ધોરીમાર્ગ પર સૂતા સૂતા બાઈક ચલાવી સ્ટંટ કરતા પાંચ નબીરાની કરાઈ ધરપકડ

Author: નોબત સમાચાર

ધોરીમાર્ગ પર સૂતા સૂતા બાઈક ચલાવી સ્ટંટ કરતા પાંચ નબીરાની કરાઈ ધરપકડ

હજુ ત્રણ શખ્સની કરાઈ રહી છે શોધખોળઃ

જામનગર તા. ૨૨: જામનગરના ખીજડીયા બાયપાસથી ફલ્લા વચ્ચે શનિવારે રાત્રે સૂતા સૂતા બાઈક ચલાવવાની રેસ લગાવતા પાંચ સ્ટંટબાજને પોલીસે પકડી પાડ્યા છે અને તેના બાઈક ડીટેઈન કરી લીધા છે. જ્યારે હજુ ત્રણના નામ પોલીસ સમક્ષ ખૂલ્યા છે. આ રેસમાં નગરના એક યુવાનને ટ્રકની પાછળ ઘૂસી જવાથી ગંભીર ઈજા થઈ હતી. તે પછી પોલીસે કાર્યવાહી આરંભી છે.

જામનગર-રાજકોટ રોડ પર ખીજડીયા બાયપાસ પાસે શનિવારે મોડીરાત્રે સૂતા સૂતા બાઈક ચલાવી રોડ પર સ્ટંટ કરતા શખ્સો સામે પોલીસે ગુન્હો નોંધવાનું શરૂ કર્યું છે. શનિવારની રાત્રે એક યુવાન આગળ જતાં ટ્રકની પાછળ ટકરાઈ પડતા ગંભીર રીતે ઘવાયો હતો. તે પછી આ યુવાનની સાથે રહેલા તેના મિત્રો અને સાથે રેસ લગાવનાર શખ્સો સામે કડક કાયદાકીય કાર્યવાહી આરંભાઈ છે.

ગઈકાલે પોલીસે જામનગરના ચેતન પાડલીયા, યાસીન કરીમ બાબવાણી, ચિરાગ પાડલીયા, મયુર મકવાણા, મુસ્તુફા આમદ મુસાણી નામના પાંચ શખ્સને ગઈકાલે બીએનએસની કલમ ૨૮૧ તથા એમવી એક્ટની કલમ ૧૮૩, ૧૮૪, ૧૮૯ હેઠળ પકડી લેવામાં આવ્યા છે આ પાંચેય શખ્સના બાઈક પોલીસે ડીટેઈન કર્યા છે અને બેડીના ફરીદ અબ્બાસ ભડાલા, ખોડિયારકોલોની વાળા સુમિત શામજી સરવૈયા તથા ખડખડનગરમાં રહેતા જયેશ અશોક ગુજરાતીની શોધખોળ કરાઈ રહી છે.

જો આપને આ પોસ્ટ ગમી હોય તો શેર કરો...