શું સ્ત્રી મહેનતથી આવડતથી આગળ વધી ન શકે?

બગીચામાં ઘણાં ફૂલ હોય છે. તેમાંથી અમુક ફૂલ એકદમ સરસ ખીલેલા અને વધારે મહેક પ્રસરાવતા હોય છે. તો શું એ ફૂલે બગીચા સાથે કંઈ સમજુતી કરી હશે? હજારો પતંગિયા બાગમાં હોય છે. અમુક પતંગિયા સુંદર રંગોવાળા હોય છે, તો શું એ પતંગિયાએ મેઘધનુષ સાથે રંગો લેવાનો સોદો કર્યો હશે? દરિયામાંથી દરેક ક્ષણે મોજા ઉછળે છે, કોઈક મોજા એકદમ મોટા હોય છે. કિનારેથી ઘણાં અંદર સુધી આવીને કિનારે રહેલાને પલાળી જાય છે. તો શું એ મોજાએ વધારે ઉછળવા માટે દરિયાને કંઈ આપ્યું હશે? મારા આ બધા સવાલના જવાબમાં બધા 'ના' જ કહેશે... બધા એમ જ કહેશે કે એ બધું કુદરતી છે, તો પછી કોઈ સ્ત્રી આગળ વધે, બધાથી અલગ કંઈક કરે, સારી પદવી પ્રાપ્ત કરે ત્યારે એમ કેમ કહેવાય છે કે તેણે આ પદ મેળવવા કંઈક કિંમત ચૂકવી હશે? જ્યારે કોઈ પુરુષ સારી પદવી મેળવે ત્યારે બધા તેને મહેનતું અને હોંશિયાર કહે છે. જાત મહેનતથી આગળ આવ્યા તેમ કહીને બિરદાવે છે, તો પછી જ્યારે કોઈ સ્ત્રી આગળ આવે ત્યારે તેના વિશે એમ કેમ બોલાય છે કે, 'તેણે કંઈક ગુમાવ્યું હશે', 'કિંમત ચૂકવી હશે'... આ ગુમાવવું અને કિંમત ચૂકવવી એ ક્યા સંદર્ભમાં છે એ તો મારે તમને જણાવવાની જરૃર નથી ને? શું સ્ત્રી આગળ ન આવી શકે? એ આગળ આવે ત્યારે તેની મહેનત કે આવડત કેમ કોઈને દેખાતી નથી? જો આગળ આવનાર સ્ત્રી સુંદર હોય તો તો તેના વિશે વાત કરવી બધા માટે સહેલું થઈ જાય છે કે તેઓ પોતાના રૃપના જોરે જે તે પદ પ્રાપ્ત કર્યું હશે, સુંદરતાની જાળમાં બધાને ફસાવીને આગળ વધી હશે... શું સુંદર સ્ત્રીઓ હોંશિયાર કે મહેનતું ન હોઈ શકે? સુંદર સ્ત્રી આવડતથી આગળ ન આવી શકે? કેમ બધા સ્ત્રીની સફળતાને એક જ દૃષ્ટિથી જોવે છે? કેમ એમ જ વિચારી લે છે કે સ્ત્રીઓએ આગળ વધવા સમાધાન સ્વીકાર્યા જ હશે.

૩પ વર્ષની મહિમા સુંદર છે, ખૂબસૂરત છે, હાર્ડવર્કર છે, હોંશિયાર છે, ટેલેન્ટેડ છે, તે જ્યાં નોકરી કરે છે ત્યાં નાના સ્થાન પર જોડાય હતી પણ ધીમે ધીમે પોતાની આવડત અને હાર્ડવર્કથી તે આજે ઊંચી પોસ્ટ મેળવી છે. તેનાથી પાછળ રહી ગયેલા તેની સામે ઈર્ષાથી તેની ટીકા કરે છે, બદનામી કરે છે, તેણે પોતાની ખૂબસૂરતીનો ઉપયોગ કર્યો હશે એટલે તે આગળ વધી શકી એમ કહે છે.

સોનાલી બહું ભણી ન હતી. લગ્નના ચાર વર્ષ પછી પતિથી છૂટા થવું પડ્યું. નાની દીકરીની જવાબદારી આવી, તેણે કમાવવા માટે નાના બાળકોના ટ્યુશનથી શરૃઆત કરી. થોડા સમય પછી પોતે પણ ભણવાનું ચાલુ કર્યું. દીકરીને ભણાવે, ટ્યુશન કરાવે અને પોતે પણ ભણે. ચાર વર્ષના સંઘર્ષ પછી એમ.કોમ. સુધી ભણી અને પછી તેને કોલેજમાં લેક્ચરરની જોબ મળી. કોલેજમાં પણ તેના સારા સ્વભાવ અને તેના જ્ઞાનને કારણે વિદ્યાર્થીઓમાં પ્રિય થઈ. કોલેજનો સ્ટાફ જ તેના વિશે ખરાબ બોલે કે 'તે તો એકલી છે. એટલે કોલેજમાં વધારે સમય આપી શકે. આપણે ક્યાં નવરા છીએ' બોલવાવાળા એ નથી વિચારતા કે અહીં સુધી પહોંચવા તેણે કેટલી મહેનત કરી છે. બધાને દેખાય છે તો માત્ર વિદ્યાર્થીઓમાં તે પ્રિય છે તે, બધા તેને માન આપે છે તે, પણ આના માટે તેણે કરેલું કામ કોઈને દેખાતું નથી, બધા અને ખાસ લેડીસ સ્ટાફ એમ જ કહે કે પોતાની એકલતાને વટાવીને અહીં સુધી પહોંચી છે.

