ઈન્દોરની જામા-મસ્જીદ પાસે ફાટી નીકળ્યા હિંસક તોફાનોઃ દુકાનો તેમજ વાહનોને આગઃ પથ્થરમારો

Author: નોબત સમાચાર

ઈન્દોરની જામા-મસ્જીદ પાસે ફાટી નીકળ્યા હિંસક તોફાનોઃ દુકાનો તેમજ વાહનોને આગઃ પથ્થરમારો

ચેમ્પિયન્સ ટ્રોફીમાં ભારતના વિજયની ઉજવણીનું સરઘસ નજીક પહોંચ્યુ ત્યારે બે જૂથો વચ્ચે તકરાર

ઈન્દોર તા. ૧૦: ઈન્દોરમાં ભારતની જીતની ઉજવણી કરી રહેલા લોકો પર પથ્થરમારો થયો અને વાહનો અને દુકાનોને આગ લગાવાઈ હતી. આઈસીસી ચેમ્પિયન્સ ટ્રોફીમાં ભારતના વિજયની ઉજવણી દરમિયાન બે જૂથો આમને સામને આવી ગયા પછી તોફાનો હિંસક બન્યા હતા. પોલીસે વધુ પોલીસદળો તૈનાત કર્યા છે.

રવિવારે રાત્રે ઇન્દોર નજીક મહુ (એમપી) માં જ્યારે આઈસીસી ચેમ્પિયન્સ ટ્રોફીમાં ભારતની જીતની ઉજવણી દરમિયાન બે જૂથો આમને સામને આવી ગયા ત્યારે તણાવપૂર્ણ પરિસ્થિતિ સર્જાઈ ગઈ હતી. આ ઘટના જામા મસ્જિદ પાસે બની હતી જ્યાં વિજય સરઘસ કાઢી રહેલા લોકો અને અન્ય પક્ષ વચ્ચે ઝઘડો થયો હતો. તે પછી અથડામણ પથ્થરમારામાં ફેરવાઈ ગઈ હતી. જેના કારણે વિસ્તારમાં અરાજકતા ફેલાઈ ગઈ હતી.

પ્રત્યક્ષદર્શીઓના જણાવ્યા અનુસાર, જ્યારે ભારતની જીતની ઉજવણી માટે નીકળેલું સરઘસ મસ્જિદ પાસે પહોંચ્યું, ત્યારે બંને પક્ષો વચ્ચે દલીલ થઈ, જે ટૂંક સમયમાં હિંસક બની ગઈ. બદમાશોએ ઉજવણી કરી રહેલા લોકો પર પથ્થરમારો શરૂ કરી દીધો, જેના કારણે ઘણાં લોકો ઘાયલ થયા. પરિસ્થિતિ કાબુ બહાર જતા કેટલાક અસામાજિક તત્ત્વોએ વાહનોમાં તોડફોડ શરૂ કરી દીધી.

અહેવાલો અનુસાર, બે વાહનો અને બે દુકાનોમાં આગ લાગી હતી. બીજી તરફ, માહિતી મળતા જ ભારે પોલીસ બંદોબસ્ત ઘટનાસ્થળે પહોંચી ગયો હતો. પરિસ્થિતિને કાબુમાં લેવા માટે ઇન્દોર ગ્રામીણ અને ઇન્દોર શહેર પોલીસ દળોને સ્થળ પર તૈનાત કરવામાં આવ્યા હતા. પોલીસે તાત્કાલિક કાર્યવાહી કરી અને ભીડને વિખેરી નાખી અને વિસ્તારમાં શાંતિ પુનઃસ્થાપિત કરી હતી. આ ઉપરાંત સેનાના જવાનોને પણ તૈનાત કરવામાં આવ્યા છે. જોકે, મહુ એક સૈન્ય છાવણી છે અને અહીં ઘણી સૈન્ય એકમો હંમેશાં તૈનાત રહે છે, તેથી આ વિસ્તારમાં અલગથી સૈન્ય બોલાવવાની જરૂર નથી.

મહુ પોલીસ પ્રશાસને જણાવ્યું હતું કે હાલમાં પરિસ્થિતિ નિયંત્રણમાં છે, પરંતુ સાવચેતી રૂપે આ વિસ્તારમાં વધારાનો પોલીસ દળ તૈનાત કરવામાં આવશે. આ ઘટનામાં સંડોવાયેલા લોકોની ઓળખ કરવામાં આવી રહી છે અને ગુનેગારો સામે કડક કાર્યવાહી કરવામાં આવશે. વહીવટીતંત્રે લોકોને અફવાઓ પર ધ્યાન ન આપવા અને શાંતિ જાળવવા અપીલ કરી છે.

ઇન્દોરના કલેકટર આશિષ સિંહે પીટીઆઈને જણાવ્યું હતું કે પરિસ્થિતિ નિયંત્રણમાં છે અને વિસ્તારમાં સુરક્ષા દળો તૈનાત કરવામાં આવ્યા છે. આ કેવી રીતે થયું તે પછીથી શોધવામાં આવશે. હાલમાં પરિસ્થિતિ નિયંત્રણમાં છે.

ઈન્દોરથી મળતા અહેવાલો મુજબ સ્થાનિક લોકોએ જણાવ્યું હતું કે આ ઘટનાને કારણે શહેરના ઘણા વિસ્તારોમાં ગભરાટ ફેલાયો હતો અને ઘણા વાહનોમાં આગ લાગી હતી. ન્યૂઝીલેન્ડ સામે ભારતની અંતિમ જીતની ઉજવણી માટે ક્રિકેટ પ્રેમીઓના એક જૂથે એક રેલીનું આયોજન કર્યું હતું. જોકે, જેમ જેમ તેઓ જામા મસ્જિદ વિસ્તારની નજીક પહોંચ્યા, લોકોના મોટા ટોળાએ તેમના પર પથ્થરમારો શરૂ કરી દીધો, જેના કારણે અરાજકતા ફેલાઈ ગઈ અને તેમને તેમના મોટરસાયકલ છોડીને ભાગી જવાની ફરજ પડી. આ પછી કેટલાક લોકોએ વાહનોને આગ ચાંપી દીધી, જેનાથી તણાવ વધુ વધી ગયો હતો. તંત્રે હાલમાં પરિસ્થિતિ કાબુ હેઠળ હોવાનો દાવો કર્યો છે.

જો આપને આ પોસ્ટ ગમી હોય તો શેર કરો...