બાઈકમાં નુકસાન કર્યાની શંકાથી પ્રૌઢ પર પાડોશી દ્વારા કરાયો પ્રહાર

Author: નોબત સમાચાર

બાઈકમાં નુકસાન કર્યાની શંકાથી પ્રૌઢ પર પાડોશી દ્વારા કરાયો પ્રહાર

પત્નીને તેડવા આવેલા યુવાનને ધોકાવી નખાયોઃ

જામનગર તા. ૨૦: જામનગરના ભંગાર બજાર રોડ પર ગાજરફળીમાં પાડોશી પર એક શખ્સે હુમલો કરી ગાળો ભાંડ્યા પછી મારી નાખવાની ધમકી આપી હતી. જયારે કલ્યાણપુરના ગોરાણા ગામમાં પત્નીને રિસામણેથી તેડી જવા આવેલા પોરબંદર જિલ્લાના યુવાનને સસરા, સાળાએ લાકડી, કુહાડીથી માર માર્યાે હતો.

જામનગરના ભંગાર બજાર રોડ પર રામ કૂવા સામે આવેલી ગાજર ફળીમાં રહેતા કમલેશભાઈ મનસુખભાઈ બગલ નામના સોની પ્રૌઢને રવિવારની રાત્રે ગાજરફળીમાં જ રહેતા ઉત્સવ દવે નામના શખ્સે ગાળો ભાંડી ઢીકાપાટુ વડે માર મારી જાનથી મારી નાખવાની ધમકી આપ્યાની ફરિયાદ કરાઈ છે.

ફરિયાદમાં જણાવાયા મુજબ ઉત્સવના બાઈકમાં કોઈ શખ્સે નુકસાન કર્યું હતું. તે કૃત્ય કમલેશભાઈએ કર્યું હોવાનું માની ઉત્સવે હુમલો કર્યાે હતો. પોલીસે ગુન્હો નોંધી તપાસ હાથ ધરી છે.

દેવભૂમિ દ્વારકા જિલ્લાના કલ્યાણપુર તાલુકાના ગોરાણા ગામમાં રવિવારે બપોરે પોરબંદરના મોઢવાડા ગામના નાગાજણભાઈ બાબુભાઈ મોઢવાડીયા પર કુહાડી, લાકડીથી સવદાસ પરબત ગોરાણીયા અને રાજુ સવદાસ ગોરાણીયા નામના પિતા-પુત્રે હુમલો કરી માર માર્યાે હતો.

નાગાજણભાઈના પત્ની થોડા દિવસથી માવતરે ગોરાણા ગામ રિસામણે ચાલી આવ્યા હતા. તેને પરત તેડી જવા માટે આવેલા નાગાજણ ભાઈને પિતા-પુત્રએ માર મારી ઈજા પહોંચાડી હતી.

જો આપને આ પોસ્ટ ગમી હોય તો શેર કરો...