પુત્રના છૂટાછેડાથી ઉશ્કેરાયેલા શખ્સે મોટી માટલીના વૃદ્ધ પર કર્યાે હુમલો

Author: નોબત સમાચાર

પુત્રના છૂટાછેડાથી ઉશ્કેરાયેલા શખ્સે મોટી માટલીના વૃદ્ધ પર કર્યાે હુમલો

કાંટાની વાડના પ્રશ્ને લાલપુરમાં વૃદ્ધ પર પ્રહારઃ

જામનગર તા. ૨૫ઃ કાલાવડના મોટી માટલી ગામના એક શખ્સના પુત્રના છૂટાછેડા થયા પછી તે બાબતનું મનદુખ રાખી આ શખ્સ તથા તેના બે સાગરિતે ધોકા, લાકડી વડે હુમલો કરી એક વૃદ્ધને ફટકાર્યા હતા. જ્યારે કાંંટાની વાડ ખસેડવાના મુદ્દે લાલપુરમાં વૃદ્ધ પર ત્રણ પુત્ર-પિતાએ હુમલો કર્યાે હતો.

કાલાવડ તાલુકાના મોટી માટલી ગામમાં વસવાટ કરતા રાજેન્દ્રભાઈ કમાભાઈ ગુગડીયા નામના ૬૪ વર્ષના વૃદ્ધ શનિવારે સાંજે મોટી માટલીથી વરૃડી ગામના પાટિયા વચ્ચે હતા ત્યારે ત્યાં સફેદ રંગની ઈકો મોટરમાં ધસી આવેલા ગોવિંદ ભીખાભાઈ મકવાણા નામના મોટી માટલી ગામના શખ્સ તથા બે અજાણ્યા શખ્સે તેઓને રોકી લીધા હતા.

આ શખ્સોએ ધોકા અને લાકડીઓ વડે હુમલો કરી રાજેન્દ્રભાઈને માર માર્યાે હતો. ફ્રેક્ચર સહિતની ઈજા પામેલા આ વૃદ્ધને સારવારમાં ખસેડવામાં આવ્યા છે. તેઓએ ગઈકાલે કાલાવડ ગ્રામ્ય પોલીસ સ્ટેશનમાં ફરિયાદ નોંધાવી છે. જેમાં તેઓએ જણાવ્યા મુજબ ગોવિંદ મકવાણાના પુત્ર મુકેશના થોડા દિવસ પહેલાં છૂટાછેડા થયા હતા. તે બાબતનું મનદુખ રાખી આ શખ્સોએ રાજેન્દ્રભાઈ પર હુમલો કર્યાે હતો. પોલીસે આઈપીસી ૩૨૩, ૩૨૪, ૩૨૫, ૫૦૪, ૫૦૬ (ર), ૧૧૪, જીપી એક્ટની કલમ ૧૩૫ (૧) હેઠળ ગુન્હો નોંધ્યો છે. પોલીસે આરોપીઓની શોધ શરૃ કરી છે.

લાલપુર શહેરમાં ધરાર નગર નજીક વસવાટ કરતા મોતીભાઈ જુસબભાઈ ધુધા નામના વૃદ્ધ પર કાંટાની વાડ ખસેડવાના મુદ્દે ઝઘડો કરી નામોરી સુવાલીભાઈ ધુધા, જાવિદ નામોરીભાઈ, રહીમ નામોરીભાઈ ધુધાએ પાઈપ, ધોકાથી હુમલો કરી માર મારી જાનથી મારી નાખવાની ધમકી આપી હતી. મોતીભાઈએ પોલીસમાં ફરિયાદ કરી છે.

જો આપને આ પોસ્ટ ગમી હોય તો શેર કરો...