સેન્સેકસમાં પ્રારંભે જ ૨૪૦૦ પોઈન્ટનું ગાબડુઃ રોકાણકારોના ૧૨ લાખ કરોડ સ્વાહા

Author: નોબત સમાચાર

સેન્સેકસમાં પ્રારંભે જ ૨૪૦૦ પોઈન્ટનું ગાબડુઃ રોકાણકારોના ૧૨ લાખ કરોડ સ્વાહા

શેરબજારમાં બ્લેક મન્ડેઃ સવારમાં જ નિફટી પણ ૭૦૦થી વધુ પોઈન્ટ તૂટયોઃ હાહાકાર

મુંબઈ તા. ૯: શેરમાર્કેટ માટે આજે બ્લેક મન્ડે પુરવાર થયો છે. સવારે માર્કેટ ખુલતા જ સેન્સેકસમાં ૨૪૦૦ અને નિફટીમાં ૭૦૦ થી વધુ પોઈન્ટનું ગાબડુ પડયુ હતું. જેથી હાહાકાર મચી ગયો હતો, કારણ કે રોકાણકારોના ૧૨ લાખ કરોડથી વધુ રૂપિયા ગણતરીની સેકન્ડોમાં જ સ્વાહા થઈ ગયા હતાં.

આજે શેરમાર્કેટ માટે બ્લેક મન્ડે પુરવાર થયો છે. અઠવાડિયાના પહેલા ટ્રેડીંગ દિવસે શેરબજાર ખુલ્યાના પાંચ સેકન્ડમાં જ રોકાણકારોએ રૂ।.૧૨ લાખ કરોડ ગુમાવ્યા છે. એશિયામાં વધી રહેલા યુદ્ધ અને ક્રૂડ ઓઇલના આસમાને પહોંચેલા ભાવે વોલ સ્ટ્રીટ પર અરાજકતા ફેલાવી દીધી છે.

ઈરાન અને યુએસ-ઇઝરાયલ વચ્ચેના તણાવે હવે ખતરનાક વળાંક લીધો છે, જેની સીધી અસર વૈશ્વિક અર્થતંત્ર તેમજ આપણા ખિસ્સા પર પડી છે. સેન્સેક્સ અને નિફટી ગગડી ગયા છે, અને દરેક જગ્યાએ ભારે વેચવાલીનું દબાણ જોવા મળી રહૃાું છે.

ભારતીય શેરબજારમાં સપ્તાહના પહેલા ટ્રેડીંગ દિવસે આજે ભારે કડાકો જોવા મળ્યો. સપ્તાહના પહેલા દિવસે ભારે વેચવાલીથી રોકાણકારોમાં ગભરાટ ફેલાયો હતો. પરિણામે, સેન્સેક્સ ૨,૩૮૬ પોઈન્ટ ઘટીને ૭૬,૫૩૨ પર ટ્રેડ થઈ રહૃાો હતો. તેવી જ રીતે, નિફટી ઇન્ડેક્સ ૭૩૫ પોઈન્ટ ઘટીને ૨૩,૭૧૫ પર ટ્રેડ થઈ રહૃાો હતો.

આ દરમિયાન, મધ્ય પૂર્વમાં ઇઝરાયલ, યુએસ અને ઈરાન વચ્ચે યુદ્ધ વધ્યું, અને ક્રૂડ ઓઇલના ભાવ પ્રતિ બેરલ ૧૧૭ સુધી વધી ગયા હતાં. શરૂઆતના ટ્રેડીંગમાં જીઆઈએફટી નિફટી ૭૦૦-૯૦૦ પોઈન્ટ ઘટીને ૭૦૦-૯૦૦ પોઈન્ટ ઘટી ગયો. ૧૦ વાગ્યે સેન્સેકસ ૨૧૯૫ તો નીફટી ૬૬૮ પોઇન્ટ ડાઉન સાથે ૨૩૭૮૨ ઉપર ટ્રેડ કરતો હતો. ''બ્લડબાથ''ને કારણે રોકાણકારોના રૂ।. ૧૨ લાખ કરોડ સ્વાહા થઇ ગયા છે.

