Author: નોબત સમાચાર
ભારતીય શેરબજારમાં દરેક ઉછાળે ફંડોની સાવચેતી !!
તા. ૨૮-૧૧-૨૦૨૫ ના સવારે ૧૦ કલાકે....
અંદાજીત ૧૪ મહિનાની લાંબી રાહ જોયા બાદ, ભારતીય શેરબજારે ગઈકાલે ગુરુવારે ઇતિહાસ રચ્યો હતો. સેન્સેક્સ અને નિફ્ટી ઇન્ડેક્સ તેના બાવન સપ્તાહની ઉચ્ચ સ્તરને પાર કરી સેન્સેક્સે પહેલીવાર ૮૬૦૫૫ પોઈન્ટની અને નિફ્ટી ફ્યુચરે ૨૬૪૯૫ પોઈન્ટની નવી ઐતિહાસિક સપાટી નોંધાવી હતી. અમેરિકાના તાજેતરના આર્થિક આંકડા થોડા નબળા આવતા અમેરિકન ફેડરલ રિઝર્વ દ્વારા ડિસેમ્બર મહિનામાં વ્યાજદરમાં ઘટાડો કરે તેવી અપેક્ષાએ વિશ્વના અન્ય બજારોમાં પણ તેજીનો માહોલ જોવા મળ્યો હતો, જેની સીધી અસર ભારતીય બજારના સેન્ટિમેન્ટ પર પડી હતી.
વિશ્વની સરખામણીમાં ભારતનો આર્થિક વિકાસ દર ખૂબ જ સારો હોવાથી મજબૂત જીડીપી વૃદ્ધિને કારણે કંપનીઓની કમાણી વધવાની અપેક્ષા તેમજ તાજેતરમાં પૂરા થયેલા ત્રિમાસિક ગાળામાં મોટાભાગની ભારતીય કંપનીઓએ સારા પરિણામો રજૂ કર્યા હોવાને લીધે સ્થાનિક બજારમાં તેજીનો માહોલ જોવા મળ્યો હતો. વ્યાજદર ઘટવાની આશાએ વિદેશી રોકાણકારોની સાથે સ્થાનિક સંસ્થાગત રોકાણકારોની સતત ખરીદીએ બજારને મજબૂત ટેકો આપ્યો હતો, જો કે દરેક ઉછાળે ફંડોની સાવચેતી જોવા મળી હતી.
વૈશ્વિક શેરબજારની વાત કરીએ તો ગઈકાલે અમેરિકન માર્કેટમાં ડાઉ જોન્સ ૦.૬૭%ના વધારા સાથે બંધ રહ્યો હતો. જ્યારે એસ એન્ડ પી ૫૦૦ ૦.૬૯% અને નેસ્ડેક ૦.૮૭% વધીને સેટલ થયા હતા. બીએસઇ પર મીડકેપ ઈન્ડેક્સ ૦.૨૧% અને સ્મોલકેપ ઈન્ડેક્સ ૦.૨૮% ઘટીને ટ્રેડ થઇ રહ્યા હતા.
બીએસઈમાં સવારે ૧૦ કલાકે કુલ ટ્રેડીંગ થયેલી ૩૦૭૪ સ્ક્રિપોમાંથી ઘટનારની સંખ્યા ૧૫૪૩ અને વધનારની સંખ્યા ૧૩૫૨ રહી હતી, ૧૭૯ શેરના ભાવમાં કોઈ ફેરબદલ જોવાયો ન હતો. જ્યારે ૫૪ શેરોમાં ઓનલી સેલરની મંદીની નીચલી સર્કિટ સામે ૭૨ શેરોમાં ઓનલી બાયરની તેજીની ઉપલી સર્કિટ રહી હતી.
ભારતીય શેરબજારમાં આજે બીએસઈ પર ઓટો, કન્ઝ્યુમર ડ્યુરેબલ્સ, એફએમસીજી અને કોમોડીટી સેક્ટરમાં ઉછાળો જોવા મળ્યો હતો, જયારે અન્ય બીજા તમામ સેક્ટરલ ઈન્ડાયસીસ ઘટાડા સાથે કારોબાર કરી રહ્યા હતા.
કોમોડિટી...
એમસીએક્સ ગોલ્ડ : ઇન્ટ્રા ડે ટ્રેડીંગની શરૂઆતે ડિસેમ્બર ગોલ્ડ રૂ.૧,૨૫,૭૨૯ પોઈન્ટના મથાળેથી ખુલીને રૂ.૧,૨૬,૨૮૩ પોઈન્ટના ઊંચા મથાળેથી ઘટાડો નોંધાવી રૂ.૧,૨૫,૭૨૯ પોઈન્ટના નીચા મથાળે નોંધાવી ૫૩૦ પોઈન્ટના ઉછાળા સાથે રૂ.૧,૨૬,૦૩૪ આસપાસ ટ્રેન્ડ નોંધાયેલ..!!
