એડવેન્ચર ટુર....

Author: નોબત સમાચાર

એડવેન્ચર ટુર....

આ વર્ષે ઉનાળો ખૂબ જ આકરો છે. ઉનાળાના આ શરૂઆતના દિવસોમાં જ થર્મોમીટરનો પારો ૪૪-૪૫ ડિગ્રીએ પહોંચવા લાગ્યો છે. હવે આ ગરમી પણ આપણાથી સહન નથી થતી, ત્યાં આપણને વધુ ડરાવવા માટે અંબાલાલ પટેલની નવી આગાહી છાપાના પ્રથમ પાને દર્શન દે છે કે, *આ વર્ષે ઉનાળામાં હજુ પણ વધારે ગરમી પડશે...*

સવારે તળાવની પાળે મોર્નિંગ કરતા કરતા આ ગરમીની વાત નીકળી તો ડોક્ટર રાજને કહ્યું, *આ ગરમી તો આપણી પૃથ્વી પર વધતા જતા ગ્લોબલ વોર્મિંગના કારણે વધી છે...*

*બિલકુલ ખોટી વાત છે..* નટુ આમાં પણ આડો ફાટ્યો. નટુની ફાલતુ દલિલથી ડોકટર રાજનને ખોટું લાગ્યું અને એ નખશિખ સજ્જન માણસ મૌન થઈ ગયા.

પછી તો લાલાએ મોરચો સાંભળ્યો અને પૂછ્યું, *તો પછી નટુ, તું જ કહેને, શાને કારણે ગરમી વધારે પડે છે ?*

*અંબાલાલ પટેલને કારણે...!* નટુ ઉવાચ. *આ અંબાલાલ પટેલ ગરમી વધવાની આગાહી કરે છે ને પછી જ ગરમીનો પારો ઊંચો જાય છે..!*

આ વધતી જતી ગરમીથી બચવા માટે અમે દર વર્ષે ઉનાળામાં ફોરેનની ટૂરનું પ્લાનિંગ કરીએ છીએ. આ વર્ષે પણ પ્લાનિંગ કરેલું અમેરિકાની ટૂરનું. આ વર્ષની અમારી ટુર અમે કેન્સલ કરી ટ્રમ્પના ટેરિફ ટેરરના કારણે -- બાકી તો અમે દર વર્ષે અમારી ટુર કેન્સલ કરીએ છીએ બજેટના પ્રોબ્લેમને કારણે.

અમેરિકાની આ ટૂર કેન્સલ તો કરી, પણ હવે ગરમીથી બચવા જવું ક્યાં ? ફરી એકવાર લાલો મદદે આવ્યો. લાલાએ એક તોફાની સૂચન કર્યું, *ચાલો આપણે એક એડવેન્ચર ટૂર કરી આવીએ..*

*આપણે અહીં રોજ શહેરમાં ફરીએ છીએ તે પણ એક એડવેન્ચર ટુર જ છે ને ? જો ચાલીને ફરવા જઈએ તો રખડતા ઢોરથી બચવાનું, આડેધડ અને ફૂલ સ્પીડે આવતા વાહનોથી બચવાનું...* નટુએ શહેરના એડવેન્ચર ગણાવ્યા.

*અને વાહનમાં ફરીએ તો..?*લાલાએ પૂછ્યું.

*.....તો પછી આપણા જ તારણહાર એવા ટ્રાફિક પોલીસથી બચવાનું...!* નટુએ પોતાની વાત પૂરી કરી.

ટૂંકી ચર્ચાને અંતે સહુએ એક હિલ સ્ટેશન પર જવાનું નક્કી કર્યું, અને પછી માઉન્ટ આબુ જવા નીકળ્યા. પહાડો પર ફરવાની ત્યાં સુધી જ મજા આવે છે જ્યાં સુધી આપણી ગાડીમાં પેટ્રોલ હોય... માઉન્ટ આબુ પહોંચતા પહેલા જ અમારી ગાડીમાં પેટ્રોલ ખલાસ થઈ ગયું અને અમને એડવેન્ચર ટ્રેકિંગનો પહેલો અનુભવ થયો.

હવે પ્રશ્ન એ ઉભો થયો કે હાલીને પેટ્રોલ લેવા કોણ જાય ? અમે ચારે મિત્રોએ એકબીજાની સામે જોયું અને શાનમાં જ સમજી ગયા કે કોઈને આ પેટ્રોલ માટેની પદયાત્રા કરવાની ઈચ્છા નથી. પછી તો અમે ત્યાં બાજુમાં જ ઝુંપડીમાં મળતું ડબલ ભાવનું પેટ્રોલ ગાડીમાં પુરાવ્યૂ અને માઉન્ટ આબુ પહોંચ્યા.

અમે હોટલ પહોંચ્યા અને સૌથી પ્રથમ તો ત્યાંના ટુરિસ્ટ ગાઈડને મળ્યા, અને પૂછ્યું, *અહીં પહાડો પર ફરવા માટે સારો ટ્રેક ક્યો ?*

અહીં ફરવા માટે બે ટ્રેક ખૂબ જ સારા છે, એક છે એકદમ સરળ. જ્યારે બીજો ટ્રેક છે એડવેન્ચરસ. જો આ બીજા ટ્રેક પર તમે ફરશો તો ત્યાંનું સૌંદર્ય જોઈને તમે પાગલ થઈ જશો...!

આ પાગલ થવાની વાત સાંભળતા જ ડોક્ટર રાજનના કાન ચમક્યા. તેણે અમને ઈકિયાટ્રીસ્ટની ટ્રીટમેન્ટના ભાવ કહ્યા. તેણે કહેલા ટ્રીટમેન્ટના ભાવ સાંભળીને પાગલ થવાનો -- એટલે કે એડવેન્ચર ટ્રેકિંગ કરવાનો કાર્યક્રમ આવતા વર્ષ પર મુલતવી રાખ્યો, અને સરળ ટ્રેક પર આબુ દર્શન કરીને અમારી ટૂર પૂરી કરી.

વિદાય વેળાએ : આપણે વર્ષોથી એક વાતનો અનુભવ કર્યો છે કે જો વકતા કંટાળાજનક હોય તો પહેલા તાળીઓ વહેલી પાડતા - એકદમ પાડતા, કે જેથી વક્તા શાનમાં સમજી જાય અને બેસી જાય.

જ્યારે હવે તો એક વધારાની સગવડ આપણને મળી છે -- મોબાઇલમાં મંડી પડવાનું...

જો આપને આ પોસ્ટ ગમી હોય તો શેર કરો...