સાત રસ્તા પાસેથી ૮૦૦ ગ્રામ ગાંજા સાથે શખ્સ ઝબ્બેે: રાજકોટથી લાવ્યાની કબૂલાત

Author: નોબત સમાચાર

સાત રસ્તા પાસેથી ૮૦૦ ગ્રામ ગાંજા સાથે શખ્સ ઝબ્બેે: રાજકોટથી લાવ્યાની કબૂલાત

એસઓજી ટીમે એનડીપીએસ એક્ટ હેઠળ કરી કાર્યવાહીઃ

જામનગર તા. ૧૦: જામનગરના સાત રસ્તા સર્કલ પાસે આવેલા જાડાના બિલ્ડીંગ નજીકથી ગઈકાલે સાંજે એસઓજી ટીમે ધરારનગર-રમાં રહેતા મૂળ સુરજકરાડીના શખ્સને ૮૦૦ ગ્રામ ગાંજા સાથે પકડી પાડ્યો છે. આ શખ્સ રાજકોટથી તે જથ્થો વેચાણ માટે લાવ્યો હોવાની કબૂલાત કરી છે.

જામનગરના સાત રસ્તા સર્કલ પાસે એક શખ્સ ગાંજાના જથ્થા સાથે આવ્યો હોવાની બાતમી સ્પેશિયલ ઓપરેશન ગ્રુપના ધર્મેન્દ્ર પટેલ, વિજય કારેણા, જયેશ પઢેરીયાને મળતા પીઆઈ બી.એન. ચૌધરીને વાકેફ કરાયા પછી એસઓજી ટીમે પીએસઆઈ એલ.એમ. જેર, એ.વી. ખેરના વડપણ હેઠળ વોચ રાખી હતી.

તે દરમિયાન સાડા સાતેક વાગ્યે જીન્સ પેન્ટ તથા સફેદ લાયનીંગવાળો શર્ટ પહેરીને આવેલા એક શખ્સને શકના આધારે રોકી એસઓજી ટીમે તલાશી લેતા જામનગરના ધરારનગર-રમાં વસવાટ કરતા મૂળ સુરજકરાડીના વતની મુઝફ્રખાન અનવરખાન પઠાણ નામના આ શખ્સ પાસેથી ૮૦૦ ગ્રામ ગાંજો મળી આવ્યો હતો.

અંદાજે રૂા.આઠેક હજારની કિંમતના ગાંજાને કબજે કરી એસઓજીએ આ શખ્સની પૂછપરછ કરતા તેણે ઉપરોક્ત જથ્થો રાજકોટના એક શખ્સ પાસેથી વેચવા માટે લીધો હોવાની કબૂલાત આપી છે. એસઓજીએ મુઝફરખાનનો મોબાઈલ પણ કબજે કરી લઈ તેની સામે સિટી બી ડિવિઝન પોલીસ સ્ટેશનમાં એનડીપીએસ એક્ટ હેઠળ ગુન્હો રજીસ્ટર કરાવાયો છે.

જો આપને આ પોસ્ટ ગમી હોય તો શેર કરો...