પટેલકામાં આગલા પૈસા બાકી છે તેમ કહી શ્રમિક પર હુમલોઃ જ્ઞાતિ પ્રત્યે હડધૂત કરાયા

Author: નોબત સમાચાર

પટેલકામાં આગલા પૈસા બાકી છે તેમ કહી શ્રમિક પર હુમલોઃ જ્ઞાતિ પ્રત્યે હડધૂત કરાયા

એક શખ્સે મ્હોં પર લાત ફટકારી નાકમાં ઈજા કરીઃ

જામનગર તા. ૧૮: કલ્યાણપુરના પટેલકામાં એક ખેતરમાં મગફળી કાઢવા માટે ગયેલા શ્રમિકને તે ખેતરમાં માલિકે આગલા પૈસા બાકી છે તેમ કહી ગાળો ભાંડ્યા પછી જ્ઞાતિ પ્રત્યે હડધૂત કરી મ્હોં પર લાત ફટકાર્યાની પોલીસમાં ફરિયાદ કરાઈ છે.

દેવભૂમિ દ્વારકા જિલ્લાના કલ્યાણપુર તાલુકાના પટેલકા ગામમાં આંબેડકરવાસમાં રહેતા કમાભાઈ રાજાભાઈ ચાવડાના કૌટુંબિક ભાઈ માલદેભાઈ ચાવડાએ પટેલકા ગામના કુંભાભાઈ હરદાસભાઈ લગારીયાના ખેતરમાં ભાગમાં વાવેતર કર્યું હતું. તેમાં ઉગેલી મગફળી કાઢવા માટે માલદેભાઈએ કહેતા કમાભાઈ તે મજૂરીકામ માટે ગઈકાલે કુંભાભાઈના ખેતરે ગયા હતા.

આ વેળાએ ત્યાં આવેલા કુંભાભાઈએ ઘણા વર્ષાેથી તારી પાસે રૂા.૭૦૦ લેવાના બાકી છે તેમ કહેતા કમાભાઈએ આ રકમ મજૂરીમાં વળાવી લીધી છે. તેમ જવાબ આપ્યો હતો. તેથી ઉશ્કેરાયેલા કુંભાભાઈએ ગાળો ભાંડ્યા પછી કમાભાઈએ જ્ઞાતિ પ્રત્યે હડધૂત કરી મ્હોં પર લાત ફટકારી હતી. નાકમાં ઈજા પામેલા કમાભાઈને સારવારમાં ખસેડાયા છે. તેઓની ફરિયાદ પરથી પોલીસે એટ્રોસિટી તેમજ બીએનએસની કલમો હેઠળ ગુન્હો નોંધ્યો છે.

જો આપને આ પોસ્ટ ગમી હોય તો શેર કરો...