અમેરીકામાં રહેતાં મુળ મહેસાણાના બે યુવાનોની ગોળીમારી કરી હત્યાઃ લૂંટ કરવાના ઈરાદે આવેલા શખ્સોએ સ્ટોરમાં ઘૂસી કર્યું ફાયરીંગ / ઈન્દોરમાં રમાય રહેલી ભારત-બાંગ્લાદેશ વચ્ચેની પ્રથમ ટેસ્ટમાં ભારતની ભવ્ય વિજયઃ એક ઈનીગ્સ અને ૧૩૦ રન થી ભારતનો વિજયઃ મોહમ્મદ શામીએ ઝડપી ચાર વિકેટ / 

જુવેનાઈલ ડાયાબિટીસ ફાઉન્ડેશન ડાયાબિટીસ પીડિત બાળકો માટે સેવારતઃ રમણીકલાલ ચાંગાણી

ડાયાબિટીસને રાજરોગ કહેવામાં આવે છે કારણકે તે હઠીલો રોગ છે અને એક વખત થયા પછી લગભગ આજીવન તે દર્દીનો પીછો છોડતું નથી ડાયાબિટીસ નિયંત્રિત કરવામાં દવાઓનું નિયમિત સેવન તથા ખાન-પાનની પરેજી અનિવાર્ય છે. ડાયાબિટીસ થાય એટલે દર્દીએ તેની દવાઓ માટે કાયમી ધોરણે અલગથી બજેટ ફાળવવું પડે તેવી સ્થિતિ સર્જાય છે. આ વાત ટાઈપ-ટુ ડાયાબિટીસના દર્દીઓની છે એટલે કે ૪૦ વર્ષ કે એ પછી  વારસાગત તેમજ વધુ પડતા મીઠાશપૂર્ણ ભોજનના સેવનથી તથા ડાયાબિટીસ અને ટાઈપ-ટુ ડાયાબિટીસ કહેવાય છે. જ્યારે ટાઈપ-વન ડાયાબિટીસ બાળકોને થતો રોગ છે. જે બાળકોની પેન્ક્રીઆસગ્રંથી કાર્યરત ન હોય તેમને ટાઈપવન ડાયાબિટીસ રોગ થયો કહેવાય છે.

ટાઈપ વન ડાયાબિટીસના દર્દીને નિયમિત ઈન્સ્યુલીનના ઈન્જેકશનો લેવા પડે છે. માટે જ આવા દર્દીઓએ આજીવન સાવધાની રાખવી પડે તેમજ તેમના પર દવાઓનો મોટો આર્થિક બોજ પડે છે. ખાસ કરીને યુવાની સુધી ટાઈપ વન પીડિત બાળકોને સતત સારવાર આપવા ઉપરાંત તેમને આજીવન ડાયાબિટીસ સાથે જીવવા માનસિક રીતે તૈયાર કરવા એક મોટો પડકાર હોય છે.

આ પડકાર સરળતાથી પાર કરી શકાય એ માટે જામનગરની આઈ.ટી.આઈ.માં સુપરવાઈઝર ઈન્સ્ટ્રકટર તરીકે સેવારત રમણીકલાલ ડી. ચાંગાણીએ વર્ષ ૨૦૦૬માં જુવેનાઈલ ડાયાબિટીસ ફાઉન્ડેશનની સ્થાપના કરી હતી. છેલ્લા ૧૪ વર્ષથી આ સંસ્થા જામનગર જિલ્લા તથા આસપાસ પંથકના ડાયાબિટીસ પીડિત બાળકો માટે ભગીરથ સેવા કાર્ય કરી રહી છે. રમણીકભાઈએ 'નોબત' કાર્યાલયની મુલાકાત લઈ 'નોબત'ના તંત્રી પ્રદીપભાઈ માધવાણી, દર્શકભાઈ માધવાણી તથા પત્રકાર આદિત્ય સાથે જુવેનાઈલ ડાયાબિટીસ ફાઉન્ડેશનની સ્થાપના થી લઈ અત્યાર સુધીની સફર તેમજ તેના કારણે અનેક ડાયાબિટીસ પીડિત બાળકોના જીવનમાં આવેલા 'સંજીવની પરિવર્તન' અંગે વિગતવાર વાત કરી બાલદિન તથા વર્લ્ડ-ડાયાબિટીસ ડે નિમિત્તે પ્રાસંગિક ગોષ્ઠી કરી હતી.

