સાધનાકોલોની પાસેથી રાત્રે ચાલીને જતાં વૃદ્ધ દંપતીના સોનાના ચેઈનની થઈ લૂંટઃ પોલીસ દોડી

Author: નોબત સમાચાર

સાધનાકોલોની પાસેથી રાત્રે ચાલીને જતાં વૃદ્ધ દંપતીના સોનાના ચેઈનની થઈ લૂંટઃ પોલીસ દોડી

ગુન્હો નોંધવાની તજવીજઃ પોલીસ દ્વારા તપાસઃ

જામનગર તા. ૧૩: જામનગરના રણજીતસાગર રોડ પર આવેલી સાધના કોલોની પાછળની નવી કોલોનીમાં પોતાના ઘર તરફ ગઈરાત્રે દસેક વાગ્યે પગપાળા જતા એક વૃદ્ધ દંપતી પર સમડી ત્રાટકી હતી. દોડી આવેલા એક શખ્સે વૃદ્ધાના ગળામાંથી પોણા ત્રણેક તોલાના સોનાના ચેઈનની ઝૂંટ મારી દોટ મૂકી હતી અને તે શખ્સ જે રિક્ષામાં બેસી ગયો તે રિક્ષા નાસી છૂટી હતી. બનાવની જાણ કરાતા પોલીસ ટીમ ધસી આવી હતી. આ બાબતની ફરિયાદ નોંધવાની તજવીજ કરાઈ છે.

જામનગરના રણજીત સાગર રોડ પર આવેલી સાધના કોલોની પાછળની નવી સાધના કોલોનીમાં રહેતા એક વૃદ્ધ તથા તેમના પત્ની ગઈકાલે સાંજે માંડવીટાવર વિસ્તારમાં કામસર આવ્યા હતા. જ્યાંથી તેઓ પરત જવા માટે એક શેરીંગ રિક્ષામાં બેઠા પછી તે રિક્ષાના ચાલકે ચોપડાઓનો એક થપ્પો મહિલાને પકડી રાખવા માટે આપ્યો હતો.

ત્યારપછી ખંભાળિયા નાકા વિસ્તાર પાસે પહોંચેલી આ રિક્ષામાંથી તે દંપતીને રિક્ષાચાલકે ઉતરી જવા માટે કહી અન્ય રિક્ષામાં જતા રહેવાનું સૂચન કર્યું હતું તેથી વૃદ્ધ દંપતી ઉતર્યું હતું. તે વેળાએ રિક્ષામાં તેના ચાલક સહિત બે વ્યક્તિ હતા.

બીજી રિક્ષામાં બેસી આ દંપતી સાધના કોલોની પાસે ઉતર્યા પછી નજીકમાં આવેલી કપડાની ઈસ્ત્રીની દુકાન પાસે પહોંચ્યા હતા અને ત્યાંથી કપડા લઈને પોતાના ઘર તરફ પગપાળા જતા હતા ત્યારે અચાનક એક શખ્સ દોડીને આવ્યો હતો અને તેણે વૃદ્ધાના ગળામાંથી પોણા ત્રણેક તોલાના સોનાના ચેઈનની વીજળીક ઝડપે ઝૂંટ મારી દોટ મૂકી હતી અને અગાઉથી તૈયાર ઉભેલી ચાલુ રિક્ષામાં બેસી ગયો હતો અને રિક્ષા પુરપાટ ઝડપે નાસી ગઈ હતી. હેબતાયેલા વૃદ્ધ દંપતીએ બૂમો પાડી હતી પરંતુ રિક્ષા નાસી છૂટી હતી. પોલીસ કંટ્રોલને જાણ કરવામાં આવતા સિટી એ ડિવિઝનનો પોલીસ કાફલો ધસી આવ્યો હતો. દંપતીમાંથી વૃદ્ધે આ શખ્સ જે રિક્ષામાં તેઓ અગાઉ બેઠા હતા અને ખંભાળિયા નાકા પાસે ઉતર્યા હતા તેમાં હતો તેવી શક્યતા વ્યકત કરી છે. પોલીસે ગુન્હો નોંધવાની તજવીજ હાથ ધરી છે.

જો આપને આ પોસ્ટ ગમી હોય તો શેર કરો...