કાલાવડ માર્કેટીંગ યાર્ડમાં મગફળી ઠલવવા આવેલા વાહનચાલકને ઝીંકી દેવાયો પથ્થર

Author: નોબત સમાચાર

કાલાવડ માર્કેટીંગ યાર્ડમાં મગફળી ઠલવવા આવેલા વાહનચાલકને ઝીંકી દેવાયો પથ્થર

સામાપક્ષે પણ ફડાકા ઝીંક્યાની કરી રાવઃ

જામનગર તા. ૧૫: કાલાવડના માર્કેટ યાર્ડમાં ગઈકાલે માલ ખાલી કરવા આવેલા બે વાહનચાલક વચ્ચે ભાડા બાબતે ગેરસમજ થયા પછી સામસામા હુમલાની પોલીસમાં ફરિયાદ કરાઈ છે. પોલીસે બંને ફરિયાદ પરથી તે શખ્સ સામે હુમલો કરવા અંગે ગુન્હો નોંધ્યો છે.

કાલાવડ તાલુકાના નાના પાંચ દેવડા ગામમાં રહેતા સાજીદ હારૂનભાઈ મલેકના ગામના ખેડૂત હીરેનભાઈએ પોતાની મગફળી યાર્ડમાં પહોંચાડવા માટે જાગાભાઈ નામના આસામીનું બોલેરો માલવાહક વાહન રાખ્યું હતું. તે મગફળી ખાલી કરવા માટે સાજીદભાઈ ગઈકાલે બપોરે છતર ગામના રોડ પર પહોંચ્યા ત્યારે જાગાભાઈ મગફળીનો જથ્થો ત્યાં હાર્દિક પરસોત્તમભાઈ તાળા ઉર્ફે ડિમ્પલ નામના શખ્સના વાહનમાં ખાલી કરીને નીકળી ગયા હતા.

આ વેળાએ ભાડાની વાત કરી ન હોવા છતાં હાર્દિક તાળાએ રૂ.અઢી હજારની માગણી હીરેનભાઈ પાસે કરતા સાજીદભાઈ તથા જાગાભાઈ આ બાબતે વાત કરવા માટે છતર ગામે ગયા હતા. જ્યાં હાર્દિકે ગાળો ભાંડી પથ્થર ઉપાડી સાજીદભાઈને કાન પાસે ઝીંકી દીધો હતો તેની ફરિયાદ કાલાવડ ગ્રામ્ય પોલીસ મથકમાં કરાઈ છે.

આ ફરિયાદની સામે હાર્દિક પરસોત્તમભાઈ તાળા ઉર્ફે ડિમ્પલે વળતી ફરિયાદ નોંધાવી તેમાં જણાવ્યંુ છે કે, તેઓ ગઈકાલે બપોરે કાલાવડ યાર્ડમાં માલ ખાલી કરવા માટે પોતાનો મીની ટ્રક લઈને ગયા ત્યારે જાગાભાઈએ પોતાના બોલેરોમાં રહેલી મગફળી ભાડા અંગે ચર્ચા કર્યા પછી હાર્દિકના મીની ટ્રકમાં ઠલવી હતી તે પછી ભાડા અંગે વાત કરતા નાના પાંચદેવડાના સાજીદ નામના શખ્સે ત્રણ-ચાર ફડાકા ઝીંકી માર મારવા ઉપરાંત પતાવી દેવાની ધમકી આપી હતી. પોલીસે બંને ફરિયાદ રજીસ્ટરે લીધી છે.

જો આપને આ પોસ્ટ ગમી હોય તો શેર કરો...