દ્વારકા ધોરીમાર્ગ પર અકસ્માતગ્રસ્ત પ્રૌઢને ટ્રાફિક શાખાએ પૂરી પાડી મદદ

Author: નોબત સમાચાર

દ્વારકા ધોરીમાર્ગ પર અકસ્માતગ્રસ્ત પ્રૌઢને ટ્રાફિક શાખાએ પૂરી પાડી મદદ

લીમડી પાસે ઓવરબ્રિજ પર ટોળુ જોઈ પોલીસ રોકાઈઃ

ખંભાળિયા તા. ૨૨: ખંભાળિયા-દ્વારકા ધોરીમાર્ગ પર લીમડી ઓવરબ્રિજ પાસે ગઈકાલે એક પ્રૌઢને અકસ્માત પડ્યો હતો. આ વેળાએ જ ત્યાં આવી ગયેલી ટ્રાફિક શાખાની જીપમાં આ ઈજા ગ્રસ્તને સારવાર માટે ખસેડી પોલીસે માનવતાપૂર્ણ કામગીરી બજાવી હતી.

ખંભાળિયાથી દ્વારકા વચ્ચેના ધોરીમાર્ગ ૫ર કાલે દ્વારકા જિલ્લા ટ્રાફિક શાખાના પીએસઆઈ વી.એમ. સોલંકી તથા સ્ટાફ દ્વારા પેટ્રોલિંગ કરવામાં આવતું હતું. ત્યારે લીમડી નજીકના ઓવરબ્રિજ પર ટોળુ જોવા મળ્યું હતું.

તે સ્થળે ટ્રાફિક શાખાની વાન રોકાવી પોલીસે પૂછપરછ કરતા લીમડીના રહેવાસી રમેશભાઈ અરજણભાઈ કણઝારીયા નામના પ્રૌઢ ઈજા ગ્રસ્ત હાલતમાં જોવા મળ્યા હતા. તેઓને ટ્રેક્ટર સાથે અકસ્માતમાં ઈજા થઈ હતી. આ ઈજાગ્રસ્તને એમ્બ્યુલન્સ આવે તે પહેલાં સારવાર માટે હોસ્પિટલ પહોંચાડવા ટ્રાફિક પોલીસે તજવીજ કરી હતી.

પોલીસ વાનમાં તેઓને રખાવી ખંભાળિયા ખસેડાતા હતા ત્યારે માર્ગમાં એમ્બ્યુલન્સ મળી હતી. જેમાં પ્રૌઢને સીફ્ટ કરવામાં આવ્યા હતા. તાકીદે હોસ્પિટલ પહોંચેલા આ પ્રૌઢને તબીબોએ સારવાર આપી છે.

જો આપને આ પોસ્ટ ગમી હોય તો શેર કરો...