Author: નોબત સમાચાર
ધ્રોલમાં એક દિવસ બંધ પડેલા મકાનમાં હાથફેરો કરનાર બેલડી ઝડપાઈઃ ચોરાઉ તમામ દાગીના કબજે
ચોરાઉ દાગીના વેચવા જતાં જામનગર તથા ધ્રોલના બે શખ્સ ઝડપાઈ ગયાઃ
જામનગર તા. ૧૩: ધ્રોલમાં મોરબી નાકા રોડ પર આવેલા એક મકાનમાં સોમવારની રાત્રિથી મંગળવારની બપોર સુધીમાં ચોરી થઈ હતી. તે મકાનના નીચેના ઓરડામાં કબાટમાંથી સોના-ચાંદીના દાગીના તથા ડબ્બો મળી રૂ.૧ લાખ પપ હજારની મત્તા ચોરાઈ જતાં પોલીસે તપાસ શરૂ કરી હતી. જેમાં ધ્રોલના એક તથા જામનગરનો એક શખ્સ મુદ્દામાલ વેચવાની કોશિષ કરતી વખતે ઝડપાઈ ગયા છે. પોલીસે તમામ મુદ્દામાલ કબજે કરી પૂછપરછ કરતા બંને શખ્સે ચોરીની કબૂલાત આપી છે.
ધ્રોલ શહેરમાં મોરબી નાકા રોડ પર પોસ્ટ ઓફિસ પાસે વસવાટ કરતા અબદેઅલી મુસ્તુફાભાઈ કાદીયાણી નામના આસામીનું મકાન સોમવારે રાત્રિથી મંગળવારની બપોર સુધી બંધ રહ્યું હતું. તે દરમિયાન તેમના મકાનમાં ખાતર પડ્યું હતું. તે મકાનમાં મુખ્ય દરવાજાનો આગળીયો ખોલી નાખી ઘૂસી ગયેલા કોઈ તસ્કરે નીચેના ભાગમાં આવેલા ઓરડા સ્થિત કબાટમાંથી સોના-ચાંદીના રૂ.૧ લાખ ૫૩ હજારની કિંમતના દાગીના તથા રૂ.ર હજારની કિંમતનો ચાંદીનો ડબ્બો ઉઠાવી લીધા હતા.
ચોરીની મંગળવારે બપોરે એકાદ વાગ્યે ઘેર આવેલા અબદેઅલીને જાણ થતાં તેઓએ મંગળવારે રાત્રે ધ્રોલ પોલીસ મથકમાં ફરિયાદ નોંધાવી હતી. પીઆઈ એચ.વી. રાઠોડના વડપણ હેઠળ પોલીસ ટીમે તપાસ શરૂ કરી હતી.
તપાસ દરમિયાન પોલીસે કેટલાક સીસીટીવી કેમેરા ચકાસ્યા હતા. જેમાં તસ્કરના સગડ મળ્યા હતા અને બે શખ્સ ચોરીનો મુદ્દામાલ વેચવાની કોશિષ કરી રહ્યા છે તેવી બાતમી મળી હતી. જેના પગલે ધ્રોલ પોલીસે વોચ ગોઠવી ધ્રોલની રઝવી સોસાયટીમાં રહેતા શાહનવાઝ ઈબ્રાહીમ શાહમદાર તથા મૂળ ધ્રોલના અને હાલમાં સુભાષબ્રિજ પાસે બારદાનવાલા કોમ્પલેક્ષમાં રહેતા અને હેર કટીંગનું કામ કરતા સામીલ અમીન ખલીફા ઉર્ફે સુલતાન નામના બે શખ્સને દબોચી લીધા હતા.
આ શખ્સોની તલાશી લેવાતા સોનાની બે બંગડી, બે વીટી, ચાંદીના મણકા, ચકદુ, ચાંદીનો ડબ્બો મળી આવ્યા હતા. પોલીસે તે અંગે પૂછપરછ કરતા આ શખ્સોએ ધ્રોલના મોરબી નાકા રોડ પર એક મકાનમાં ચોરી કર્યાની કબૂલાત આપી છે. પોલીસે મુદ્દામાલ કબજે કરી બંને આરોપીની ધરપકડ કરી છે.
આરોપી શાહનવાઝ સામે ધ્રોલ પોલીસ મથકમાં ત્રણ ગુન્હા અને સામીલ સામે ધ્રોલ, કાલાવડ તથા રાજકોટ શહેરમાં ત્રણ ગુન્હા નોંધાયેલા છે. બંને આરોપીને રિમાન્ડ પર લેવાની તજવીજ કરવામાં આવી છે.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
