ભાણવડની સગીરા પર દુષ્કર્મના ગુન્હામાં રાજસ્થાનના શખ્સને ૨૦ વર્ષની કેદની સજા

Author: નોબત સમાચાર

ભાણવડની સગીરા પર દુષ્કર્મના ગુન્હામાં રાજસ્થાનના શખ્સને ૨૦ વર્ષની કેદની સજા

અન્ય કેસમાં નરાધમને પણ ૨૦ વર્ષની કેદઃ

જામનગર તા. ૧૪: ભાણવડથી પોતાના વતનમાં જવા નીકળેલી સગીરા પર રાજસ્થાનના એક શખ્સે દુષ્કર્મ ગુજાર્યાનો ગુન્હો નોંધાયા પછી આરોપીને અદાલતે ૨૦ વર્ષની સખત કેદ ફટકારી છે. જ્યારે દોઢેક વર્ષ પહેલાં ખંભાળિયા પંથકમાં એક સગીરા પર તેણીના પિતાએ ગુજારેલા દુષ્કર્મના કેસમાં નરાધમ પિતાને અદાલતે ૨૦ વર્ષની સજાનો હુકમ કર્યાે છે.

ભાણવડ પંથકમાં થોડા વર્ષ પહેલાં એક પરપ્રાંતીય સગીરા પોતાના બહેન-બનેવી સાથે મજૂરીકામ માટે આવ્યા પછી કામ પરથી વતનમાં જવા માટે ટ્રેન મારફતે નીકળી હતી અને રાજસ્થાનના જયપુર રેલવે સ્ટેશન પર પહોંચી હતી.

ત્યાં મળી ગયેલા કોટા જિલ્લાના ગોવિંદપુર ગામના તુફાનસિંગ મંગીલાલ તૈવર નામના શખ્સે તે સગીરાને પોતાા ઘરે લઈ જઈ દુષ્કર્મ ગુજાર્યા પછી લગ્ન કરી લીધા હતા. ભાણવડ પોલીસે ગુન્હો નોંધી આરોપીની ધરપકડ કરી હતી. તે કેસ ચાલી જતાં દ્વારકાની ખાસ પોક્સો અદાલતે આરોપી તુફાનસિંગને ૨૦ વર્ષની સખત કેદની સજા ફટકારી છે.

તે ઉપરાંત ખંભાળિયા તાલુકામાં વસવાટ કરતા એક પરિવારની ૧૨ વર્ષની પુત્રી દોઢેક વર્ષ પહેલાં પોતાના માસીના ઘરે રોકાવા ગઈ ત્યારે તેણીએ માસીને જણાવ્યું હતું કે, તેના સગા પિતાએ અવારનવાર દુષ્કર્મ ગુજાર્યું છે. માસીએ પોલીસમાં ફરિયાદ નોંધાવી હતી. ખંભાળિયા પોલીસે આરોપીની ધરપકડ કરી હતી.

તે કેસ ચાલી જતાં અદાલતે આરોપી પિતાને ૨૦ વર્ષની સખત કેદની સજા ફટકારી છે અને ભોગ બનનાર સગીરાને રૂ.૧ લાખનું વળતર કમ્પેઈન્સેશનમાંથી ચૂકવવા આદેશ કર્યાે છે.

જો આપને આ પોસ્ટ ગમી હોય તો શેર કરો...