રૂ. ૨૦ હજારની ઉઘરાણીના મામલે યુવાનને બાંધીને પતિ-પત્ની, પિતાએ ફટકાર્યાની રાવ

Author: નોબત સમાચાર

રૂ. ૨૦ હજારની ઉઘરાણીના મામલે યુવાનને બાંધીને પતિ-પત્ની, પિતાએ ફટકાર્યાની રાવ

સામા પક્ષે પણ છરીથી ઈજા કર્યાની નોંધાવી ફરિયાદઃ

જામનગર તા. ૧૧: જામનગરના એક આસામીએ રૂ. ૨૦ હજારની હાથઉછીની આપેલી રકમ પરત માંગતા તેના પર પતિ, પત્ની તથા પિતાએ હુમલો કર્યાની અને બાંધીને માર માર્યાની પોલીસમાં ફરિયાદ કરાઈ છે. જ્યારે સામાપક્ષે પણ હમણા પૈસા નથી તેમ કહેતા ઉઘરાણી કરવા આવેલા શખ્સે છરીથી હુમલો કર્યાની વળતી ફરિયાદ નોંધાવી છે.

જામનગરના મોરકંડા રોડ પર અનમોલ પાર્કમાં રહેતા ફિરોઝ અલારખા દલ નામના આસામીએ જામનગર તાલુકાના ખીમલીયા ગામમાં રહેતા અનવર અલારખા આસાણીને અગાઉ રૂ. ૨૦ હજાર હાથઉછીના આપ્યા હતા. તેની ઉઘરાણી માટે ગઈકાલે બપોરે અનવરના ઘેર ગયેલા ફિરોઝ દલને પૈસા ન આપવાનું અને રકમ ભૂલી જવાનું કહેવાતા ફિરોઝભાઈએ પૈસા લઈને જ જઈશ તેમ કહેતા ઉશ્કેરાયેલા અનવર તેમજ તેના પિતા અલારખા નુરમામદ હાસાણી ઉર્ફે બાબુભાઈ તથા પત્ની અફસાનાબેન અનવરભાઈએ ઝઘડો કરી મારામારી શરૂ કરી હતી. અનવર તથા તેના પિતા અલારખાએ પાવડો ઉપાડી હુમલો કર્યાે હતો તેથી ફિરોઝભાઈએ દોટ મૂકી હતી.

આ વેળાએ અફસાનાબેને તેઓને પકડી લીધા હતા. તે દરમિયાન આવી પહોંચેલા અનવર અને અલારખાભાઈએ પાવડા વડે હુમલો કરી માર માર્યાે હતો. અફસાનાબેને લાવી આપેલી દોરીથી ફિરોઝભાઈને બાંધી દીધા પછી ફરીથી અનવર તથા અલારખાભાઈએ પાવડાના હાથાથી ફટકા મારી માથામાં ગંભીર ઈજા પહોંચાડી હતી. સારવારમાં ખસેડાયેલા ફિરોઝભાઈએ રાત્રે પંચકોશી બી ડિવિઝન પોલીસ સ્ટેશનમાં ફરિયાદ કરી છે.

તે ફરિયાદની સામે અનવર અલારખાભાઈ આસાણીએ વળતી ફરિયાદ નોંધાવી છે. જેમાં તેઓએ જણાવ્યા મુજબ હાથઉછીની આપેલી રકમની ઉઘરાણી માટે ગઈકાલે બપોરે ફિરોઝ અલારખા દલ આવ્યા હતા. તેઓને હમણા હાથ ઉપર પૈસા નથી તેમ કહેતા ઉશ્કેરાયેલા ફિરોઝ દલે ગાળો ભાંડ્યા પછી પોતાની પાસે રહેલી છરી બહાર કાઢી અનવરભાઈને ગાલ પર ઈજા પહોંચાડી હતી. પોલીસે આ ફરિયાદ પણ રજીસ્ટરે લીધી છે.

જો આપને આ પોસ્ટ ગમી હોય તો શેર કરો...