સ્ત્રી મિત્ર સાથે જતાં યુવાનને બે શખ્સે ધોકાવ્યોઃ ઠેબામાં ખેડૂતને કરી નખાયું ફ્રેક્ચર

Author: નોબત સમાચાર

સ્ત્રી મિત્ર સાથે જતાં યુવાનને બે શખ્સે ધોકાવ્યોઃ ઠેબામાં ખેડૂતને કરી નખાયું ફ્રેક્ચર

સમાધાનના ૫૦ હજાર માંગી ધમકી અપાઈઃ

જામનગર તા. ૧૪: જામનગરના વાલસુરા રોડ પરથી સ્કૂટર પર પોતાની સ્ત્રી મિત્ર સાથે જતા એક યુવાનને તે યુવતીના ભાઈ સહિતના બે વ્યક્તિએ રોકી લઈ ધોકા તથા પથ્થરથી માર માર્યાે હતો. જ્યારે ઠેબામાં ખડ નાખવાના પ્રશ્ને ખેડૂતને માર પડ્યો હતો. અગાઉની માથાકૂટના સમાધાન માટે રૂપિયા અડધા લાખની માગણી કરી બે શખ્સે એક યુવાનને ગાળો ભાંડી પતાવી દેવાની ધમકી આપી હતી.

જામનગરના શંકરટેકરી વિસ્તારમાં આવેલી સિદ્ધાર્થ કોલોની શેરી નં.ર૩માં રહેતા દિલીપભાઈ ગોવિંદભાઈ ચૌહાણ નામનો યુવાન પોતાના સ્ત્રી મિત્ર સાથે ગઈકાલે પોલિટેકનિક રોડ પરથી સ્કૂટરમાં જતા હતા ત્યારે માર્ગમાં તુષાર કેશુભાઈ મકવાણા તથા એક અજાણ્યા વ્યક્તિએ રોકી લીધા હતા.

ત્યારપછી દિલીપના માથામાં પથ્થર તથા ધોકો ફટકારવામાં આવ્યો હતો. ઈજા પામેલા દિલીપભાઈને આંગળીમાં ફ્રેક્ચર થઈ ગયું છે. ગાળો ભાંડી ધમકી આપી બંને શખ્સ ચાલ્યા ગયા હતા.

જામનગરના જૂના રેલવે સ્ટેશન પાસે ભીમવાસની શેરી નં.૧માં રહેતા અનિલ પ્રભુભાઈ વાઘેલા રવિવારે રાત્રે પોતાના ઘર પાસે હતા ત્યારે અગાઉની માથાકૂટના કારણે સમાધાનની વાત કરવા મનિષ ગોહિલ તથા નાનજી પરમાર આવ્યા હતા. આ શખ્સોએ સમાધાન માટે રૂ.પ૦ હજાર આપવાના થશે તેમ કહી ગાળો ભાંડી પતાવી દેવાની ધમકી આપી હતી.

જામનગર તાલુકાના ઠેબા ગામના ધરમશીભાઈ ઠાકરશીભાઈ ચાંગાણી નામના ખેડૂત પર ગઈકાલે ખડ નાખવાના પ્રશ્ને પ્રવીણ જેસાભાઈ મુંગરા નામના શખ્સે ધોકાથી માર મારતા ફ્રેક્ચર સહિતની ઈજા પામેલા ધરમશીભાઈને સારવારમાં ખસેડવામાં આવ્યા છે. તેઓએ પોલીસમાં ફરિયાદ નોંધાવી છે.

જો આપને આ પોસ્ટ ગમી હોય તો શેર કરો...