ભણગોરમાં ખેડૂત દંપતીની હત્યાના પ્રયાસના કેસમાં ત્રણને ત્રણ વર્ષની કેદ

Author: નોબત સમાચાર

ભણગોરમાં ખેડૂત દંપતીની હત્યાના પ્રયાસના કેસમાં ત્રણને ત્રણ વર્ષની કેદ

ખેતરમાં પાણી આવતું હોવાના મુદ્દે થયો હતો હુમલોઃ

જામનગર તા. ૧૯: લાલપુરના ભણગોર ગામમાં પંદર વર્ષ પહેલાં એક દંપતી પર શેઢા પાડોશી પરિવારે લાકડી, કુહાડી, ધારીયાથી હુમલો કરી જીવલેણ ઈજા પહોંચાડી હતી. આ કેસ ચાલી જતાં અદાલતે પતિ, પત્ની સહિત ત્રણને ત્રણ વર્ષની કેદ અને દંડ ફટકાર્યા છે.

લાલપુર તાલુકાના ભણગોર ગામમાં રહેતા દિનેશભાઈ વેલજીભાઈ ચાંગેલા તથા તેમના પત્ની ગઈ તા.૩-૧૦-૧૦ના દિને પોતાના ખેતરમાં પાણી વાળતા હતા ત્યારે શેઢા પાડોશી નરશીભાઈ ગંગદાસ પાડલીયા, રમણીકભાઈ, સંગીતાબેન નરશીભાઈ ધસી આવ્યા હતા. આ વ્યક્તિઓએ તમારા ખેતરનું પાણી અમારા ખેતરમાં આવે છે તેમ કહી ગાળો ભાંડ્યા પછી હુમલો કર્યાે હતો.

આ વેળાએ દિનેશભાઈના માથામાં ધારીયાનો નરશીભાઈએ ઘા ઝીંકતા અને રમણીકભાઈએ કુહાડી વીંઝતા દીનેશભાઈને બચાવવા તેમના પત્ની દક્ષાબેન વચ્ચે પડ્યા હતા. તેઓને સંગીતાબેને લાકડીથી માર માર્યાે હતો. લાલપુર પોલીસ સ્ટેશનમાં દિનેશભાઈ વેલજીભાઈ ચાંગેલાએ ફરિયાદ નોંધાવી હતી. પોલીસે હત્યા પ્રયાસ સહિતની કલમો હેઠળ ગુન્હો નોંધ્યો હતો.

ઉપરોક્ત કેસ જામનગરની સેશન્સ કોર્ટમાં ચાલી જતાં અદાલતે આરોપી નરશીભાઈ ગંગદાસભાઈ પાડલીયા, રમણીકભાઈ પાડલીયા, સંગીતાબેન નરશીભાઈને તક્સીરવાન ઠરાવી અલગ અલગ કલમો હેઠળ આચરેલા ગુન્હા બદલ ત્રણ વર્ષની સખત કેદની સજા તથા દંડ ફટકાર્યા છે. મૂળ ફરિયાદી તરફથી વકીલ રણમલ કાંબરીયા, અભિષેક નંદા, રવિ કરમુર, હિતેશ ગાગીયા તથા સરકાર તરફથી પીપી દીપક ત્રિવેદી રોકાયા હતા.

જો આપને આ પોસ્ટ ગમી હોય તો શેર કરો...