દેવભૂમિ દ્વારકા જિલ્લામાં કલા મહાકુંભનું આયોજનઃ કુલ ૩૭ વિવિધ સ્પર્ધાઓ યોજાશે

Author: નોબત સમાચાર

દેવભૂમિ દ્વારકા જિલ્લામાં કલા મહાકુંભનું આયોજનઃ કુલ ૩૭ વિવિધ સ્પર્ધાઓ યોજાશે

રાજ્યની કલા સંસ્કૃતિથી લોકોને માહિતગાર કરવા

ખંભાળિયા તા. ૨૪: રમત ગમત, યુવા અને સાંસ્કૃતિક પ્રવૃત્તિઓ વિભાગ-ગાંધીનગર અંતર્ગતના કમિશનર, યુવક, સેવા અને સાંસ્કૃતિક પ્રવૃત્તિઓ-ગાંધીનગર દ્વારા આયોજીત અને જિલ્લા યુવા અને સાંસ્કૃતિક પ્રવૃત્તિઓની કચેરી-દેવભુમિ દ્વારકા દ્વારા સંચાલિત રાજ્યમાં સાંસ્કૃતિક વારસાનું જતન થાય, કલા, સાહિત્ય અને સંસ્કૃતિમાં આગવી ઓળખ ધરાવનાર અલગ-અલગ વય જૂથના કલાપ્રેમીઓ અને પસંદગી પામેલ કૃતિઓનું તાલુકા કક્ષાએથી શરુ કરી તબક્કાવાર રાજ્યકક્ષા સુધી તંદુરસ્ત સ્પર્ધા યોજવામાં આવે તથા રાજ્યની કલા સંસ્કૃતિથી લોકો માહિતગાર થાય તે હેતુથી કલા મહાકુંભ સ્પર્ધાનું આયોજન કરવામા આવનાર છે.

આ વર્ષે કલા મહાકુંભમાં કુલ ૩૭ વિવિધ સાંસ્કૃતિક કલા કૃતિઓ કુલ ચાર વયજૂથ ૬ થી ૧૪ વર્ષ (તા. ૦૧/૦૧/૨૦૧૨ થી ૩૧/૧૨/૨૦૧૯ વચ્ચે જન્મેલા), ૧૫ થી ૨૦ વર્ષ (તા.૦૧/૦૧/૨૦૦૬ થી ૩૧/૧૨/૨૦૧૧ વચ્ચે જન્મેલા), ૨૧ થી ૫૯ વર્ષ (તા. ૦૧/૦૧/૧૯૬૭ થી ૩૧/૧૨/૨૦૦૫ વચ્ચે જન્મેલા) અને ૬૦ વર્ષથી ઉપરના (તા. ૩૧/૧૨/૧૯૬૬ પહેલા જન્મેલા) વયજૂથમાં સ્પર્ધા યોજાશે.

જેમાં તાલુકા કક્ષાએ કુલ ૧૪ કૃતિ જેવી કે વકતૃત્વ, નિબંધ લેખન, ચિત્રકલા, ભરતનાટ્યમ, એકપાત્રીય અભિનય, લોકનૃત્ય, રાસ, ગરબા, સુગમ સંગીત, લગ્ન ગીત, સમુહગીત, લોકગીત/ ભજન, તબલા હાર્મોનિયમ (હળવું).

જિલ્લા કક્ષાએ કુલ ૯ કૃતિ કાવ્ય લેખન, ગઝલ શાયરી લેખન, લોકવાર્તા, દુહા-છંદ-ચોપાઇ, સર્જનાત્મક કારીગરી, સ્કૂલ બેન્ડ, ઓર્ગન, કથ્થક,શાસ્ત્રીય કંઠ્ય સંગીત (હિન્દુસ્તાની). પ્રદેશકક્ષાએ કુલ ૦૭ કૃતિ સિતાર, ગીટાર, વાંસળી, વાયોલિન, કુચિપુડી, ઓડિસી, મોહિની અટ્ટમ તેમજ રાજ્યકક્ષાએ કુલ ૦૭ કૃતિ પખાવજ, મૃદંગમ,રાવણ હથ્થો, જોડિયા પાવા, સરોદ, સારંગી અને ભવાઇ વગેરે કૃતિઓની સ્પર્ધાઓ યોજાશે.

આ સ્પર્ધામાં તાલુકા કક્ષાએ યોજાનાર ૧૪ કૃતિઓના, સીધી જિલ્લાકક્ષાએ યોજાનાર ૯ કૃતિઓ તથા સીધી પ્રદેશકક્ષાએ યોજાનાર ૦૭ કૃતિઓ અને સીધી રાજ્યકક્ષાએ યોજાનાર ૦૭ કૃતિઓની એન્ટ્રી માટે જીલ્લા યુવા અને સાંસ્કૃતિક પ્રવૃત્તિઓની કચેરી, પ્રથમ માળ, રૂમ નંબર, સી/૧/૨, સી/૧/૪ જિલ્લા સેવા સદન, ખંભાળીયા જિ.દેવભુમિ દ્વારકાથી તા. ૨૦/૦૭/૨૦૨૫ સુધીમાં ફોર્મ મેળવી સંપૂર્ણ વિગત ભરી આ સાથે આધારકાર્ડ બેંકપાસ બુકની ઝેરોક્ષ જોડી સમય મર્યાદામાં અરજી ફોર્મ મોકલી આપવાની રહેશે. સમય મર્યાદા બાદ આવેલ અરજીઓ સ્વીકારવામાં આવશે નહીં. વધુ માહિતી માટે મો. નં. ૯૯૨૪૨૨૮૬૫૧ ઉપર સંપર્ક કરવા જિલ્લા યુવા વિકાસ અધિકારીશ્રીની યાદીમાં જણાવાયું છે.

જો આપને આ પોસ્ટ ગમી હોય તો શેર કરો...