ધુંવાવ પાસે ફૂલસ્પીડમાં દોડી જતી મોટરે સર્જયો ગમખ્વાર અકસ્માતઃ બાઈકચાલક યુવાનનું મૃત્યુ

Author: નોબત સમાચાર

ધુંવાવ પાસે ફૂલસ્પીડમાં દોડી જતી મોટરે સર્જયો ગમખ્વાર અકસ્માતઃ બાઈકચાલક યુવાનનું મૃત્યુ

બાઈકની પાછળ બેસેલા બાળક સહિતના બે ઘવાયાઃ પોલીસ, ૧૦૮ દોડ્યાઃ

જામનગર તા. ૧૯: જામનગર-રાજકોટ માર્ગ પર ધુંવાવ ગામ પાસે આજે સવારે સર્જાયેલા પ્રાણઘાતક અકસ્માતમાં એક યુવાનનું મૃત્યુ નિપજ્યું છે. ફૂલસ્પીડમાં દોડી જતી ફોર્ચ્યુનર મોટરે સામેથી આવતા બાઈકને હડફેટે લેતા પરપ્રાંતીય શ્રમિકે મહામૂલી જિંદગી ગૂમાવી છે. તેની પાછળ બેસેલા બાળક સહિતના બે વ્યક્તિ ઘવાયા છે. બનાવની જાણ થતાં ૧૦૮ તથા પોલીસ ટીમ ધસી ગયા હતા.

જામનગર-રાજકોટ ધોરીમાર્ગ પર આવેલા ધુંવાવ ગામ પાસે આજે સવારે પુરપાટ ઝડપે પસાર થયેલી જીજે-૧૦ પાસીંગની એક ફોર્ચ્યુનર મોટરના ચાલકે સામેથી આવતા બાઈકને હડફેટે લેતા ગમખ્વાર અકસ્માત સર્જાયો હતો.

આ અકસ્માતમાં બાઈક પર જઈ રહેલા મનુભાઈ ડાવર નામના પરપ્રાંતીય યુવાનનું ગંભીર ઈજા થવાના કારણે ઘટનાસ્થળ પર જ મૃત્યુ નિપજ્યું હતું. આ યુવાનની પાછળ બેસેલા બારેક વર્ષનો તરૂણ તથા અન્ય એક યુવક પણ ઈજાગ્રસ્ત બન્યા છે.

અકસ્માતના પગલે મોટરસાયકલનો બૂકડો બોલી ગયો હતો. મોટરમાં પણ બાઈકની અથડામણથી નુકસાન થયું હતું. બનાવની જાણ થતાં પંચકોશી એ ડિવિઝન પોલીસ સ્ટેશનનો સ્ટાફ તથા ૧૦૮ ધસી ગયા હતા. એમ્બ્યુલન્સમાં બાળક સહિતના બે ઈજાગ્રસ્તને સારવાર માટે જામનગરની જી.જી. હોસ્પિટલમાં ખસેડવામાં આવ્યા છે. સ્થળ પરથી જાણવા મળ્યા મુજબ પોલીસે મોટરના ચાલકની અટકાયત કરી લીધી છે અને મોટર ઝબ્બે લીધી છે. મૃતદેહને પીએમ માટે ખસેડવામાં આવ્યો છે.

જો આપને આ પોસ્ટ ગમી હોય તો શેર કરો...