી હુમલો

Author: નોબત સમાચાર

અમેરિકાની અબ્બાસ પોર્ટ પર એરસ્ટ્રાઈકઃ ઈરાનનો અમેરિકન એરબેઝ પર જવાબી હુમલો

સીઝ ફાયરની ઐસી તૈસીઃ પરસ્પર હુમલાથી વધતી તંગદિલી

વોશિંગ્ટન/ તહેરાન તા. ૨૮: અમેરિકા- ઈરાન વચ્ચે સીઝફાયર છતાં પરસ્પર હુમલા થતા તંગદીલી ફરીથી વધી રહી છે. અમેરિકાએ ઈરાનમાં ઘુસીને અબ્બાસ પોર્ટ પર હુમલો કરતા ઈરાને પણ અમેરિકન એરબેઝ પર જવાબી હુમલો કર્યો છે.

અમેરિકા અને ઈરાન વચ્ચે ચાલી રહેલી શાંતિ મંત્રણા સતત નિષ્ફળ જતી જોવા મળી રહી છે. આ તણાવ વચ્ચે ખાડી દેશોમાં યુદ્ધ જેવી સ્થિતિ સર્જાઈ છે.

ઈરાનની એરફોર્સ ઇસ્લામિક રિવોલ્યુશનરી ગાર્ડ કોર્પ્સ (આઈઆરજીસી) દ્વારા દાવો કરવામાં આવ્યો છે કે તેમણે બંદર અબ્બાસ પોઇન્ટ નજીક થયેલા હુમલાના જવાબમાં અમેરિકન એરબેઝ પર જવાબી હુમલો કર્યો છે.

બીજી તરફ, આ યુદ્ધની અસર પાડોશી દેશો પર પણ દેખાવા લાગી છે અને કુવૈતે પોતાની સરહદ તરફ આવતી મિસાઇલ અને ડ્રોનને હવામાં જ તોડી પાડવાની શરૂઆત કરી દીધી છે. મીડિયા રિપોર્ટ અનુસાર, ઈરાનના રિવોલ્યુશનરી ગાર્ડ્સે ગુરુવારે જણાવ્યું હતું કે સ્થાનિક સમય મુજબ સવારે ૪:૫૦ વાગ્યે તેમણે અમેરિકન એરબેઝને નિશાન બનાવીને મોટી જવાબી કાર્યવાહી કરી છે.

મીડિયા રિપોર્ટસ જણાવે છે કે, આ કાર્યવાહી અમેરિકા દ્વારા ઈરાનના વ્યૂહાત્મક રીતે મહત્ત્વના ગણાતા બંદર અબ્બાસ પોઇન્ટ નજીક કરવામાં આવેલા હુમલાના વિરોધમાં કરવામાં આવી છે.

જો કે, ઈરાને હજુ સુધી એ ખુલાસો નથી કર્યો કે તેમણે અમેરિકાના કયા સૈન્ય બેઝ પર આ મિસાઇલ દાગી છે. ઈરાની સેનાએ અમેરિકાને સીધી અને અત્યંત કડક શબ્દોમાં ચેતવણી આપી છે. ઈરાને સ્પષ્ટ કર્યું છે કે જો અમેરિકા દ્વારા આ પ્રકારના હુમલાનું પુનરાવર્તન કરવામાં આવશે, તો ઈરાન આનાથી પણ વધુ વિનાશક, નિર્ણાયક અને ઘાતક પ્રહાર કરશે. હવે પછીના કોઈપણ ગંભીર અને ભયાનક પરિણામો માટે માત્રને માત્ર હુમલો કરનાર દેશ (અમેરિકા) પોતે જ જવાબદાર રહેશે.

આ ભીષણ હુમલાઓની સીધી અસર હવે સમગ્ર મિડલ ઇસ્ટ અને પાડોશી દેશો પર સ્પષ્ટ દેખાઈ રહી છે. વિસ્તારમાં અચાનક વધેલા યુદ્ધના જોખમને જોતા કુવૈતના સંરક્ષણ મંત્રાલયે સત્તાવાર જાહેરાત કરી છે કે તેઓ પોતાની એરસ્પેસ તરફ આવી રહેલી શંકાસ્પદ મિસાઇલ અને યુએવી (ડ્રોન)ને રડાર દ્વારા ટ્રેક કરીને હવામાં જ નષ્ટ કરી રહૃાા છે, જેથી દેશની સુરક્ષા જળવાઈ રહે.

આ પહેલા મોડી રાત્રે અમેરિકાએ ઈરાનની સરહદની અંદર ઘૂસીને એક મોટા હવાઈ હુમલાને અંજામ આપ્યો હતો. અહેવાલો મુજબ, સ્થાનિક સમય અનુસાર રાત્રે આશરે ૧:૩૦ વાગ્યે ઈરાનના પ્રખ્યાત બંદર અબ્બાસ શહેરના પૂર્વીય ભાગમાં એક પછી એક ત્રણ પ્રચંડ ધડાકા સંભળાયા હતા, જેનાથી સમગ્ર વિસ્તાર ધ્રૂજી ઊઠ્યો હતો. સુત્રોએ ન્યૂઝ એજન્સીને જણાવ્યું હતું કે અમેરિકન સેનાએ રાત્રિ દરમિયાન ઈરાનમાં નવા સૈન્ય ઠેકાણાઓ પર હુમલા કર્યા છે. આ એવા ઠેકાણા હતા જે સ્ટ્રેટ ઓફ હોર્મુઝમાંથી પસાર થતી અમેરિકન સેના અને વૈશ્વિક કમર્શિયલ જહાજોની અવરજવર માટે મોટો ખતરો ઉભો કરી રહૃાા હતા. અમેરિકાએ સ્પષ્ટ કર્યું છે કે આ સમગ્ર ઓપરેશન માત્ર સેલ્ફ ડિફેન્સના ભાગરૂપે જ કરવામાં આવ્યું છે.

જો આપને આ પોસ્ટ ગમી હોય તો શેર કરો...