લગભગ દોઢ દાયકા પૂર્વે રમણીકભાઈની ૨ વર્ષીય પુત્રીને ડાયાબિટીસ ટાઈપ વન હોવાનું નિદાન થતા તેમણે જી.જી.હોસ્પિટલમાં તેની સારવાર કરાવી પરંતુ પુત્રીના શરીરમાં સ્યુગરનું પ્રમાણ અનિયંત્રિત રહેતા રમણીકભાઈએ નિષ્ણાત તબીબોનું માર્ગદર્શન મેળવી જાતે ડાયાબિટીસ ટાઈપ વન રોગ વિશે અભ્યાસ અને સંશોધન આરંભ કર્યો. પુત્રીનું ડાયાબિટીસ કંટ્રોલમાં આવ્યા પછી પ્રતિદિન તેને ઈન્સ્યુલીનના ઈન્જેકશન આપવાનો પડકાર હતો. નાના બાળકોને પ્રતિદિન બે થી ત્રણ વખત ઈન્સ્યુલીન આપવા લાચાર મા-બાપની વેદના તેમજ આર્થિક ભીંસની અનુભૂતિ થતા રમણીકભાઈએ આ દિશામાં સેવા પ્રવૃત્તિ કરવા નિર્ધાર કર્યો.

રમણીકભાઈએ જામનગરમાં ડાયાબિટીસ ટાઈપ વન ધરાવતા બાળકોના માતા-પિતાઓને શોધી ડો.મિતેન મહેતા, સી.એ.કમલેશભાઈ રાઠોડ વગેરે મિત્રોના સહકારથી વર્ષ ૨૦૦૬માં જુવેનાઈલ ડાયાબિટીસ ફાઉન્ડેશનની રચના કરી. જુવેનાઈલ ડાયાબિટીસ ફાઉન્ડેશન એટલે કે જે.ડી.એફ ડાયાબિટીસના બાળદર્દીઓને વિના મૂલ્યે અથવા રાહતદરે ઈન્સ્યુલીન ઈન્જેકશન, ગ્લુકોમીટર વગેરે ઉપલબ્ધ કરાવી તેમને ડાયેટ કંટ્રોલ અંગે પણ માર્ગદર્શન આપે છે.

જે.ડી.એફમાં સૌ પ્રથમ ડાયાબિટીસ પીડીત બાળકનું  રજિસ્ટ્રેશન કરી તેનું આઈ.ડી. બનાવવામાં આવે છે અને તેના આધારે જ બાળકને જરૃરી દવાઓ-ઈન્જેકશનો પૂરા પાડવામાં આવે છે. જે.ડી.એફની સ્થાપના વખતે ૨૫ બાળકોનું રજિસ્ટ્રેશન થયું હતું. હાલ ૩૮૫ બાળદર્દીઓ નોંધાયેલા છે. જેમને ઈન્સ્યુલીન ઈન્જેકશન ગ્લુકોમીટર, ગ્લુકોમીટર સ્ટ્રીપ વગેરે પૂરી પાડવામાં આવે છે.

જે.ડી.એફ રજિસ્ટર્ડ બાળકો માટે વર્ષમાં ચાર-પાંચ કેમ્પો યોજે છે. જેમાં બાળકોને ઈન્સ્યુલીન ઈન્જેકશનો ગ્લુકોમીટર સ્ટ્રીપ વગેરેનો નિયત સમય માટેનો જથ્થો પૂરો થવાનો સમય આવે ત્યારે ફરી કેમ્પ યોજવામાં આવે છે. આમ, સમયાંતરે કેમ્પો યોજાતા રહે છે. આવા કેમ્પોમાં બાળદર્દીઓને જાતે ઈન્જેકશન લેવાની તાલીમ પણ આપવામાં આવે છે. જેના કારણે તેમનામાં આત્મવિશ્વાસ વિકસે છે. કેમ્પની પ્રવૃત્તિઓમાં જી.જી.હોસ્પિટલના ડો.સોનલબેન શાહ તથા તેમની ટીમનો અવિરત સહકાર મળે છે.

