રાજકુમાર સંતોષીને ચેક પરતના કેસમાં હાઈકોર્ટમાંથી રાહતઃ ૮૮ લાખ જમા કરાવાશે

Author: નોબત સમાચાર

રાજકુમાર સંતોષીને ચેક પરતના કેસમાં હાઈકોર્ટમાંથી રાહતઃ ૮૮ લાખ જમા કરાવાશે

બે વર્ષની કેદ અને રૂ.ર કરોડનો ફટકારાયો હતો દંડઃ

જામનગર તા. ૩૧ઃ હિન્દી ફિલ્મજગતના જાણીતા નિર્દેશક સામે જામનગરની કોર્ટે ચેક પરતના કિસ્સામાં બે વર્ષની કેદ અને રૂ.ર કરોડ દંડ ભરવાનો હુકમ કર્યાે હતો. તે હુકમ સેશન્સ કોર્ટમાં યથાવત રહેતા હાઈકોર્ટમાં રાહત મેળવવા રીવીઝન કરાઈ હતી. હાઈકોર્ટે રૂ.૮૮ લાખ ભરપાઈ કરવાની ખાતરી મળતા નિર્દેશકને શરતી જામીન પર મુક્ત કરી સજા હાલમાં મોકૂફ રાખી છે.

જામનગરના જાણીતા ઉદ્યોગ્+ાપતિ અશોકભાઈ લાલ પાસેથી હિન્દી ફિલ્મજગતના જાણીતા નિર્દેશક રાજકુમાર સંતોષીએ કેટલાક વર્ષ પહેલા રૂ.૧ કરોડ હાથઉછીના લીધા હતા. તે રકમની પરત ચૂકવણી માટે રાજકુમાર સંતોષીએ રૂ.૧૦ લાખનો એક એવા દસ ચેક આપ્યા હતા. તે તમામ ચેક અલગ સહી હોવાના કારણે બેંકમાંથી પરત ફર્યા હતા અને અશોકભાઈએ અદાલતમાં ફરિયાદ નોંધાવી હતી.

તે તમામ કેસ ચાલી જતા અદાલતે આરોપી રાજકુમાર સંતોષીને દોષિત ઠરાવી બે વર્ષની કેદ અને ચેકથી બમણી રકમનો દંડ ફટકાર્યાે હતો. તે હુકમ સામે સેશન્સ કોર્ટમાં કરાયેલી અપીલમાં પણ તે હુકમ યથાવત રાખવામાં આવ્યો હતો.

તે પછી હાઈકોર્ટ સમક્ષ રાજકુમાર સંતોષીએ રીવીઝન અરજી કરી હતી. તેની સુનાવણીમાં અદાલત સમક્ષ રાજકુમાર સંતોષીએ ગઈકાલે રૂ.પ લાખ જમા કરાવવા ઉપરાંત રૂ.૮૩ લાખમાંથી રૂ.૪૧ લાખ ૫૦ હજાર તા.૩૦ નવેમ્બર પહેલા અને બાકીના રૂ.૪૧ લાખ પ૦ હજાર ૩૧ ડિસેમ્બર સુધીમાં જમા કરાવવાની બાહેંધરી આપી હતી. હાઈકોર્ટે તેનું બાહેંધરી પત્રક આગામી તા.૭ સુધીમાં રજૂ કરી દેવા હુકમ કરી તેને ફટકારવામાં આવેલી સજા હાલમાં મોકૂફ રાખી છે અને શરતી જામીન આપ્યા છે.

જો આપને આ પોસ્ટ ગમી હોય તો શેર કરો...