જ્યારે કોઈ સ્ત્રી આગળ વધે, ઊંચ્ચુ સ્થાન પ્રાપ્ત કરે, ત્યારે તેને પછાડવા, તેને વગોવવા, તેને બદનામ કરવા બધા તત્પર જ હોય છે. બધાને એમ જ લાગે કે તે પોતાની જાતને વેંચીને અહીં સુધી પહોંચી છે, પણ શું આ સાચું છે? સ્ત્રી આગળ વધવા કેટલી મહેનત કરે છે તે કેમ કોઈને દેખાતું નથી. આગળ વધવા, કેરિયર બનાવવા તેણે પોતાના શોખ, પોતાના સમયનું બલિદાન આપ્યું હોય છે. કેટલી વખત મોડી રાત સુધી કામ કરવું પડતું હોય છે. પોતાની જાત માટે પણ સમય ફાળવી નથી શકતી. હરવું, ફરવું, પાર્ટી, પિકનિક એવું બધું તેણે ગુમાવવું પડે છે. પોતાના ઘર-પરિવારને સાચવીને, પોતાના ધ્યેયને પ્રાપ્ત કરવા સખત મહેનત કરવી પડતી હોય છે, અને ત્યારે આ પુરુષ પ્રધાન સમાજમાં કોઈ સ્ત્રી ઉચ્ચ પદ મેળવી શકે છે અને પછી તેને મળે છે શું? તેને શાબાશી મળવાને બદલે તેની ટીકા થાય છે. તેના કામને બિરદાવવાને બદલે તેની બદનામી થાય છે. તેનો સ્ટાફ અને ખાસ કરીને લેડીસ સ્ટાફ તેને બદનામ કરે છે. બધા એમ જ કહે છે કે, આટલું ઊંચુ સ્થાન મેળવવા તેણે ઘણાં સમાધાન સ્વીકાર્યા હશે. તેણે કિંમત ચૂકવી હશે. પણ આ વાત સાચી છે? શું સ્ત્રી આવડતથી આગળ ન આવી શકે. સ્ત્રી ટેલેન્ડ, હાર્ડ વર્કર હોય તે સ્વીકારવા કોઈ તૈયાર કેમ નથી હોતું?

ખરેખર તો આપણા પુરુષ પ્રધાન સમાજમાં પુરુષો સ્ત્રીઓને આગળ વધતી જોઈ શકતા નથી. તેને આગળ વધતી અટકાવે છે, અને ક્યાંક તો તેને બદનામ કરવા અન્ય સ્ત્રીઓની પણ મદદ લે છે. કોઈપણ સ્ત્રી ઉપરી તરીકે આવે તે પુરુષો સ્વીકારી શકતા નથી, અને તેને કામમાં સપોર્ટ પણ કરતા નથી. તેને ઉતારી પાડવાના પ્રયત્નો કરે છે. સ્ત્રીની સફળતા કોઈથી સહન થતી નથી. ખાસ કરીને સ્ત્રી જ્યારે ઊંચા સ્થાને હોય ત્યારે તેની સફળતાથી ઈર્ષા કરીને બધા તેને બદનામ કરે છે.

પણ શું સ્ત્રી ટેલેન્ટેડ ન હોય શકે? તે મહેનતથી આગળ ન આવી શકે? શું તેણે આગળ વધવા પોતાની ખૂબસૂરતી કે શરીરનો ઉપયોગ કરવાનો હોય? તે બુદ્ધિક્ષમતાના બળે આગળ ન આવી શકે? એવું કેમ માની લેવાય છે કે આગળ વધવાની કિંમત તેણે શરીરથી જ ચૂકવી હશે? શું તે કિંમત તેની આવડત કે બુદ્ધિ ન હોય શકે? ખરેખર તો સ્ત્રીઓ પણ અન્ય સ્ત્રીને આગળ વધતી જોઈ શકતી નથી. એટલે તેને હતાશ કરવા આવી વાતો ફેલાવે છે.

તમે તમારા વિચારો ચકાસજો, તમે પણ એવું નથી વિચારતા ને? તમારી આસપાસ કોઈ સ્ત્રી ઉચ્ચ સ્થાને હોય તો તેની પાછળ તેની મહેનત કેટલી છે એ ચકાસજો...

- દિપા સોની-જામનગર

 

જો આપને પોસ્ટ ગમી હોય તો શેર કરો...

Follow us: પ્રકારની બીજી પોસ્ટ માટે અમારી એપ ડાઉનલોડ કરો.

Android: https://rb.gy/surhtv

Apple ios: https://rb.gy/cee4r9

 

Social Media

અમારા ફેસબુક પેજને લાઇક કરો અને મેળવો તમામ અપડેટસ.

https://www.facebook.com/nobatdaily/

 

ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો

https://www.instagram.com/nobatdaily?r=nametag



close
Ank Bandh
close
PPE Kit