જામનગરના વેપારી પાસેથી રૂ.પ૪ લાખ જેટલી બ્રાસ એશ મંગાવ્યા પછી અપાઈ ધમકી

Author: નોબત સમાચાર

જામનગરના વેપારી પાસેથી રૂ.પ૪ લાખ જેટલી બ્રાસ એશ મંગાવ્યા પછી અપાઈ ધમકી

અમદાવાદના ત્રણ વેપારીએ માલ મંગાવી વિશ્વાસઘાત કર્યાે:

જામનગર તા. ૨૯: જામનગરના એક આસામી બ્રાસ એશનું કામ કરે છે તેમની પાસેથી છ મહિના પહેલાં અમદાવાદના ત્રણ વેપારીએ રૂ.પ૩,૯૦,૯૯૫ની કિંમતની ૧૯૭ ટન બ્રાસ એશ મંગાવી લીધા પછી પૈસા આપવાની બદલે ગાળો ભાંડી પતાવી દેવાની ધમકી આપતા નગરના વેપારીએ વિશ્વાસઘાત કરાયાની પોલીસમાં ફરિયાદ નોંધાવી છે.

જામનગરના પવનચકકી વિસ્તારમાં આવેલી ભાનુશાળી જ્ઞાતિની જૂની વાડી નજીક વસવાટ કરતા ચિરાગભાઈ ભૂપતભાઈ ફલીયા નામના આસામી ગોકુલનગરમાં જકાતનાકા પાસે આવેલી પટેલ એસ્ટેટમાં શ્રી હની ઝીંક ટ્રેડીંગ નામની પેઢી ચલાવે છે.

બ્રાસપાર્ટના કારખાનાઓ માંથી નીકળતી માટી (બ્રાસ એશ) ખરીદવાનું કામ કરતા આ વેપારી પાસે ગયા મે મહિનામાં ૩૦ તારીખે અમદાવાદના બાકરોલ બજરંગ ગામમાં ગોકુલ ચારણ ઈન્ડસ્ટ્રીઝ બી-૦૨માં કામકાજ કરતા હર્ષદ પટેલ, રવિ બાબુભાઈ સુતરીયા, ધર્મેન્દ્ર હરીભાઈ ઠક્કર નામના ત્રણ વેપારી આવ્યા હતા.

આ વ્યક્તિઓએ બ્રાસ એશ ચેક કર્યા પછી ચિરાગભાઈ પાસેથી ૧૯૭ ટન બ્રાસ એશ મંગાવી હતી. રૂ.પ૩,૯૦,૯૯૫ની કિંમતની આ માટી ચિરાગભાઈએ અમદાવાદ મોકલાવી આપી હતી. ત્યારપછી ઉઘરાણી કરાતા અમદાવાદના ત્રણેય વેપારીએ જામનગરના વેપારીને આ પૈસા નથી આપવા તેમ કહી ગાળો ભાંડી જાનથી મારી નાખવાની ધમકી આપતા અને વિશ્વાસઘાત કરતા સિટી સી ડિવિઝન પોલીસ સ્ટેશનમાં ચિરાગભાઈએ ફરિયાદ નોંધાવી છે.

જો આપને આ પોસ્ટ ગમી હોય તો શેર કરો...