ધુંવાવ પાસેથી ઈંગ્લીશ દારૂના ચાર ચપલા સાથે ઝડપાયોઃ અન્ય એક પણ ચપલા સાથે પકડાયો

Author: નોબત સમાચાર

ધુંવાવ પાસેથી ઈંગ્લીશ દારૂના ચાર ચપલા સાથે ઝડપાયોઃ અન્ય એક પણ ચપલા સાથે પકડાયો

લતીપરની સીમમાં ધમધમતી દેશી દારૂની ભઠ્ઠી પર પોલીસનો દરોડોઃ

જામનગર તા. ૪: જામનગરના ધુંવાવ ગામ પાસેથી ગઈકાલે સાંજે પેટ્રોલિંગમાં રહેલી પોલીસ ટીમે બે શખ્સને ઈંગ્લીશ દારૂના ચાર-ચાર ચપલા સાથે પકડી પાડ્યા છે. ધ્રોલના લતીપર ગામની સીમમાં ધમધમતી દેશી દારૂની ભઠ્ઠી પર દરોડો પાડવામાં આવ્યો હતો. સંચાલક નાસી ગયો હતો અને સ્થળ પરથી ચાલુ ભઠ્ઠી મળી આવી હતી. આથો, દારૂ, સાધનો કબજે કરાયા હતા.

જામનગર-રાજકોટ ધોરીમાર્ગ પર આવેલા ધુંવાવ ગામ પાસે ગઈકાલે સાંજે પંચકોશી એ ડિવિઝન પોલીસ સ્ટેશનના સ્ટાફ દ્વારા કરવામાં આવી રહેલા પેટ્રોલિંગ દરમિયાન ત્યાંથી પસાર થતાં જાંબુડા ગામના મફત પ્લોટ વિસ્તારમાં રહેતા કાનજી ભુરજીભાઈ વડેચા નામના શખ્સને રોકી તેની તલાશી લેવાઈ હતી. આ શખ્સ પાસેથી ભારતીય બનાવટના અંગ્રેજી શરાબના ચાર ચપલા મળી આવ્યા હતા. પોલીસે ચપલા કબજે કરી ગુન્હો નોંધ્યો છે.

આ સ્થળેથી જ પસાર થતાં હાપાની શિવશક્તિ સોસાયટીમાં રહેતા જીજ્ઞેશ દીપકભાઈ રણોલીયા નામના શખ્સને પણ ઈંગ્લીશ દારૂના ચાર ચપલા સાથે પકડી લેવામાં આવ્યો હતો.

ધ્રોલ તાલુકાના લતીપર ગામની સીમમાં બગલાપાટ વિસ્તારમાંથી જેસા વાલજીભાઈ જખાણીયા નામના શખ્સની દેશીદારૂની ભઠ્ઠી પોલીસે પકડી પાડી છે. આ સ્થળેથી ૧૫૦ લીટર આથો, ૧૯ લીટર તૈયાર દારૂ, રાંધણગેસના બે બાટલા, ચૂલો, નળી સહિત રૂા. ૧૧૭૫૦નો મુદ્દામાલ પોલીસને મળી આવ્યો હતો. પોલીસે ફરાર થઈ ગયેલા જેસા વાલજીભાઈની શોધ શરૂ કરી છે.

જો આપને આ પોસ્ટ ગમી હોય તો શેર કરો...