ફટાકડા ફોડવાની બાબતે ધોકાની રાત્રે અંધાશ્રમ આવાસમાં પ્રૌઢની થઈ હત્યા

Author: નોબત સમાચાર

ફટાકડા ફોડવાની બાબતે ધોકાની રાત્રે અંધાશ્રમ આવાસમાં પ્રૌઢની થઈ હત્યા

સાળા, બનેવી, ભાણેજે છરી હુલાવી હત્યા કરી નાખીઃ

જામનગર તા. ૨૭: જામનગરના અંધાશ્રમ આવાસમાં ધોકાની રાત્રે ફટાકડા ફોડવાની બાબતે બે યુવાન વચ્ચે બોલાચાલી થયા પછી એક પ્રૌઢે ઝઘડો નહીં કરવાનું કહેતા તેમના પર સાળા-બનેવી તથા ભાણેજે હુમલો કરી માર મારવા ઉપરાંત એક શખ્સે છરી હુલાવી દઈ આ પ્રૌઢની હત્યા નિપજાવી હતી.

જામનગરના અંધાશ્રમ આવાસ કોલોની વિસ્તારમાં બ્લોક નં.૬માં વસવાટ કરતા સાગર મુકેશભાઈ કાપડીના બ્લોક પાસે ધોકાના દિવસે રમવ વાલજીભાઈ દવે નામનો યુવાન ફટાકડા ફોડતો હતો ત્યારે બ્લોક નં.૧૮માં રહેતા મમલન રમેશભાઈ ગુજરીયાને ફટાકડા ફોડવા બાબતે રમવ સાથે બોલાચાલી થઈ હતી.

આ વેળાએ ત્યાં હાજર સાગરના પિતા મુકેશભાઈ ઉર્ફે કાનાભાઈ કાપડીએ ઝઘડો નહીં કરવાનું કહેતા મમલન રમેશભાઈ ગુજરીયાએ ફડાકો ઝીંકી દીધો હતો. તે પછી મમલન અને તેના પિતા રમેશભાઈ ગુજરીયા અને મામા અજય બાબુભાઈ કોળીએ છરી વડે હુમલો કરી મુકેશભાઈને માર માર્યો હતો. વચ્ચે પડનાર રમવ દવેને ડાબા પડખામાં મમલને છરીના બે ઘા ઝીંકી દીધા હતા. જ્યારે છરી હુલાવી દેવાતા મુકેશભાઈ કાપડીને ગંભીર ઈજા થઈ હતી. આ પ્રૌઢનું મૃત્યુ નિપજ્યું છે. સાગર મુકેશભાઈ કાપડીએ પોલીસમાં ફરિયાદ નોંધાવી છે. પોલીસે હત્યાનો ગુન્હો નોંધી મમલન રમેશભાઈ, તેના પિતા રમેશભાઈ ગુજરીયા તથા મામા અજય બાબુભાઈ કોળીની ધરપકડ કરી લીધી છે. ફટાકડા ફોડવા જેવી બાબતે તહેવારમાં જ એક પ્રૌઢની હત્યા થઈ જતાં આવાસ કોલોનીમાં ચકચાર જાગી હતી.

જો આપને આ પોસ્ટ ગમી હોય તો શેર કરો...