ડોલર સામે રૂપિયો પણ ૯૨.૩૦ની નીચલી સપાટી પર પહોંચી ગયા છે. આ અચાનક ઘટાડો નથી. શુક્રવારે પણ બજાર ખરાબ મૂડમાં હતું, જ્યારે સેન્સેક્સ લગભગ ૧,૦૯૭ પોઈન્ટ ઘટીને ૭૮,૯૧૮ પર બંધ થયો હતો, અને નિફટી ૩૧૫ પોઈન્ટ ઘટીને ૨૪,૪૫૦ પર બંધ થયો હતો. આ સતત ઘટાડાથી રોકાણકારોમાં ઊંડી ચિતા ફેલાઈ રહી છે. સેન્સેક્સના તમામ ૩૦ શેર ઘટ્યા.

શરૂઆતના ટ્રેડિગમાં ઇન્ડિગોના શેર ૫% થી વધુ ઘટ્યા. એશિયન પેઇન્ટ્સ, એલ એન્ડ ટી અને અદાણી પોર્ટ્સ ૪% થી વધુ ઘટ્યા. એસબીઆઈ, મારુતિ, એટરનલ, એચડીએફસી બેંક, ટાટા સ્ટીલ, બજાજ ફાઇનાન્સ, મહિન્દ્રા અને મહિન્દ્રા, આઈસીઆઈસીઆઈ બેંક અને કોટક મહિન્દ્રા બેંકના શેર ૩% થી વધુ ઘટ્યા. આ મોટા પાયે બજાર વિનાશનું મુખ્ય કારણ સાત સમુદ્ર પાર ચાલી રહેલા તીવ્ર ભૂરાજકીય તણાવ છે.

અમેરિકા, ઇઝરાયલ અને ઇરાન વચ્ચેનો સંઘર્ષ હવે એવા તબક્કે પહોંચી ગયો છે જ્યાં ઉર્જા પુરવઠાની કટોકટી વધુ ઘેરી બની છે. ઇરાને પર્સિયન ગલ્ફમાં કેટલાક સૌથી મહત્વપૂર્ણ માળખાગત સુવિધાઓને નિશાન બનાવી છે. તેના જવાબમાં, ઇઝરાયલે પણ આક્રમક વલણ અપનાવ્યું છે, તેહરાનના મુખ્ય તેલ ડેપો પર હુમલો કર્યો છે.

આ લશ્કરી સંઘર્ષથી વિશ્વભરના બજારોમાં ગભરાટ ફેલાયો છે. આ ભયને કારણે ક્રૂડ ઓઇલ (બ્રેન્ટ ક્રૂડ) ના ભાવમાં તીવ્ર વધારો થયો છે અને પ્રતિ બેરલ ૧૧૭ ના ખતરનાક સ્તરને પાર કરી ગયો છે. ક્રૂડ ઓઇલના ભાવમાં આ વધારો સીધા ફુગાવાને આમંત્રણ આપે છે. માત્ર ભારત જ નહીં પરંતુ એશિયન બજારોમાં પણ ગભરાટ ફેલાયો છે, જ્યાં ૭ ટકા સુધીનો ભારે ઘટાડો નોંધવામાં આવ્યો છે.

જો કે, બપોર સુધી ઈન્ટ્રા ડે ઉતાર-ચઢાવના કારણે અનિશ્ચિતતાઓના માહોલ વચ્ચે પણ ખરીદ-વેચાણ ચાલુ રહ્યુ હોવાથી શેરમાર્કેટ હાલક-ડોલક જેવી સ્થિતિમાં જોવા મળી રહ્યું છે.

છેલ્લા સમાચાર મુજબ સેન્સેક્સ ૧૭પ૦ અને નિફટી પપ૦ પોઈન્ટ નીચે હતો.

જો આપને આ પોસ્ટ ગમી હોય તો શેર કરો...