જામનગરમાં મહારાષ્ટ્રના યુવાનને ડિજીટલ એરેસ્ટ કરી પડાવી લેવાયા પા કરોડથી વધુની રકમ

Author: નોબત સમાચાર

જામનગરમાં મહારાષ્ટ્રના યુવાનને ડિજીટલ એરેસ્ટ કરી પડાવી લેવાયા પા કરોડથી વધુની રકમ

પાર્સલમાં ડ્રગ્સ નીકળ્યો હોવાનું કહી ડરાવ્યા હતાઃ

જામનગર તા. ૧૧: જામનગરમાં વસવાટ કરતા મૂળ મહારાષ્ટ્રના એક યુવાનને સવા વર્ષ પહેલાં ડિજીટલ એરેસ્ટ કરી કેટલાક શખ્સોએ રૂ. ર૬ લાખ ૯૦ હજાર પડાવી લીધાની સાયબર ક્રાઈમ પોલીસ સ્ટેશનમાં ફરિયાદ કરવામાં આવી છે.

જામનગરમાં જનતા ફાટકથી ગોકુલનગર તરફના માર્ગ પર શાંતિ હાર્મની એપાર્ટમેન્ટમાં રહેતા મૂળ નાગપુરમાં ગણેશ ક્રિષ્નાજી ઠાકરે નામના આસામીએ સાયબર ક્રાઈમ પોલીસ સ્ટેશનમાં ફરિયાદ નોંધાવી અજાણ્યા શખ્સોએ પોતાની પાસેથી ડિજીટલ એરેસ્ટ કરી રૂ. ર૬ લાખ ૯૦ હજાર પડાવી લીધાનું જણાવ્યું છે.

આ યુવાનને સવા વર્ષ પહેલાં અજાણ્યા શખ્સે ફોન કરીને તમારૂ પાર્સલ આવ્યું છે અને તેમાં ડ્રગ્સ છે તેમ કહી ડિજીટલ એરેસ્ટ કરી ગભરાવ્યા હતા અને હેબતાઈ ગયેલા ગણેશ ઠાકરે પાસેથી રૂ. ૧૮ લાખ ઓનલાઈન ટ્રાન્સફર કરાવી લીધા હતા. ત્યારપછી ક્રાઈમ બ્રાંચના ઓફિસર તરીકેની ઓળખ આપતા શખ્સોએ વધુ રૂ. ૮ લાખ ૯૦ હજાર મેળવી લીધા હતા. સમયાંતરે આ યુવાનને પોતાની સાથે ઠગાઈ થઈ હોવાનંુ જણાઈ આવતા તેણે સાયબર ક્રાઈમ પોલીસ સ્ટેશનમાં ફરિયાદ કરી છે. પોલીસે તપાસ આરંભી છે.

જો આપને આ પોસ્ટ ગમી હોય તો શેર કરો...