ખંભાળીયામાં અનેક સ્થળે પ્રાચીન ગરબીઓ દ્વારા આદ્યશક્તિની આરાધનાઃ નવરાત્રિ ઉત્સવ

Author: નોબત સમાચાર

ખંભાળીયામાં અનેક સ્થળે પ્રાચીન ગરબીઓ દ્વારા આદ્યશક્તિની આરાધનાઃ નવરાત્રિ ઉત્સવ

શહેરમાં અનેક સ્થળે પ્રાચીન-પરંપરાગત ગરબી યોજાય છે

ખંભાળીયા તા. ૨૩: ખંભાળીયા શહેરમાં શરૂ તયેલ નવરાત્રિમાં ખેલૈયાઓએ તથા નાની બાળાઓ પ્રાચીન ગરબી મંડળમાં જોડાવા ઉત્સુક હતી. તથા તેની તડામાર તૈયારીઓ પણ ઘણાં સમયથી શરૂ કરવામાં આવી હતી.

ખંભાળીયામાં લોહાણા મહાજન વાડીમાં હરસિદ્ધિ ગરબા મંડળ, પોળ ગેઈટ પાસે પ્રાચીન ગરબી, શહેરમાં નવાપરા, જે.કે.વી. નગર, તિરૂપતિ સોસાયટી અને શહેરના અનેક વિસ્તારોમાં વર્ષોથી થતી જુની પરંપરાગત ગરબીઓ તથા શહેરમાં વર્ષોથી બ્રહ્મસમાજ દ્વારા થતી પુરૂષોની ગરબી પણ આકર્ષણરૂપ બની છે.

૧૦૦ વર્ષોથી વધુ સમયથી થતી બ્રાહ્મણોની પુરૂષોની ગરબીમાં પ્રાચીન છંદો, ઢોલ, નગારા સાથે ઉત્સાહથી ગાઈને માતાજીની પ્રાર્થના કરાય છે. અહીંના ઔદિચ્ય બ્રહ્મ સમાજ, પુષ્કર્ણા બ્રાહ્મણ, સારસ્વત બ્રાહ્મણ, અબોટી બ્રાહ્મણ, ગુગળી બ્રાહ્મણ ગોહીલવાડી બ્રાહ્મણ તથા નગર ગેઈટ પાસે રામના મંદિરે વર્ષોથી થતી પુરૂષોની ગરબી તથા તેમાં રજુ થતાં આકર્ષણરૂપ વેશભૂષા ખૂબજ પ્રચલિત છે.

ભાટીયા બાલમંદિરમાં રઘુવંશી ગ્રુપ દ્વારા પણ નવરાત્રિનું આયોજન થયું છે, તો ખંભાળીયા પાલિકા દ્વારા રાજ્ય પુરોહિત બોર્ડિંગમાં તથા પશ્ચિમ ગ્રુપ દ્વારા પાળેશ્વર પાસે પણ નવરાત્રિનું આયોજન થયું છે.

જો આપને આ પોસ્ટ ગમી હોય તો શેર કરો...