ડીકેવી પાસે મુસાફર ઉતારતા રિક્ષાચાલક પર બે અજાણ્યા શખ્સનો હુમલોઃ હેમરેજ થઈ ગયું

Author: નોબત સમાચાર

ડીકેવી પાસે મુસાફર ઉતારતા રિક્ષાચાલક પર બે અજાણ્યા શખ્સનો હુમલોઃ હેમરેજ થઈ ગયું

ગુલાબનગરમાં યુવાન તથા તેના માતા અને કાકી પર મહિલા સહિત ચારનો હુમલોઃ

જામનગર તા. ૧૭: જામનગરના ગુલાબનગરમાં સિન્ડીકેટ સોસાયટી પાસે ગઈકાલે સાંજે ઉભેલા બે યુવાનના પગ પાસે એક શખ્સે મોટર ઉભી રાખતા થયેલી બોલાચાલી પછી એક મહિલા સહિત ચારે એક યુવાન તથા તેના માતા અને કાકી પર હુમલો કરી માર માર્યાે હતો. જ્યારે ડીકેવી પાસે રિક્ષામાંથી મુસાફર ઉતારતા રિક્ષાચાલકને પાછળથી બાઈકમાં ધસી આવેલા બે શખ્સે માર મારી હેમરેજ કરી નાખ્યું હતું. પોલીસે બંને ફરિયાદ પરથી ગુન્હો નોંધ્યો છે.

જામનગરના ગુલાબ નગરમાં આવેલી સિન્ડીકેટ સોસાયટીમાં રહેતા સવિતાબેન નિલેશભાઈ નકુમ નામના મહિલાનો પુત્ર રીપલ તથા ભત્રીજો કૃપાલ ગઈકાલે સાંજે પોતાના ઘર પાસે ચોકમાં ઉભા હતા ત્યારે નજીકમાં જ રહેતા પાર્થ જીતુભાઈ પરમારે પોતાની મોટર બાજુમાંથી ચલાવી રીપલના પગ પાસે ઉભી રાખી દીધી હતી.

આથી રીપલે જોઈને ગાડી ચલાવવાનું કહેતા ઉશ્કેરાયેલા પાર્થ પરમારે ગાળો ભાંડી હતી. ગાળો બોલવાની ના પાડતા પાર્થે હુમલો કરી ઢીકાપાટુથી માર માર્યાે હતો. આ વેળાએ ત્યાં આવેલા પરેશ છગનભાઈ પરમાર, ભરત છગનભાઈ પરમાર, તરૂણાબેન છગનભાઈ પરમારે હલ્લો કર્યાે હતો.

ઉપરોક્ત વ્યક્તિઓએ માર મારવા ઉપરાંત પરેશે ત્યાં પડેલો પથ્થર ઉપાડી રીપલના માથામાં ઝીંકી દીધો હતો ત્યારે ભરત તથા તરૂણાબેને ઢીકાપાટુથી માર માર્યાે હતો. છોડાવવા માટે ધસી ગયેલા સવિતાબેન તથા તેમના દેરાણી જાગૃતિબેનને ભરત તથા પરેશ પરમારે ધક્કો મારી પછાડી દીધા હતા. સિટી બી ડિવિઝનમાં તેની ફરિયાદ કરાઈ છે.

કાલાવડ નાકા બહાર આવેલા માજોઠી જમાતખાનામાં રહેતા નફીશાબેન ઈબ્રાહીમભાઈ માકોડા નામના મહિલાના પતિ ઈબ્રાહીમભાઈ દાઉદભાઈ માકોડા ગઈકાલે સવારે પોતાની રિક્ષામાં મુસાફર ભરીને ડીકેવી કોલેજ રોડ પર જતા હતા. જ્યાં તેઓએ મુસાફર ઉતારવા રિક્ષા ઉભી રાખતા પાછળથી બાઈકમાં આવેલા બે શખ્સે અચાનક જ ઉતરીને ઈબ્રાહીમભાઈ પર હુમલો કરી ગાળો ભાંડવા ઉપરાંત માથામાં ધુંબા માર્યા હતા. જેના કારણે હેમરેજ સહિતની ઈજા પામેલા ઈબ્રાહીમભાઈને સારવારમાં ખસેડાયા છે. નફીશાબેને હુમલાખોરો સામે ફરિયાદ નોંધાવી છે.

જો આપને આ પોસ્ટ ગમી હોય તો શેર કરો...