કાયાગામ પાસે ગમખ્વાર અકસ્માતમાં પાંચ વાહન પરસ્પર ટકરાતા ત્રણના મૃત્યુ

Author: નોબત સમાચાર

કાયાગામ પાસે ગમખ્વાર અકસ્માતમાં પાંચ વાહન પરસ્પર ટકરાતા ત્રણના મૃત્યુ

રાજસ્થાનના ઉદયપુર નજીક હાઈ-વે પર

ઉદયપુર તા. ૧પઃ ઉદયપુર નજીક નેશનલ હાઈ-વે પર પાંચ વાહનો વચ્ચે અકસ્માત સર્જાતા વાવ અને થરાદ તાલુકાના ત્રણ યુવાનોના ઘટના સ્થળે જ મૃત્યુ થયા છે. ઉદયપુર-અમદાવાદ હાઈ-વે પર કાયા ગામ નજીક કારને અકસ્માત થયો ત્યારે ત્રણેય યુવાનો માળી સમાજના ઉધારણી ગામે સગપણ પતાવી પરત ફરી રહ્યા હતાં.

રાજસ્થાનના ઉદયપુર નજીક નેશનલ હાઈ-વે પર અકસ્માતનો બનાવ બન્યો હતો, જેમાં એક સાથે પાંચ વાહનો અથડાયા હતાં. આ અકસ્માતના બનાવમાં વાવ અને થરાદ તાલુકાના ત્રણ યુવાનોના ઘટના સ્થળે જ મોત નિપજ્યા હતાં. આ ઘટના ઉદયપુર-અમદાવાદ હાઈ-વે પર કાયા ગામ નજીક બની હતી.

પ્રાપ્ત માહિતી અનુસાર થરાદના ડોડગામનો પ્રવિણ સુથાર, વાવના ખીમાણા ગામનો હરેશ સુથાર અને થરાદના જ ભોરોલનો નરેશ માળી આ ત્રણેય યુવાનો માળી સમાજનું ઉધારણી ગામે સગપણ પતાવી પરત ફરી રહ્યા હતાં. તેમની કાર ઉદયપુર-અમદાવાદ હાઈ-વે પરથી પસાર થઈ રહી હતી ત્યારે આ અકસ્માત સર્જાયો હતો. આ ત્રણેય યુવાનોના ઘટના સ્થળે જ મોત થતા સમગ્ર પંથકમાં શોકનું મોજુ ફરી વળ્યું છે.

પ્રાથમિક વિગતો મુજબ આ અકસ્માતમાં ટ્રક અને અન્ય ચાર વાહનો સહિત કુલ પાંચવાહનો સામસામે અથવા એકબીજા સાથે અથડાયા હતાં. અકસ્માત એટલો ભયાનક હતો કે વાહનોનો કચ્ચરઘાણ નીકળી ગયો હતો. મૃતદેહોને બહાર કાઢવા માટે ભારે જહેમત ઊઠાવવી પડી હતી. અકસ્માત પછી હાઈ-વે પર ટ્રાફિક જામના દૃશ્યો સર્જાયા હતાં અને સ્થાનિક પોલીસ તેમજ હાઈ-વે પેટ્રોલિંગની ટીમ ઘટના સ્થળે પહોંચી હતી.

મૃતક યુવાનોના પરિવારજનોને આ દુર્ઘટના અંગે જાણ કરવામાં આવી છે અને તેમના મૃતદેહોને પી.એમ. અર્થે સ્થાનિક હોસ્પિટલમાં ખસેડવામાં આવ્યા હતાં. આ ઘટનાને પગલે વાવ અને થરાદ પંથકમાં ગમગીનીનો માહોલ છવાઈ ગયો છે. પોલીસે વધુ તપાસ હાથ ધરી છે.

જો આપને આ પોસ્ટ ગમી હોય તો શેર કરો...