જામનગરની સરકારી કચેરીઓમાં હેલ્મેટ વગર આવતા કર્મીઓ સામે ઝંંુબેશ યથાવત

Author: નોબત સમાચાર

જામનગરની સરકારી કચેરીઓમાં હેલ્મેટ વગર આવતા કર્મીઓ સામે ઝંંુબેશ યથાવત

બે દિવસમાં ૯૯ વીજકર્મી પણ દંડાયાઃ

જામનગર તા.૧૩ : જામનગર ઉપરાંત રાજ્યભરમાં આવેલી સરકારી કચેરીઓની બહાર ટ્રાફિક પોલીસ દ્વારા હેલ્મેટ ડ્રાઈવનો મંગળવારથી પ્રારંભ કરાયા પછી આજે સતત ત્રીજા દિવસે આ ડ્રાઈવ યથાવત રાખવામાં આવી છે. આજે પણ જામ્યુકોની કચેરીએ ફરજ પર આવી રહેલા ૩ર ટુ વ્હીલરચાલકો સામે દંડાત્મક કાર્યવાહી કરાઈ છે. ગઈકાલે તથા પરમદિવસે વીજ કંપનીના કર્મચારીઓ સામે પણ કાર્યવાહી કરાઈ હતી.

રાજ્યના મુખ્ય પોલીસવડા વિકાસ સહાયે રાજ્યભરની તમામ સરકારી કચેરીઓમાં ફરજ પર આવી રહેલા સરકારી કર્મચારીઓ ટુ વ્હીલર પર આવતી વખતે હેલ્મેટ પહેરીને ન આવે તો તેઓની સામે કાયદા મુજબ કાર્યવાહી કરવા કરેલા આદેશ પછી મંગળવારે સવાર થી રાજ્યભરની સરકારી કચેરી બહાર ટ્રાફિક પોલીસનો કાફલો ખડકાયો હતો.

મંગળવારે જામનગરમાં તે કાર્યવાહી અંતર્ગત કલેક્ટર કચેરી, પીજીવીસીએલ કચેરી સહિતની કચેરીઓની બહાર ટ્રાફિક ઝુંબેશ શરૂ કરી દેવાઈ હતી. તેમાં પરમદિવસે ૫૩ કર્મચારી પાસેથી હેલ્મેટ ન પહેરવા અંગે હાજર દંડ વસૂલાયા પછી ગઈકાલે પણ સાતરસ્તા તથા લાલબંગલા નજીકની પીજીવીસીએલ કચેરી પાસેથી ૪૬ કર્મચારીને હેલ્મેટ વગર પકડી લેવામાં આવ્યા હતા અને હાજર દંડ વસૂલાયો હતો. તે ઉપરાંત જામનગર મહાનગરપાલિકાની કચેરીમાં હેલ્મેટ પહેર્યા વગર પ્રવેશેલા ૩૨ ટુ વ્હીલર ચાલકો-સરકારી કર્મચારી સામે પણ દંડાત્મક કાર્યવાહી કરાઈ હતી.

જો આપને આ પોસ્ટ ગમી હોય તો શેર કરો...