માતાએ કરેલી ફરિયાદનો ખાર રાખી એક શખ્સે યુવતીનો પીછો કરી ઈશારા કર્યા

Author: નોબત સમાચાર

માતાએ કરેલી ફરિયાદનો ખાર રાખી એક શખ્સે યુવતીનો પીછો કરી ઈશારા કર્યા

અવારનવાર ઘર પાસે આંટા પણ મારતો હોવાની રાવઃ

જામનગર તા. ૨૯: જામનગરના કિસાન ચોક વિસ્તાર પાસે વસવાટ કરતી એક યુવતી ગઈકાલે તેના પિતા સાથે જતી હતી ત્યારે તેની પાછળ જઈ એક શખ્સે ઈશારા કરી પજવણી કર્યાની પોલીસમાં ફરિયાદ કરાઈ છે. આ શખ્સ સામે યુવતીની માતાએ કરેલી ફરિયાદ અંગેનો કેસ કોર્ટમાં ચાલવા પર આવ્યો છે ત્યારે તેનો ખાર રાખી આ શખ્સ આંટાફેરા કરતો હોવાનું પણ ફરિયાદમાં જણાવાયું છે.

જામનગરના કિસાન ચોક વિસ્તારમાં આવેલા ગણેશવાસમાં રહેતા એક યુવતીએ ત્યાં જ રહેતા રાજ દેવશીભાઈ માતંગ સામે ગઈરાત્રે સિટી એ ડિવિઝન પોલીસ સ્ટેશનમાં ફરિયાદ નોંધાવી છે. પીએસઆઈ એમ.કે. બ્લોચે આ બનાવની તપાસ શરૂ કરી છે.

ફરિયાદમાં જણાવવામાં આવ્યા મુજબ આ યુવતીના માતાએ થોડા સમય પહેલાં રાજ દેવશીભાઈ સામે ફરિયાદ નોંધાવી હતી. તે અંગેનો કેસ કોર્ટમાં ચાલી રહ્યો છે તેનો ખાર રાખી રાજ માતંગ અવારનવાર આ યુવતીના ઘર પાસે આંટાફેરા કરતો હતો. તે દરમિયાન ગઈકાલે સાંજે આ યુવતી જ્યારે પોતાના પિતા સાથે જતી હતી ત્યારે તેણીનો પીછો કરી રાજ માતંગે ઈશારા કરી તેણીની પજવણી કરી હતી. પોલીસે આરોપીની ધરપકડ માટે તજવીજ હાથ ધરી છે.

જો આપને આ પોસ્ટ ગમી હોય તો શેર કરો...