રક્તપિતની બીમારી તથા સંતાન ન હોવાની ચિંતામાં ગલ્લા ગામમાં શ્રમિકે કરી આત્મહત્યા

Author: નોબત સમાચાર

રક્તપિતની બીમારી તથા સંતાન ન હોવાની ચિંતામાં ગલ્લા ગામમાં શ્રમિકે કરી આત્મહત્યા

અન્ય સાથે વાત કરતી હોવાની પતિની શંકાથી પત્નીએ ખાઈ લીધો ગળાટૂંપોઃ

જામનગર તા. ૧૯ઃ લાલપુર તાલુકાના ગલ્લા ગામમાં રહેતા એક દેવીપૂજક યુવાને પોતાની રક્તપિતની બીારી અને નિઃસંતાનપણાની ચિંતાના કારણે ગઈકાલે ગળાફાંસો ખાઈ જિંદગીનો અંત આણ્યો છે. જ્યારે જામનગર તાલુકાના ઢંઢા ગામમાં એક શ્રમિકે પોતાના પત્નીને મોબાઈલ પર કોની સાથે વાત કરશ તેમ પૂછતા માઠું લાગી આવવાથી આ પરિણીતાએ ગળાટૂંપો ખાઈ આત્મહત્યા કરી છે.

લાલપુર તાલુકાના ગલ્લા ગામના વાડી વિસ્તારમાં આવેલા શક્તિસિંહ નામના ખેડૂત ખેતરમાં મજૂરીકામ કરતા હીરેનભાઈ નથુભાઈ સાડમીયા નામના ૩૩ વર્ષના દેવીપૂજક યુવાને બુધવારે રાત્રે ખેતરમાં જ આવેલા લીમડાના ઝાડ પર દોરડું બાંધી ગળાટૂંપો ખાઈ લીધો હતો. જેની ગઈકાલે સવારે અન્ય વ્યક્તિઓને જાણ થઈ હતી.

આ બનાવની પોલીસને જાણ કરાતા લાલપુર પોલીસ મથકનો સ્ટાફ દોડી ગયો હતો. પોલીસે તેને ઉતારી આ યુવાનને ચકાસતા તેઓ મૃત્યુ પામેલા જણાઈ આવ્યા હતા. પોલીસે મૃતદેહનો કબજો સંભાળી મૃતકના નાનાભાઈ સંજય સાડમીયાનું નિવેદન નોંધ્યું છે. જેમાં તેઓએ જણાવ્યા મુજબ હીરેનભાઈના દસેક વર્ષ પહેલા લગ્ન થયા હતા. તે પછી તેઓને સંતાનની પ્રાપ્તિ થઈ ન હતી અને તે દરમિયાન રક્તપિતની બીમારી વળગી જતાં હીરેનભાઈ સારવાર મેળવતા હતા. પોતાની બીમારી અને નિઃસંતાનપણાના કારણે સતત ચિંતા અનુભવતા હીરેનભાઈએ ઉપરોક્ત ખેતર ભાગમાં વાવવા માટે રાખ્યા પછી બુધવારે રાત્રે ઝાડની ડાળીમાં દોરડું બાંધી આત્મહત્યા કરી લીધી છે. પોલીસે નિવેદનની નોંધ કરી તપાસ હાથ ધરી છે.

જામનગર તાલુકાના ઢંઢા ગામમાં આવેલા સંજયભાઈ જમનભાઈ પાંભર નામના ખેડૂતના ખેતરમાં મજૂરીકામ માટે આવીને રહેતા મૂળ મધ્યપ્રદેશના અલીરાજપુર જિલ્લાના ઘોઘશા ગામના વતની ભીખલાભાઈ ગુજલા ભાઈ ભીંડે નામના શ્રમિકના પત્ની શબરીબેન (ઉ.વ.૨૯)એ ગઈકાલે બપોરે જાંબુના ઝાડમાં દુપટ્ટા વડે ગળાફાંસો ખાઈ લીધો હતો.

તેની જાણ થતાં પતિ ભીખલાભાઈએ નીચે ઉતારી પત્નીને તપાસતા તેણી મૃત્યુ પામેલા જણાઈ આવ્યા હતા. બનાવની પોલીસને જાણ કરવામાં આવી છે. પંચકોશી-બી ડિવિઝન પોલીસે મૃતદેહને પી.એમ. માટે ખસેડી પતિનું નિવેદન નોંધ્યું છે. જેમાં તેઓએ જણાવ્યા મુજબ શબરીબેન મોબાઈલ પર અવારનવાર વાતો કરતા જોવા મળ્યા હતા. આથી પતિએ તું અન્ય વ્યક્તિ સાથે વાત કરે છે તેમ પૂછતા માઠંુ લાગી આવવાથી શબરીબેને ગળાફાંસો ખાઈ લીધો છે. પોલીસે અપમૃત્યુની નોંધ કરી તપાસ આરંભી છે.

જો આપને આ પોસ્ટ ગમી હોય તો શેર કરો...