ધ્રોલ નજીક ધ્રાંગડા પાસેથી મોટરમાં કલ્યાણપુર લઈ જવાતી ઈંગ્લીશ દારૂની ૫૨૮ બોટલ સાથે ખંભાળિયાના શખ્સની અટક

Author: નોબત સમાચાર

ધ્રોલ નજીક ધ્રાંગડા પાસેથી મોટરમાં કલ્યાણપુર લઈ જવાતી ઈંગ્લીશ દારૂની ૫૨૮ બોટલ સાથે ખંભાળિયાના શખ્સની અટક

રૂા.૪,૮૯,૩૦૦નો મુદ્દામાલ કબજેઃ સપ્લાયરનું નામ ઓકાવાયું:

જામનગર તા. ૬: જામનગર-રાજકોટ રોડ પર ધ્રોલ પાસેના ધ્રાંગડા ગામ પાસેથી ગઈકાલે એલસીબીએ એક મોટરમાં લઈ જવાતો અંગ્રેજી શરાબનો ૫૨૮ નાની મોટી બોટલનો જથ્થો પકડી પાડ્યો છે. આ જથ્થા સાથે ઝડપાયેલા ખંભાળિયાના શખ્સે મહેસાણાના બહુચરાજીમાંથી દારૂ ભરી આપનાર અને કલ્યાણપુરના નાવદ્રામાં દારૂ મંગાવનાર શખ્સના નામ આપ્યા છે. કુલ રૂા.૪,૮૯,૩૦૦નો મુદ્દામાલ કબજે કરવામાં આવ્યો છે.

જામનગર-રાજકોટ હાઈવે પર આવેલા ધ્રોલ નજીકના ધ્રાંગડા ગામ પાસે એક મોટરમાં ઈંગ્લીશ દારૂની હેરાફેરી થઈ રહી હોવાની બાતમી એલસીબીના મયુરસિંહ, યુવરાજસિંહ, ઋષિરાજસિહને મળતા પીઆઈ વી.એમ. લગારીયાને વાકેફ કરાયા પછી ગઈકાલે બપોરે એલસીબી સ્ટાફે પીએસઆઈ સી.એમ. કાંટેલીયા, પીઆઈ મોરીના વડપણ હેઠળ વોચ રાખી હતી.

તે દરમિયાન ધ્રાંગડા ગામના પાટીયા પાસેથી પસાર થયેલી જીજે-૩-ડીએન ૯૪૦૦ નંબરની ફોર્ડ કંપનીની ફીગો મોટરને રોકી લેવામાં આવી હતી. તે મોટરની તલાશી લેવાતા તેમાંથી ભારતીય બનાવટના અંગ્રેજી શરાબની જુદી જુદી બ્રાંડની ૫૨૮ બોટલ સાથે ખંભાળિયા શહેરમાં રહેતો રવિરાજસિંહ સદુભા જાડેજા નામનો શખ્સ મળી આવ્યો હતો.

આ શખ્સની પૂછપરછ કરાતા તેણે મહેસાણા જિલ્લાના બહુચરાજીમાંથી ચંદ્રસિંહ સોલંકી પાસેથી દારૂનો જથ્થો મેળવ્યાની અને દેવભૂમિ દ્વારકા જિલ્લાના કલ્યાણપુર તાલુકાના નાવદ્રા ગામના નારણ આલાભાઈ ડેર નામના શખ્સે આ જથ્થો મંગાવ્યાની કબૂલાત આપી છે. દારૂનો જથ્થો, એક મોબાઈલ, રૂા.૩ લાખની મોટર મળી કુલ રૂા.૪,૮૯,૩૦૦નો મુદ્દામાલ કબજે કરી એલસીબીએ ધ્રોલ પોલીસ મથકમાં ત્રણેય શખ્સ સામે ગુન્હો રજીસ્ટર કરાવ્યો છે.

જો આપને આ પોસ્ટ ગમી હોય તો શેર કરો...