જામનગર સહિત સમગ્ર રાજ્યના મેડિકલ સ્ટોર્સનું ચેકીંગ

Author: નોબત સમાચાર

જામનગર સહિત સમગ્ર રાજ્યના મેડિકલ સ્ટોર્સનું ચેકીંગ

ફુડ એન્ડ ડ્રગ્સ વિભાગના સંકલનમાં રહીને પોલીસ દ્વારા

જામનગર તા.૧૦: ફૂડ એન્ડ ડ્રગ વિભાગના સંકલનમાં રહીને ડીવાયએસપી/ડીસીપીના સુપરવિઝન હેઠળ પોલીસે રાજ્યવ્યાપી ચેકીંગ શરૂ કર્યું છે. રાજ્યમાં નશાકારક દવાઓના દુરુપયોગ અને ગેરકાયદેસર વેચાણને રોકવા મેગા સર્ચ હાથ ધરાયું છે. જામનગરના ૬૬ મેડિકલ સ્ટોર્સમાં ચેકીંગ કરાયું છે.

રાજ્યમાં નશાકારક દવાઓના દુરુપયોગ અને ગેરકાયદેસર વેચાણને રોકવા માટે ગૃહ રાજ્યમંત્રી હર્ષ સંઘવી અને રાજ્યના પોલીસ વડા વિકાસ સહાયની સૂચનાથી ગઈકાલે બપોરે ૧૨ વાગ્યાથી રાજ્યભરના મેડિકલ સ્ટોર્સ માં ગુજરાત પોલીસ દ્વારા મેગા ચેકિંગ અભિયાન હાથ ધરવામાં આવ્યું હતું. આ ચેકીંગ અભિયાનનો મુખ્ય હેતુ નાર્કોટિક ડ્રગ્સ એન્ડ સાયકોટ્રોપિક સબસ્ટન્સ (એનડીપીએસ) એક્ટ હેઠળ આવરી લેવાતી દવાઓનું પ્રિસ્ક્રિપ્શન વગર વેચાણ, પ્રતિબંધિત દવાઓનો જથ્થો, નિયમોની વિરુદ્ધ વધુ પડતો દવાઓનો સંગ્રહ અને મેડિકલ સ્ટોર્સ દ્વારા રાખી ન શકાય તેવી દવાઓના વેચાણને અટકાવવાનો તથા નશાકારક દવાઓનું પ્રિસ્ક્રિપ્શન વગર વેચાણ અટકાવવાનો છે.

આ મેગા ચેકીંગ અભિયાનમાં રાજ્યના તમામ શહેરો અને જિલ્લાઓમાં સ્થાનિક પોલીસ મથકના ઈનચાર્જ, લોકલ ક્રાઈમ બ્રાન્ચ (એલ.સી.બી.), સ્પેશિયલ ઓપરેશન ગ્રૂપ (એસ.ઓ.જી.) અને જિલ્લા ફૂડ એન્ડ ડ્રગ વિભાગના અધિકારીઓના સંકલનમાં વ્યાપક ચેકિંગ હાથ ધરવામાં આવ્યું હતું.

આ કાર્યવાહી ડીવાયએસપીના સુપરવિઝન હેઠળ ચલાવવામાં આવી હતી, જેમાં તમામ પોલીસ સ્ટેશનના ઇન્ચાર્જ અધિકારીઓએ અલગ-અલગ ટીમો બનાવીને મેડિકલ સ્ટોર્સમાં દરોડા પાડી બારીક ચેકીંગ કરવામા આવ્યું હતું. આ ચેકિંગમાં ખાસ કરીને શાળાઓ, કોલેજો અને શૈક્ષણિક સંસ્થાઓની નજીક આવેલી મેડિકલ સ્ટોર્સ પર ધ્યાન કેન્દ્રિત કરવામાં આવ્યું હતું., જ્યાં નશાકારક દવાઓના દુરુપયોગની શક્યતા વધુ હોય છે.

ખાસ કરીને જે દવા કન્ટેન્ટનો નશા માટે દુરુપયોગ થઈ શકે છે, તેનું પ્રિસ્ક્રિપ્શન વગર વેચાણ થતું હોવાનું જણાય તો કડક કાર્યવાહી કરવામાં આવી હતી. જેમાં અમુક દવાઓ ફક્ત ડોક્ટરના પ્રિસ્ક્રિપ્શન સાથે જ વેચાવી જોઈએ, અને તેનું ગેરકાયદેસર વેચાણ આરોગ્ય અને સમાજ માટે ગંભીર જોખમ ઉભું કરે છે.

બપોરે ૧૨ વાગ્યેથી રાજ્યવ્યાપી શરૂ કરેલા આ ચેકીંગ અભિયાન અંતર્ગત જામનગરમાં ૬૬ મેડિકલ સ્ટોર્સમાં ચેકીંગ કરવામાં આવ્યું હતું. આ અભિયાન રાજ્યના તમામ શહેરો અને જિલ્લાઓમાં એકસાથે હાથ ધરવામાં આવ્યું હતું.

જો આપને આ પોસ્ટ ગમી હોય તો શેર કરો...