પુત્રના અવસાન પછી એકલવાયુ જીવન જીવતા પ્રૌઢે કરી લીધી આત્મહત્યાઃ અરેરાટી

Author: નોબત સમાચાર

પુત્રના અવસાન પછી એકલવાયુ જીવન જીવતા પ્રૌઢે કરી લીધી આત્મહત્યાઃ અરેરાટી

વાડીનાર પોલીસે બનાવની તપાસ આદરીઃ

જામનગર તા.૧૧ : ખંભાળિયા તાલુકાના ભરાણા ગામના એક પ્રૌઢે ગઈકાલે પોતાના ખેતર સ્થિત ઓરડામાં જઈ ગળાટૂંપો ખાઈ આત્મહત્યા કરી લીધી છે. તેઓના પુત્રનું એકાદ વર્ષ પહેલાં અવસાન થયું હતું. તે પછી સતત ટેન્શનમાં રહેતા આ પ્રૌઢે આત્મહત્યા વ્હોરી હોવાનું તેઓના નાના ભાઈએ પોલીસ સમક્ષ જાહેર કર્યું છે. દેવભૂમિ દ્વારકા જિલ્લાના ખંભાળિયા તાલુકાના ભરાણા ગામમાં રહેતા ભગુભા જીવુભા જાડેજા નામના પ્રૌઢે ગઈકાલે સવારે સાતેક વાગ્યા પહેલાં પોતાના ભરાણા ગામની સીમ સ્થિત ખેતરમાં જઈ ત્યાં આવેલા ઓરડામાં રહેલી આડીમાં ગળાફાંસો ખાઈ જીવતર ટૂંકાવી લીધુ છે.

આ બનાવની જાણ થતાં તેમના નાનાભાઈ પ્રભાતસિંહ જીવુભા જાડેજાએ પોલીસને વાકેફ કરી હતી. દોડી આવેલી વાડીનાર પોલીસે મૃતદેહનો કબજો સંભાળી પ્રભાતસિંહનું નિવેદન નોંધ્યું છે.

તેમાં જણાવવામાં આવ્યા મુજબ એકાદ વર્ષ પહેલાં ભગુભાનો પુત્ર અવસાન પામ્યો હતો. ત્યારપછી એકલવાયુ જીવન જીવતા ભગુભા હંમેશા તણાવ અનુભવતા રહેતા હતા. તે દરમિયાન ગઈકાલે સવારે આ પ્રૌઢે આત્મઘાતી પગલું ભરી લીધુ છે. પોલીસે તપાસ હાથ ધરી છે.

જો આપને આ પોસ્ટ ગમી હોય તો શેર કરો...