હાલારમાં વર્ષ ર૦ર૬ ના આગમનને વધાવવા થર્ટી ફર્સ્ટ નાઈટની હર્ષોલ્લાસ સાથે ઉજવણી

Author: નોબત સમાચાર

હાલારમાં વર્ષ ર૦ર૬ ના આગમનને વધાવવા થર્ટી ફર્સ્ટ નાઈટની હર્ષોલ્લાસ સાથે ઉજવણી

શહેરની ભાગોળે રિસોર્ટ, પાર્ટી પ્લોટના આયોજનોમાં રાત્રે ૧ર ના ટકોરે આતશબાજી સાથે હેપ્પી ન્યૂ યર

જામનગર અને દેવભૂમિ દ્વારકા જિલ્લામાં વર્ષ ર૦રપ ની વિદાય અને વર્ષ ર૦ર૬ ના આગમનને વધાવવા 'થર્ટી ફર્સ્ટ નાઈટ'ની ભારે ઉમંગભેર ઉજવણી કરવામાં આવી હતી. ખાસ કરીને યુવા હૈયાઓએ વિવિધ આયોજનોમાં મન મૂકીને ડીજે/મ્યુઝિક સાથે ડાન્સ કરવાનો આનંદ માણ્યો હતો.

જામનગર શહેરમાં અમુક મોટી હોટલોમાં ડાન્સીંગ ફ્લોર પર રાત્રે ૮ વાગ્યાથી જ ઉત્સવપ્રેમીઓ સજ્જધજ્જ થઈને નાચ-ગાનના કાર્યક્રમમાં જોડાઈ ગયા હતાં, જ્યારે શહેર ફરતે ભાગોળે આવેલા રિસોર્ટ, પાર્ટી પ્લોટમાં પણ મોટી સંખ્યામાં લોકો ઉમટી પડ્યા હતાં.

લાઈટીંગના ઝળહળાટમાં ડીજેના સથવારે યુવા વર્ગે વિવિધ ધૂનો-ગીતો પર ડાન્સ કરવાનો ભરપૂર આનંદ માણ્યો હતો. ખાસ ચાર્જ સાથેના પેકેજમાં સહપરિવાર આવેલા લોકોએ, કપલોએ યુવા વર્ગની સાથે ડાન્સ અને ડીનરનો આનંદ માણી થર્ટી ફર્સ્ટની નાઈટને ભવ્ય રીતે ઉજવી હતી. જામનગર ભાગોળે આવેલા મોટાભાગના આયોજનોમાં હાઉસફૂલ જેવી સ્થિતિ સર્જાઈ હતી.

રાત્રે બરાબર બારના ટકોરે લાઈટો-મ્યુઝિક બંધ કરી વર્ષ ર૦ર૬ ના આગમનને ચીચીયારીઓ, મોબાઈલની ફ્લેશ લાઈટો અને આતશબાજી સાથે વધાવી સૌએ એકબીજાને નવા વર્ષની શુભેચ્છા આપી હતી.

આવી જ રીતે દેવભૂમિ દ્વારકા જિલ્લામાં પણ ખાસ કરીને ખંભાળિયા અને દ્વારકા શહેરમાં થર્ટી ફર્સ્ટ નાઈટના 'ડાન્સ વીથ ડાઈન'ના ભપકાદાર આયોજનો થયા હતાં, જેમાં મોટી સંખ્યામાં લોકોએ નવા વર્ષને વધાવી નાચ-ગાનના કાર્યક્રમને માણ્યો હતો.

નાતાલ પર્વ અને થર્ટી ફર્સ્ટ નાઈટની ઉજવણી સામે રામધૂન જેવા કાર્યક્રમો યોજાયા હતાં, તો ક્યાંક આ પાશ્ચાત્ય પરંપરાના તહેવારનો વિરોધ થઈ રહ્યો હતો, તેમ છતાં ઉત્સવપ્રેમીઓએ તેની પરવાહ કર્યા વગર થર્ટી ફર્સ્ટ નાઈટની જોશભેર ઉજવણી કરી વિરોધના છમકલા અને નાટકોનો છેદ્ ઊડાડી દીધો હતો. ભારતમાં અને ખાસ કરીને ગુજરાતમાં સમગ્ર વિશ્વમાં જે કેલેન્ડરને માન્યતા છે તેવા નવા વર્ષના આગમનને વધાવી લોકોએ ધર્મ-પરંપરાના ભેદભાવને સાઈડમાં રાખી સર્વધર્મને સન્માનની ભાવના વ્યક્ત કરી હતી.

મોડી રાત્રિ સુધી બન્ને જિલ્લામાં હોટલો, રેસ્ટોરન્ટોમાં પણ લોકો પરિવાર સાથે ઉમટ્યા હતાં અને વહેલી સવાર સુધી માર્ગો પર ચહલપહલ જોવા મળી હતી.

સમગ્ર ઉજવણીના માહોલમાં પોલીસ તંત્રની કડક કાર્યવાહીના પગલે કેટલાક પીધેલા ઝડપાયા હતાં, પણ એકંદરે કોઈ અનિચ્છિય ઘટના બની ન હતી.

જો આપને આ પોસ્ટ ગમી હોય તો શેર કરો...