૩૮૫ દર્દીઓ સાંભળવામાં નાનો આંકડો લાગે પરંતુ આ બાળકોને આખા વર્ષ માટે ઈન્જેકશનો આપવાના હોય છે. એક બાળદર્દીની સારવારનો સરેરાશ ૨ હજાર રૃપિયા માસિક ખર્ચ આવે છે. ૩૮૫ બાળદર્દીની વર્ષભરની સારવારનો ખર્ચ ૧ કરોડને આસપાસ પહોંચી જાય છે. એટલે જ જે.ડી.એફ.ની સેવા ભગીરથ સેવાની શ્રેણીમાં મૂકવી ઘટે છે. એ માટે જે.ડી.એફ.ને સેવાભાવી સંસ્થાઓ તથા માનવતાવાદી દાતાઓનો આર્થિક સહયોગ સતત મળતો રહે છે. સંસ્થાને મળતું દાન ડોનેશન આઈ.ટી.એક્ટની કલમ ૮૦જી અંતર્ગત કરમુક્ત છે.

જે.ડી.એફ.ને સહયોગ આપનાર ડાયાકેર (અમદાવાદ), જામનગર બ્રહ્મક્ષત્રિય સમાજની વાડી, જામનગર લેઉવા પટેલ સેવા સમાજ, જી.જી.હોસ્પિટલ વગેરેનો ઋણ સ્વીકાર કરી રમણીકભાઈ સાથી મિત્રો રમેશભાઈ પાંચાણી, અરવિંદભાઈ ઝવેરી, ઉષાબેન શારડા, મનસુખભાઈ ટીંબડીયા, નથુભાઈ સભાયા, મનુભાઈ વગેરેની સેવાને પણ બિરદાવે છે.

જે.ડી.એફ.ની સ્થાપના સમયે નોંધાયેલા બાળ દર્દીઓ આજે યુવાન થઈ ગયા છે. કોઈ ડોક્ટર થઈ ગયું છે તો કોઈ સારી જોબ કરી રહ્યું છે. ઘણાએ દાંપત્યજીવનનો આરંભ કરી દીધો છે. આ લોકો જ હવે જે.ડી.એફ.માં નોંધાતા બાળદર્દીઓને તાલીમ આપવાનું તથા તેમની સેવા કરવાનું કાર્ય કરી રહ્યા છે. એટલે કે આ અનોખા સેવાયજ્ઞ સેકન્ડ જનરેશન સુધી પહોંચ્યો છે.

જે.ડી.એફ.ના ફાઉન્ડર તથા મેનેજિંગ ટ્રસ્ટી રમણીકભાઈનું લક્ષ્ય જામનગરમાં ડાયાબિટીસ કેર એન્ડ રિસર્ચ સેન્ટર કાર્યરત કરવાનું છે. આ માટે તેઓ સતત પ્રયાસરત પણ છે. તેમનો આ પ્રયાસ પણ સફળ થશે જ એ નિશ્ચિત છે. કારણકે જે પ્રયાસનો ઉદ્દેશ્ય ઉત્તમ હોય તે પ્રયાસ સફળ બનાવવા ઈશ્વર સ્વયં ઉત્સુક હોય છે.

ડાયાબિટીસ ટાઈપ વનથી પીડિત બાળકોના પરિવારજનો જે.ડી.એફ.માં રજિસ્ટ્રેશન કરાવવા રમણીકલાલ ચાંગાણી (મો. ૭૩૮૩૯૫૬૩૫૧)નો નિઃસંકોચ સંપર્ક સાધી શકે છે.

હવામાન

weather

શબ્દવ્યુહ

MARKET

માર્કેટ યાર્ડ - હાપા, જામજોધપુર, જામનગર બ્રાસ સીટી:

માર્કેટ યાર્ડ - હાપા   ઘઉં ....242 ...383 । મગ ....800 ...1680 । લસણ ....160 ...805 । ચણા। ....160 ...805   માર્કેટ યાર્ડ - જામજોધપુર   કપાસ। ....780 ...937 । જીરૂ। ....2600 ...3125 । અરેંડા। ....650 ...729   જામનગર બ્રાસ સીટી   બ્રાસ હાની ઢાંળો ...315.00 । બ્રાસ હાની વાસંણ ...327.00 । બ્રાસ હાની પાઈપ ...329.00 । બ્રાસ વિલાયતી ....310.00
close
Nobat Subscription