હાલાર પંથકમાં કાળજું કંપાવતી ઠંડીઃ આજે દોઢ ડીગ્રીના વધારા સાથે લઘુતમ તાપમાન ૧૦ ડીગ્રી

Author: નોબત સમાચાર

હાલાર પંથકમાં કાળજું કંપાવતી ઠંડીઃ આજે દોઢ ડીગ્રીના વધારા સાથે લઘુતમ તાપમાન ૧૦ ડીગ્રી

ગઈકાલે સિઝનનું સૌથી ન્યુનત્તમ તાપમાન ૮.પ ડીગ્રી પછી

જામનગર તા. ૧પઃ ઉત્તર ભારતમાંથી આવતા હિમ જેવા ઠંડા પવનના પગલે ગત્ બુધવારે ૧.૭ ડીગ્રી સુધી નીચે શરકીને ન્યુનત્તમ તાપમાનનો પારો સિઝનમાં પ્રથમ વખત ૮.પ ડીગ્રીએ પહોંચી જતાં સમગ્ર હાલાર પંથકમાં કાળજુ કંપાવતી ઠંડી અનુભવાઈ હતી. ઠંડીનું મોજું ફરી વળતા પ્રજાજનો ઠંડાગાર થઈ ગયા હતાં. તીવ્ર ઠંડીથી લોકો ધ્રુજી ઊઠ્યા હતાં. આજે સવારે પૂરા થતાં ચોવીસ કલાકમાં ૧.પ ડીગ્રીના વધારા સાથે લઘુતમ તાપમાન ૧૦ ડીગ્રી નોંધાયું હતું.

જમ્મુ-કાશ્મીર, ઉત્તરાખંડ અને હિમાચલ પ્રદેશમાં છેલ્લા કેટલાક દિવસોથી બરફવર્ષાનો દોર ચાલી રહ્યો છે, જે ગઈકાલે પણ યથાવત્ રહ્યો હતો. અવિરત હિમવર્ષાથી ઘરો, વૃક્ષો, મેદાનો, માર્ગો પર બરફના થર જામી ગયા છે. અત્ર-તત્ર-સર્વત્ર બરફની સફેદ ચાદર જોવા મળી રહી છે. અવિરત હિમવર્ષાના પગલે ઘણાં માર્ગો બંધ થઈ જતા જનતાને ભારે હાલાકીનો સામનો કરવો પડી રહ્યો છે. તાપમાનનો પારો 'માઈનસ'માં રહેતા તળાવ તથા ઝરણા થીજી ગયા છે. તીવ્ર ઠંડીથી જનજીવન ઠૂંઠવાઈ ગયું છે. ઉત્તર ભારતના પહાડી વિસ્તારોમાંથી આવતા ઠંડા પવનની અસર હરિયાણાથી ગુજરાત સુધી વર્તાઈ રહી છે.

ગુજરાતમાં દિન-પ્રતિદિન ઠંડીમાં વધારો થઈ રહ્યો છે. કચ્છ, રાજકોટ સહિતના ભાગોમાં તાપમાન સિંગલ ડિઝિટમાં નોંધાતા અસહ્ય ઠંડી અનુભવાઈ હતી. જામનગરમાં પણ ગત્ તા. ૧૪-૧-ર૦ર૬ ના બુધવારે લઘુતમ તાપમાનનો પારો ૧.૭ ડીગ્રી સુધી ગગડીને સિઝનમાં પ્રથમ વખત ૮.પ ડીગ્રીએ પહોંચી ગયો હતો. તાપમાનનો પારો સિંગલ ડિઝિટમાં નોંધાતા તીવ્ર ઠંડી અનુભવાઈ હતી. સમગ્ર હાલાર પંથકમાં કાળજુ કંપવતી ઠંડી પડતા પ્રજાજનો ધ્રુજી ઊઠ્યા હતાં. જામનગર અને દેવભૂમિ દ્વારકા જિલ્લો ઠંડોગાર થઈ જતા હાલારીઓને ભારે હાલાકીનો સામનો કરવો પડ્યો હતો.

ઠંડી સામે રક્ષણ મળે તે માટે જનતાએ કામ વગર ઘરની બહાર જવાનું ટાળ્યું હતું. આ ઉપરાંત ગરમ વસ્ત્રો, ગરમ પીણા તથા તાપણાનો સહારો લીધો હતો.

જામનગરમાં આજે સવારે પૂરા થતાં ચોવીસ કલાક દરમિયાન ૧.પ ડીગ્રીના વધારા સાથે લઘુતમ તાપમાન ૧૦ ડીગ્રી, જ્યારે અડો ડીગ્રી ઘટીને મહત્તમ તાપમાન રપ.પ ડીગ્રી નોંધાયું હતું. વાતાવરણમાં ભેજનું પ્રમાણ ૬૩ ટકા રહ્યું હતું. પવનની ગતિ ઘટીને પ્રતિકલાકની સરેરાશ ૧૦ થી ૧પ કિ.મી.ની રહેવા પામી હતી.

જો આપને આ પોસ્ટ ગમી હોય તો શેર કરો...