શ્રીલંકામાં વિનાશ વેર્યા પછી 'દિતવાહ' ચક્રવાત ભારત ભણીઃ પાંચ રાજ્યોમાં એલર્ટ

Author: નોબત સમાચાર

શ્રીલંકામાં વિનાશ વેર્યા પછી 'દિતવાહ' ચક્રવાત ભારત ભણીઃ પાંચ રાજ્યોમાં એલર્ટ

ભયંકર પવનો ફૂંકાતા પૂર, ભૂસ્ખલનના કારણે ૯૦ થી વધુ લોકોના શ્રીલંકામાં જીવ લીધાઃ

નવી દિલ્હી તા. ર૯: શ્રીલંકામાં જાનમાલની હાનિ સાથે વિનાશ વેર્યા પછી દિતવાહ ચક્રવાત ભારત ભણી ફંટાતા પાંચ રાજ્યોમાં એલર્ટ અપાયું છે અને તાલીમનાડુમાં રાહત-બચાવની તર્યારીઓ સાથે ટીમો તૈનાત કરાઈ છે.

બંગાળની ખાડીમાં સર્જાયેલી અશાંતિને પગલે ચક્રવાત સેન્યાર પછી હવે શક્તિશાળી ચક્રાવત 'હિતવાહ' દક્ષિણ ભારત તરફ આગળ વધી રહ્યું છે. છેલ્લા ર૪ થી ૪૮ કલાકમાં શ્રીલંકામાં ભારે તબાહી મચાવ્યા પછી આ વાવાઝોડું ભારત તરફ નજીક પહોંચી ગયું છે.

આ ચક્રવાતી વાવાઝોડાએ પાડોશી દેશ શ્રીલંકામાં ભારે વિનાશ કર્યો છે. ત્યાં પૂર અને ભૂસ્ખલનને કારણે અત્યાર સુધીમાં ૯૦ થી વધુ લોકોના મોત થયા છે અને મોટા પાયે જાનમાલનું નુક્સાન થયું છે. શ્રીલંકાની ગંભીર પરિસ્થિતિને ધ્યાનમાં લઈને ભારતે તાત્કાલિક 'ઓપરેશન સાગર બંધુ' હેઠળ મદદ મોકલવાનું શરૂ કરી દીધું છે. રાહત સામગ્રીની પ્રથમ ખેપ આઈએનએસ વિક્રાંત અને આઈએનએસ ઉદયગિરીના માધ્યમથી શ્રીલંકા મોકલવામાં આવી છે.

વડાપ્રધાન મોદીએ વાવાઝોડાથી થયેલા વિનાશ પર દુઃખ વ્યક્ત કરતા કહ્યું કે, 'હું તમામ પ્રભાવિત પરિવારોને સાંત્વના પાઠવું છું તથા તેમની સુરક્ષા માટે પ્રાર્થના કરૂ છું. પડોશી દેશ પ્રત્યે એક્તાની ભાવના રાખી ભારતે ઓપરેશન સાગરબંધુ હેઠળ તાત્કાલિક સાગર સામગ્રી અને માનવીય સહાય પાઠવી છે. સ્થિતિ અનુસાર વધુ મદદ માટે પણ અમે તૈયાર છીએ.' આ સિવાય ભારતના વિદેશમંત્રી જયશંકરે જણાવ્યું છે આઈએનએસ વિક્રાંત અને આઈએનએસ ઉદયગીરીની મદદથી કોલંબોમાં રાહત સામગ્રી મોકલવામાં આવી છે.

દિતવાહ વાવાઝોડું શ્રીલંકા પછી દક્ષિણ ભારત તરફ આગળ વધવાની શક્યતા છે. એવામાં આગામી ત્રણ દિવસ તમિલનાડુ અને આંધ્રપ્રેશમાં ભારેથી અતિભારે વરસાદની આગાહી વ્યક્ત કરવામાં આવી છે.

ભારતીય હવામાન વિભાગ દ્વારા ચક્રવાતી વાવાઝોડું 'દિતવાહ'ને લઈને તમિલનાડુના કડ્ડુલોર જિલ્લા માટે અત્યંત ભારે વરસાદની ચેતવણી જાહેર કરવામાં આવી છે. આ ગંભીર પરિસ્થિતિને ધ્યાનમાં રાખીને જિલ્લા વહીવટી તંત્ર સંપૂર્ણપણે સતર્ક થઈ ગયું છે.

કડ્ડુલોરના જિલ્લા કલેક્ટર સિબી આધિન્ય સેન્થિલ કુમારે માહિતી આપી કે, 'જિલ્લામાં રર અતિ સંવેદનશીલ અને ૩૯ ઉચ્ચ સવંદનેશીલ વિસ્તારોની ઓળખ કરવામાં આવી છે, જે વિસ્તારોમાં સામાન્ય રીતે પાણી ભરાવાની સમસ્યા રહે છે. તંત્રએ આ વિસ્તારોમાં પાણીનો તાત્કાલિક નિકાલ કરવા માટે મોટર સહિતના જરૂરી ઉપકરણો અને કર્મચારીઓને અગાઉથી તૈનાત કરી દીધા છે. ઉપરાંત, લોકોને સુરક્ષિત આશ્રય આપવા અને ભોજન-પાણીની સુવિધા પૂરી પાડવા માટે ર૩૩ રાહત શિબિરો પણ તૈયાર કરવામાં આવ્યા છે.'

જો આપને આ પોસ્ટ ગમી હોય તો શેર કરો...