જામનગરમાં લઘુતમ તાપમાન ૧૩ ડીગ્રીઃ ઠંડી વધી

Author: નોબત સમાચાર

જામનગરમાં લઘુતમ તાપમાન ૧૩ ડીગ્રીઃ ઠંડી વધી

છેલ્લા ત્રણ દિવસમાં ત્રણ ડીગ્રીના ઘટાડા સાથે

જામનગર તા. ૧૮: ઉત્તર ભારતના હિમ જેવા ઠંડા પવનના આગમનના પગલે સમગ્ર ગુજરાતમાં શિયાળાએ ગતિ પકડી લીધી છે. કચ્છ, સૌરાષ્ટ્ર, હાલાર તથા ઉત્તર ગુજરાતમાં વધારે ઠંડી પડી રહી છે.

જામનગર સહિત સમગ્ર હાલાર પંથકમાં ઠંડીનું જોર દિન-પ્રતિદિન વધી રહ્યું છે. નગરમાં ત્રણ દિવસમાં લઘુતમ તાપમાનનો પારો ત્રણ ડીગ્રી સુધી નીચે શરકીને ૧૩ ડીગ્રીએ પહોંચી ગયો હતો અને છેલ્લા ચોવીસ કલાકમાં પોણા ડીગ્રીથી વધુ ઘટીને મહત્તમ તાપમાન ૩૦ ડીગ્રી નોંધાયું હતું. ઉત્તર ભારતમાંથી આવતા ઠંડા પવન અને તાપમાનમાં થયેલા ઘટાડાના પગલે ઠંડીમાં ધીમે ધીમે વધારો થઈ રહ્યો છે. સમીસાંજથી વાતાવરણમાં ઠંડક પ્રસરવા લાગે છે. ગ્રામ્ય વિસ્તારો તથા ધોરીમાર્ગ પર રાતથી લઈને વહેલી સવાર સુધી વધારે ઠંડી અનુભવાઈ રહી છે. ઠંડી સામે રક્ષણ મળે તે માટે પ્રજાજનોને ગરમ કપડામાં લપેટાવાની ફરજ પડી હતી. સૂર્યદેવતા ઉદીત થયા પછી ધીમે-ધીમે વાતાવરણમાંથી ઠંડીનું જોર ઘટી જવા પામ્યું હતું.

જામનગરમાં મંગળવારે સવારે પૂરા થતાં ચોવીસ કલાક દરમિયાન આંશિક ઘટીને વાતાવરણમાં ભેજનું પ્રમાણ પ૧ ટકા રહ્યું હતું. પવનની ગતિ પ્રતિકલાકની સરેરાશ પ થી ૧૦ કિ.મી.ની રહેવા પામી હતી.

જો આપને આ પોસ્ટ ગમી હોય તો શેર કરો...