એમસીએક્સ સિલ્વર : ઇન્ટ્રા ડે ટ્રેડીંગની શરૂઆતે ડિસેમ્બર સિલ્વર રૂ.૧,૬૩,૮૫૦ પોઈન્ટના મથાળેથી ખુલીને રૂ.૧,૬૫,૨૦૧ પોઈન્ટના ઊંચા મથાળેથી ઘટાડો નોંધાવી રૂ.૧,૬૩,૩૬૨ પોઈન્ટના નીચા મથાળે નોંધાવી ૧૦૩૩ પોઈન્ટના ઘટાડા સાથે રૂ.૧,૬૩,૫૦૦ આસપાસ ટ્રેન્ડ નોંધાયેલ..!!
સ્ટોક સ્પેસિફિક રેન્જ મુવમેન્ટ....
હિન્દુસ્તાન ઝિંક (૪૮૦) : ઝિંક સેક્ટરની આ કંપનીના શેરનો ભાવ હાલમાં રૂ.૪૬૪ આસપાસ પ્રવર્તી રહ્યો છે. રૂ.૪૫૭ ના સ્ટ્રોંગ સપોર્ટથી આ સ્ટોક ટૂંકા સમયગાળે રૂ.૪૮૯ થી રૂ.૪૯૪ આસપાસ ભાવ સપાટી નોંધાવે તેવી શક્યતા છે...!! રૂ.૫૦૦ ઉપર તેજી તરફી ધ્યાન...!!
એક્સાઈડ ઈન્ડસ્ટ્રીઝ (૩૭૨) : એ/ટી+૧ ગ્રુપનો આ સ્ટોક રૂ.૩૬૪ આસપાસ પોઝીટીવ બ્રેકઆઉટ!! રૂ.૩૫૮ ના સપોર્ટથી આ સ્ટોક રૂ.૩૭૯ થી રૂ.૩૮૪ આસપાસ ભાવ સપાટી નોંધાવે તેવી સંભાવના છે...!!
મહિન્દ્ર એન્ડ મહિન્દ્ર ફાઈનાન્સિયલ સર્વિસીસ (૩૬૬) : રૂ.૩૫૫ નો પ્રથમ તેમજ રૂ.૩૪૭ બીજા સપોર્ટથી નોન બેંકિંગ ફાઇનાન્શિયલ કંપની સેક્ટરનો રોકાણલક્ષી આ સ્ટોક રૂ.૩૭૪ થી રૂ.૩૮૦ આસપાસ ભાવ સપાટી નોંધાવે તેવી શક્યતા છે...!!
કર્ણાટક બેન્ક (૨૧૫) : પ્રાઇવેટ બેન્ક સેક્ટરનો આ સ્ટોક ટ્રેડીંગલક્ષી રૂ.૨૧૯ થી રૂ.૨૨૮ ના ભાવ સપાટીની રેન્જ મુવમેન્ટ ધરાવે છે!! અંદાજીત રૂ.૨૦૪ નો સ્ટ્રોંગ સપોર્ટ ધ્યાને લેવો...!!!
બજારની ભાવિ દિશા.... મિત્રો, ઓક્ટોબર માસમાં આપેલો ૬.૬% જીડીપી ગ્રોથનો અંદાજ યથાવત્ રાખ્યા સાથે ઈન્ટરનેશનલ મોનેટરી ફંડ (આઈએમએફ) દ્વારા નોંધવામાં આવ્યું છે કે ટેરિફ સહિતના બાહ્ય પડકારો વચ્ચે પણ ભારત મજબૂત આર્થિક ગતિ જાળવી રાખશે, જ્યારે આવતા વર્ષ માટેનો અંદાજ ૬.૪%થી ઘટાડીને ૬.૨% કર્યો છે. આઈએમએફના મુજબ રિટેલ ફુગાવો નીચો છે અને આવનારા મહિનાઓમાં સ્થિર રહેશે, જેના કારણે ભાવ નિયંત્રણ અને નીતિગત નિર્ણયો લેવા માટે આરબીઆઈને સગવડ રહેવાની શક્યતા છે. આથી, આગામી મોનીટરી પોલિસી મીટિંગમાં વ્યાજદર ઘટાડાની સંભાવના પણ વધી છે.
આઈએમએફે જણાવ્યું કે બાહ્ય અનિશ્ચિતતા છતાં ભારતનું અર્થતંત્ર મજબૂત મોમેન્ટમ સાથે આગળ વધી રહ્યું છે. તેણે જૂન ક્વાર્ટરની સમીક્ષા કરતા જણાવ્યું કે ગત વર્ષના ૬.૪% મજબૂત ગ્રોથ બાદ પણ ચાલુ નાણાકીય વર્ષના પ્રથમ ક્વાર્ટરમાં ભારતે ૭.૮% ગ્રોથ હાસલ કર્યો હતો, જે મજબૂત આંતરિક માંગ અને નીતિગત સપોર્ટનું પરિણામ છે. ઘરેલું અર્થવ્યવસ્થામાં સુધારા અને મજબૂત વપરાશ પ્રવૃત્તિઓ આગામી માસોમાં પણ ગ્રોથને ટેકો આપશે. તાજેતરમાં અનેક વૈશ્વિક અને સ્થાનિક એજન્સીઓએ પણ ભારતના ગ્રોથ આઉટલૂકમાં વધારો કર્યો છે અથવા અંદાજ યથાવત રાખ્યો છે.
અન્ય સમાચારો
