એબીવીપી દ્વારા જામનગર સહિત રાજ્યભરમાં ઠેર-ઠેર વિરોધ પ્રદર્શન

Author: નોબત સમાચાર

એબીવીપી દ્વારા જામનગર સહિત રાજ્યભરમાં ઠેર-ઠેર વિરોધ પ્રદર્શન

એસસી એસટી વર્ગના વિદ્યાર્થીઓની સ્કોલરશીપ લો કોલેજના મુદ્દે

જામનગર તા. ૧૩: રાજ્યના આદિવાસી વિકાસ મંત્રાલય દ્વારા મેનેજમેન્ટ ક્વોટા હેઠળના જનજાતિ વિદ્યાર્થીઓ માટે પોસ્ટ મેટ્રીક શિષ્યવૃત્તિ બંધ કરવાનો નિર્ણય લેવાયો છે. તેની સામે તથા ગ્રાન્ટેડ લો કોલેજમાં પ્રવેશ પ્રક્રિયા પુનઃ શરૂ કરવાની માંગ સાથે આજે રાજ્યભરમાં અને જામનગરમાં એબીવીપીના કાર્યક્રરો દ્વારા હોસ્પિટલમાં વિરોધ પ્રદર્શન કરવામાં આવ્યું હતું.

આદિવાસી વિકાસ મંત્રાલય દ્વારા તા. ૨૮-૧૦-૨૪ના જાહેર કરેલ પરિપત્ર મુખ્ય મેનેજમેન્ટ ક્વોટા હેઠળના જનજાતિ વિદ્યાર્થીઓ માટે પોસ્ટ મેટ્રીક શિષ્યવૃત્તિ બંધ કરવાનો નિર્ણય લેવાયો છે. જે રદ કરવામાં આવે તથા રાજ્યની ૨૮ ગ્રાન્ટેડ લો કોલેજના પ્રશ્ન વર્ષોથી પડતર છે. ધારાધોરણ મુજબ ગ્રાન્ટેડ કોલેજમાં પ્રાધ્યાપક નહીં હોવાથી તમામ કોલેજની માન્યતા રદ કરવામાં આવી છે.

ગત વર્ષ પણ ગ્રાન્ટેડ લો કોલેજમાં પ્રવેશ પ્રક્રિયા શરૂ કરવાની માંગણી એબીવીપી દ્વારા કરવામાં આવી છે. આ પ્રશ્નનું સત્વરે નિરાકરણ લાવવું જોઈએ તેમ એબીવીપીના પ્રદેશ મંત્રી સમર્થ ભટ્ટે જણાવ્યું છે.

આ મુદ્દે સમગ્ર રાજ્યમાં આજે આંદોલન-પ્રદર્શન કાર્યક્રમ યોજવામાં આવી રહ્યા છે.

જામનગરમાં પણ જી.જી. હોસ્પિટલ નજીક એબીવીપીના કાર્યકર્તાઓએ પરિપત્રની હોળી કરી હતી, સૂત્રોચ્ચાર કર્યા હતાં અને દેખાવો-પ્રદર્શન કર્યા હતું. આ સમયે પોલીસે તમામને તયાંથી દૂર ખસેડ્યા હતાં. કેટલાકની ટીંગાટોળી કરી હતી અને અટકાયત પણ કરી હતી.

જામનગર ઉપરાંત રાજકોટ, વડોદરા, સુરત સહિતના શહેરોમાં પણ ચક્કાજામ, વિરોધ પ્રદર્શનના કાર્યક્રમો કરવામાં આવ્યા હતાં. જેમાં અમુક સ્થળે એ.બી.વી.પી.ના કાર્યકર્તાઓ અને પોલીસ વચ્ચે ઝપાઝપીના દૃશ્યો પણ જોવા મળ્યા હતાં.

નગર ગેઈટ વિસ્તારમાં આ આંદોલનના કારણે ચક્કાજામની સ્થિતિ સર્જાઈ હતી. આખરે કાર્યક્રમ પૂર્ણ થયા પછી સ્થિતિ પૂર્વવત બની હતી.

દેવભૂમિ દ્વારકા જિલ્લાના ખંભાળિયામાં આ મુદે એ.બી.વી.પી.ના કાર્યકર્તાઓ દ્વારા વિરોધ પ્રદર્શન કરી સૂત્રોચ્ચાર કરવામાં આવ્યા હતાં.

જો આપને આ પોસ્ટ ગમી હોય તો શેર કરો...