વડોદરાની કલેક્ટર કચેરીને બોમ્બથી ઊડાવી દેવાની ધમકીથી તંત્રમાં દોડધામ

Author: નોબત સમાચાર

વડોદરાની કલેક્ટર કચેરીને બોમ્બથી ઊડાવી દેવાની ધમકીથી તંત્રમાં દોડધામ

કર્મચારીઓને અડધા દિવસની રજાઃ તપાસનો ધમધમાટ

વડોદરા તા. ૧૮: અમદાવાદ પછી વડોદરામાં કલેક્ટર કચેરીને બોમ્બથી ઊડાડી દેવાની ધમકી આપતો ઈ-મેઈલ મળ્યા પછી તંત્રમાં દોડધામ મચી છે, અને તપાસ શરૂ થઈ છે.

વડોદરા શહેરના દિવાળીપુરા વિસ્તારમાં આવેલી જિલ્લા કલેક્ટર કચેરીને આજે એક નનામા ઈ-મેઈલ દ્વારા બોમ્બથી ઊડાવી દેવાની ધમકી મળતા સમગ્ર સરકારી તંત્ર અને પોલીસ બેડામાં ભારે દોડધામ મચી ગઈ છે.

આ ધમકીના પગલે સાવચેતીના ભાગરૂપે કલેક્ટર કચેરીને તાત્કાલિક અસરથી ખાલી કરાવી દેવામાં આવી છે. મળતી વિગતો અનુસાર આજે સવારે કલેક્ટર કચેરીના સત્તાવાર ઈ-મેઈલ આઈડી પર એક ધમકીભર્યો મેસેજ આવ્યો હતો. આ મેલમાં સ્પષ્ટ લખવામાં આવ્યું હતું કે, કચેરીના પરિસરમાં બોમ્બ મૂકવામાં આવ્યો છે અને આજે બપોરે ૧ વાગ્યે તેમાં વિસ્ફોટ થશે.

આ મેલ વાચતાની સાથે જ અધિકારીઓના હોશ ઊડી ગયા હતાં અને તાત્કાલિક પોલીસને જાણ કરવામાં આવી હતી. ધમકી મળતાની સાથે જ શહેરના ઉચ્ચ પોલીસ અધિકારીઓ સહિતનો મોટો કાફલો ઘટના સ્થળે દોડી આવ્યો હતો. કોઈપણ જાનહાનિ ન થાય તે માટે કચેરીના તમામ વિભાગોને તાત્કાલિક ખાલી કરાવવામાં આવ્યા હતાં. પરિસ્થિતિની ગંભીરતા જોતા તમામ કર્મચારીઓને અડધા દિવસની રજા આપી દેવામાં આવી હતી અને પરિસરની બહાર મોકલી દેવાયા હતાં.

બોમ્બ સ્ક્વોડ અને ડોગ સ્ક્વોડની મદદથી કચેરીના એક-એક ખૂણાની તપાસ કરવામાં આવી રહી છે. પોલીસના જણાવ્યા મુજબ બપોરે ૧ વાગ્યાના સમયને ધ્યાનમાં રાખીને અત્યંત સાવધાનીપૂર્વક સર્ચ ઓપરેશન હાથ ધરવામાં આવ્યું હતું.

જો કે, હજુ સુધી તપાસ દરમિયાન પરિસરમાંથી કોઈ વાંધાજનક કે વિસ્ફોટક સામગ્રી મળી આવી નથી. તેમ છતાં સુરક્ષાના કારણોસર હજુ પણ તપાસ ચાલુ રાખવામાં આવી છે. આ ગંભીર મામલે સાયબર ક્રાઈમ બ્રાન્ચ પણ એક્ટિવ થઈ છે. ઈ-મેઈલ ક્યાંથી આવ્યો અને કોણે મોકલ્યો તેની તપાસ ટેકનિકલ સર્વેલન્સની મદદથી કરવામાં આવી રહી છે. કોઈએ તોફાન કરવા માટે કે જાણી જોઈને ભય ફેલાવવા માટે આ કૃત્ય કર્યું છે કે કેમ તે દિશામાં પણ પોલીસે તપાસ તેજ કરી છે.

જો આપને આ પોસ્ટ ગમી હોય તો શેર કરો...