ભાણખોખરીના પાટીયે જઈ રેટા કાલાવડના યુવાનનું વિષપાનઃ મૃત્યુ નિપજતા અરેરાટી

Author: નોબત સમાચાર

ભાણખોખરીના પાટીયે જઈ રેટા કાલાવડના યુવાનનું વિષપાનઃ મૃત્યુ નિપજતા અરેરાટી

નશાની હાલતમાં અવેડામાં પડી જતાં યુવકનું મૃત્યુઃ

જામનગર તા. ૧૮: ભાણવડના રેટા કાલાવડ ગામના એક યુવાને ગઈકાલે ભાણખોખરી ગામના પાટીયા પાસે જઈ મોટરમાં કોઈ ઝેરી દવા પી લેતા તેઓનું મૃત્યુ નિપજયું છે. જ્યારે દ્વારકા એક યુવાન નશાની હાલતમાં પાણી ભરેલા અવેડામાં પડી ગયા પછી ડૂબી જવાથી મોતને શરણ થયા છે.

દેવભૂમિ દ્વારકા જિલ્લાના ભાણવડ તાલુકાના રેટા કાલાવડ ગામમાં રહેતા રામભાઈ વેજાણંદભાઈ કરમુર નામના વૃદ્ધના પુત્ર વિરમભાઈ (ઉ.વ.૩૦) સોમવારે સાંજે ભાણખોખરી ગામના પાટીયા પાસે પોતાની મોટરમાં પહોંચ્યા હતા.

ત્યાં જઈ વિરમભાઈએ કોઈ અગમ્ય કારણથી ઝેરી દવા ગટગટાવી લીધી હતી. આ યુવાનને મોટરમાંથી બહાર કાઢી સારવાર માટે ખસેડવાની તજવીજ કરાઈ હતી પરંતુ સારવાર કારગત નિવડે તે પહેલાં વિરમભાઈનુું મૃત્યુ નિપજ્યું છે. રામભાઈએ પોલીસને જાણ કરી છે.

દ્વારકા શહેરના ટીવી સ્ટેશન રોડ પર ગોવાળીયાધામ પાછળ રહેતા વેજાભા લાખાભા માણેક ઉર્ફે બબુભા (ઉ.વ.ર૭) નામના યુવાન પોતાની નશો કરવાની ટેવ મુજબ રવિવારે રાત્રે દારૂનો નશો કરી પ્રાથમિક શાળા પાસેથી જતા હતા ત્યારે કોઈ રીતે ત્યાં પાણી ભરેલા અવેડામાં પડી ગયા હતા. આ યુવાનનું ડૂબી જવાથી મૃત્યુ નિપજ્યું છે. તેમના મોટાભાઈ ખીમાભા લાખાભાએ પોલીસને જાણ કરી છે.

જો આપને આ પોસ્ટ ગમી હોય તો શેર કરો...