ચૂંટણીના વેરઝેરના કારણે સરપંચ પર હુમલોઃ સ્વબચાવમાં કરાયું હવાઈ ફાયરીંગ

Author: નોબત સમાચાર

ચૂંટણીના વેરઝેરના કારણે સરપંચ પર હુમલોઃ સ્વબચાવમાં કરાયું હવાઈ ફાયરીંગ

લાકડી મારી ત્રણ શખ્સે રિવોલ્વર ઝૂંટવી લીધીઃ

જામનગર તા. ૧૪ઃ જામજોધપુરના વરવાળા ગામના એક વૃદ્ધ સરપંચની ચૂંટણીમાં વિજેતા થતાં ઉમેદવારી કરી હાર મેળવનાર એક મહિલાના ત્રણ પુત્રએ ગઈકાલે લાકડીઓથી હુમલો કર્યાે હતો. સરપંચે લાયસન્સવાળી રિવોલ્વરમાંથી સ્વબચાવમાં ફાયરીંગ કરતા લાકડી ઝીંકી રિવોલ્વર ઝૂટવી લેવાઈ હતી. જ્યારે જામજોધપુરમાં કાકા-ભત્રીજાને બે શખ્સે ઢીકાપાટુથી માર મારી જ્ઞાતિ પ્રત્યે હડધૂત કર્યા હતા.

જામજોધપુરના વરવાળા ગામના રામશીભાઈ મેપાભાઈ બેરાએ તાજેતરમાં યોજાયેલી ગ્રામ પંચાયતની ચૂંટણીમાં સરપંચપદ માટે ઉમેદવારી કર્યા પછી તેઓ વિજેતા થયા હતા. બાલુભાઈ દેવાભાઈ મોરીના માતાએ પણ ઉમેદવારી કરી હતી. તેઓની સામે જીત મળતા આ બાબતનો ખાર રાખી ગઈકાલે સવારે ભડાનેસ પાસે જ્યારે રામશીભાઈ તથા સરમણ રાજાભાઈ હુણ બાઈક પર જતા હતા ત્યારે લાકડીઓ સાથે ધસી આવેલા બાલુભાઈ મોરી, પ્રફુલ દેવાભાઈ, દુદા દેવાભાઈ મોરી નામના ત્રણ શખ્સે હુમલો કર્યાે હતો. આ વેળાએ રામશીભાઈએ સ્વબચાવમાં પોતાની પાસે રહેલી રિવોલ્વરમાંથી હવામાં ફાયરીંગ કર્યું હતું. આ વેળાએ ત્રણેય શખ્સે લાકડી ઝીંકી રિવોલ્વર ઝૂટવી લીધી હતી. જામજોધપુર પોલીસ સ્ટેશનમાં રામશીભાઈએ ફરિયાદ નોંધાવી છે.

જામજોધપુરના આંબેડકર ચોકમાં વસવાટ કરતા અમિતભાઈ કિરીટભાઈ સોલંકી નામના યુવાન શનિવારે બપોરે જામજોધપુરમાં બહુચરાજી મંદિર પાસે પુલ પરથી પસાર થતા હતા. ત્યારે તેઓનું બાઈક રોડ વચ્ચે કોઈ કારણથી બંધ પડી જતા તેઓ તેને ચાલુ કરી કરી રહ્યા હતા. આ વેળાએ ત્યાં ધસી આવેલા અશ્વિન કાંજિયા નામના શખ્સે મોટરસાયકલ સાઈડમાં રાખ તેમ કહી ગાળો ભાંડી હતી અને ફડાકો ઝીંક્યો હતો.

આ વેળાએ ઝપાઝપી થતા અશ્વિનની સાથે અશોક કાંજિયા નામનો શખ્સ પણ જોડાયો હતો. આ શખ્સે અમિતનો કાઠલો પકડી લઈ પછાડ્યો હતો. આ વેળાએ અમિતના કાકા વિજયભાઈ વચ્ચે પડ્યા હતા તેઓને જ્ઞાતિ પ્રત્યે હડધૂત કરી ઢીકાપાટુનો માર મારી અશ્વિન તથા અશોક કાંજિયાએ ધમકી આપી હતી.

જો આપને આ પોસ્ટ ગમી હોય તો શેર કરો...