ભારત પ૦ દેશો સાથે કરશે ફ્રી ટ્રેડ ડીલ

Author: નોબત સમાચાર

ભારત પ૦ દેશો સાથે કરશે ફ્રી ટ્રેડ ડીલ

કેન્દ્રિય વાણિજયમંત્રીએ આપી માહિતીઃ

નવી દિલ્હી તા. ર૯: કેન્દ્રિય વાણિજ્ય મંત્રી પિયુષ ગોયલે જણાવ્યું છે કે, ભારત પ૦ દેશો સાથે ફ્રી ટ્રેડ ડીલ માટે વાટાઘાટો કરી રહ્યું છે.

ભારતીય અર્થતંત્ર વૈશ્વિક સ્તરે સૌથી ઝડપથી વિકસતા અર્થતંત્રોમાંનું એક બની રહ્યું છે, ત્યારે દેશનો વેપાર વિસ્તારવા માટે કેન્દ્રિય વાણિજ્ય મંત્રી પિયુષ ગોયલે મહત્ત્વપૂર્ણ અપડેટ આપ્યું છે. શુક્રવારે એફઆઈસીસીઆઈની વાર્ષિક સામાન્ય સભાને સંબોધતા તેમણે જણાવ્યું કે 'ભારત હાલમાં લગભગ પ૦ વિવિધ દેશો અને જુથો સાથે મુેક્ત વેપાર કરારો માટે સક્રિય રીતે વાટાઘાટો કરી રહ્યું છે.'

કેન્દ્રિય વાણિજ્ય મંત્રી પિયુષ ગોયલે પ૦ દેશો સાથેની વાટાઘાટોની પ્રગતિ વિશે વિગતવાર માહિતી આપી. તેમણે જણાવ્યુંકે, 'આર્મેનિયા, બેલારૂસ, કઝાકિસ્તાન અને કિર્ગિસ્તાનનો સમાવેશ કરતા યુરેશિયન ઈકોનોમિક યુનિયન સાથે વેપાર કરારની વાટાઘાટો ઝડપથી આગળ વધી રહી છે.'

વધુમાં પિયુષ ગોયલે જણાવ્યું હતું કે, 'ભારતના દૃષ્ટિકોણમાં અનેક મુખ્ય જુથો સાથે ચર્ચાનો સમાવેશ થાય છે. ગલ્ફ કોઓપરેશન કાઉન્સિલ, જેમાં સાઉદી અરેબિયા, સંયુક્ત આરબ અમીરાત, કતાર, કુવૈત, ઓમાન અને બહેરીનનો સમાવેશ થાય છે. એ રસ દાખવ્યો છે. આમાંથી ભારતે યુએઈ સાથે વ્યાપક વેપાર કરાર લાગુ કરી દીધો છે, જ્યારે ઓમાન સાથે ચર્ચાઓ પૂર્ણ થવાના આરે છે. બહેરીન અને કતારે પણ ભારત સાથે વેપાર કરાર પર વાટાઘાટો શરૂ કરવાની ઈચ્છા વ્યક્ત કરી છે.'

ભારત-અમેરિકા ટ્રેડ ડિલઃ વર્ષના અંત સુધીમાં પ્રથમ તબક્કો પૂર્ણ થશે

કેન્દ્રિય મંત્રીએ યુનાઈટેડ સ્ટેટ્સ સાથેના દ્વિપક્ષીય વેપાર કરાર અંગે પણ મુખ્ય અપડેટ આપી હતી. તેમણે જણાવ્યું હતું કે, 'ભારત-મેરિકા ટ્રેડ ડીલ માટે વાટાઘાટોના છ રાઉન્ડ પૂર્ણ થઈ ચૂક્યા છે અને ચર્ચા સતત આગળ વધી રહી છે. બન્ને દેશોએ આ વર્ષના અંત સુધીમાં કરારના પ્રથમ તબક્કાને અંતિમ સ્વરૂપ આપવાનું લક્ષ્ય રાખ્યું છે. ભારતીય અર્થતંત્રની ઝડપી પ્રગતિ વચ્ચે આ આક્રમક ટ્રેડ ડિપ્લોમસી દેશને વૈશ્વિક વેપાર હબ તરીકે સ્થાપિત કરવામાં મદદરૂપ થશે.'

જો આપને આ પોસ્ટ ગમી હોય તો શેર કરો...